Главная

Гьясан Алкьадарийин 180 йисаз

3«Ич дада Секинатдиз Етим Эминдин гизаф мяълийир кIваъланди аьгъяйи. Етим Эминди ич аьхю аба Гьясан-эфендийикан ва гьацира ич тмуну аьхю аба Гьяжи-Шихбабайикан зурба гьюрматниинди бикIури гъахьну. Ич дада Гьясан Алкьадарийин бай Абумуслимдин риш ву», - дибикIна ихь халкьдин машгьур шаир ва мялим Зумруд Ханмягьмадовайин дневникдиан вуйи пайнаъ. Дюзди гъапиш, узуз му бикIбар Алкьадар гъулаъ лезги халкьдин машгьур вакил Гьясан Алкьадарийин ирс уьбхюз дивнайи музейиъ ва музейин директор Гьюсейн Гьюсейновдин китабдиъ алахьунзуз. (Зумруд Ханмягьмадовайин дневник амийин-амдарин ва наан айин - думу ихь литературайин тарих ахтармиш апIбахъди аьлакьалу месэла ву, ухьу дидихьна жара вахтна хътакурхьа.) Алкьадарийин музейиъ аьхю гьюрматниинди ихь машгьур Ханмягьмадоварин хизандикан - Гьясан Алкьадарийин гудларикан ва цIудларикан жюрбежюр материал уч дапIна.

Дагъуниверсиада – 2014

Гъубшу йисан декабрин аьхирариъ республикайин студентарин арайиъ «Дагъуниверсиада – 2014» спортдин сабпи фестиваль гъабхьнийи. Спортдин фестиваль Дагъустан Республикайин Главайин Кубок гъазанмиш апIуз гъубхуб вуйи. Думу кубок бадали махлукьатлу спортдин жюрбежюр жюрйириан вуйи талитариъ республикайин 7 вуздиан ва 10 ссуздиан агъзуртIан артухъ студентар иштирак гъахьнийи. 

Спортдин фестиваль республикайин жигьиларин ляхнариз лигру Министерствойи, РД-йин образованиейинна илимдин Министерствойи, РД-йин спортдинна физический культурайин Министерствойи сатIиди тешкил гъапIуб вуйи. Думу «Инсандин капитал» важиблу проектдин дахилнаъди гъубхнийи.

Хив райондиъ ляхин апIурайи спортдин 2 мектебдиъ 568 бицIир спортдиин машгъул ву

7Дагъустан Республика – спортсменарин уьлке ву кIуру гафар кми-кмиди ерхьури шулхьуз. Дугъриданра, ихь ватанагьлийири му жигьатнаан жюрбежюр дережйириъ заан хъуркьуваларра гъазанмиш дапIна. 

Республикайин физкультурана спорт артмиш апIбак «Хивский район» МР-йин ерли администрацияйи, дидин физкультурайинна спортдин, туризмйин ва жигьиларин месэлйириз лигру отдели, спортдин мектебари, йишвариин спорт артмиш апIбиин машгъул вуйи касари лайикьлу пай кивра. Му гафар арайиз дуфнайи гьякьикьатди субут апIура. Хив райондин физкультурайинна спортдин, туризмйин ва жигьиларин политика гъабхбан отделин начальник Сабир Гьябибовди ич сюгьбатнаъ чпин вазифйирикан, гъахурайи серенжемарикан дикъатлуди ктибтну.

РД-йин Главайин тебрик

2Гьюрматлу дагъустанлуйир!
Учву улубкьурайи ЦIийи йисахъди тебрик апIураза! Гьаму аку, уьмур мюгькам апIру машкврин улихь ухьу гьарсар касди умудлувалиинди гележегдикан фикир апIурахьа, тарихдиз гъябгъюрайи йисаз фикрариинди гежехайир кIурахьа.
2014-пи йис ухьуз ихь уьлкейи дюн’яйин арандиъ чан мюгькамвал тасдикь гъапIу, Крым Урусатдин дахилназ кьяляхъ гъафи, ихь спортсменари Олимпиадайиъ гъалибвалар гъадагъу, баркаллу зегьметнан ва республикайин артмиш’валиъ сабпи аьхю хъуркьувалар гъадагъу йисси кIваин гъубзди. Аьхиримжи йисарин арайиъ Дагъустан экономикайин артмиш’валин улупбариан сабпи ражари вуди уьлкейиъ улхьан йишвариз удубчIвну. Ухьу агьалйирин уьмрин ери за апIбан, яшайишдин сабпи нубатнаъ гьял дапIну ккуни месэлйириин лихувал давам гъапIунхьа. ЦIийи мектебар, бицIидарин багъар, поликлиникйир, спортдин дараматар тикмиш апIури, образованиейин, сагъламвал уьбхбан цирклариъ айи месэлйир гьял апIури, культура артмиш апIбиин лихури гъахьунхьа.
Гъи ухьуз Дагъустандин сурат ужуб терефназди илтIибкIуз ккундухьуз, амма ихь сатIи яратмиш апIбан кьувватарииндитIан республика хъуркьувалин ва ужуб региондиз илтIибкIуз хьибдар. ВаритIан асасуб, ухьу сабвалин кьиматлувалариз, абйир-бабарин аьдатариз, тарихдин ужуб йигъанси, харжи йигъанра Урусатдихъди сабси гъузбан кьисматназ вафалуди гъузбан тереф гирамиди уьбхюрахьа. Ухьуз думу важиблу ву!
Дагъустанлуйирин гьарсаб хизандиз ислягьвал, саламатвал ва ихь сатIи вуйи хулаъ – Урусатдин Федерацияйиъ – хушбахтвал хьуб ккун апIураза!

Дагъустан
Республикайин Глава Р.Аьбдулатипов

Государствойин ва муниципалин гъуллугъар гьуркIбан гьякьнаан

Аьхиримжи вахтна мялуматарин арандиъ государствойин ва муниципалин гъуллугъар гьуркIру центрарикан, яна МФЦ-йирикан, гизаф улхбар гъягъюра. «Саб унчIв» жюрейиинди лихурайи мицдар центрар Дагъустан Республикайин вари агьалйирин гъуллугънаъ духьну ккунду.
Ич газатдиз вуйи интервьюйиъ Дагъустан Республикайин аьлакьайин ва телекоммуникацйирин министр Сефер Аьлиевди гизаф гъуллугъар гьуркIру центрарин ляхникан, МФЦ-йиз пишекрар гьязур ва цIийи центрар ачмиш апIуваликан ктибтну.

Культурайин Йисан натижйир гъивну

Гъубшу йисан декабрин аьхиримжи йигъари Мягьячгъала шагьриъ М.Горькийин ччвурнахъ хъайи Урус драмтеатриъ культурайин Йисан натижйириз бахш дапIнайи яркьу серенжем кIули гъубшну. Культурайин гъуллугъчйир тебрик апIури, думу серенжемдиз Дагъустан Республикайин Глава Р.Аьбдулатипов, РД-йин Халкьдин Собраниейин Председатель Хизри Шихсяидов, РД-йин Гьюкуматдин Председаетль Аьбдусамад Гьямидов, РД-йин Гьюкуматдин Председателин сарпи заместитель Анатолий Карибов, Мягьячгъала шагьрин мэрин вазифйир тамам апIурайи Мягьямед Сулейманов, РД-йин саки вари министрар, парламентдин депутатар, илимдинна яратмиш апIбан интеллигенцияйин вакилар уч гъахьнийи. 

«Урусатдин лизи кьарнийир»

5Москвайиъ кIули гъубшу литературайин фестиваликан кьюб гаф

Гьар йисан ноябрин аьхириъ Москвайиъ Литераторарин центральный хулаъ (ЦДЛ) Халкьарин дуствалин фестиваль «Урусатдин лизи кьарнийир» кIули гъабхури аьдатнаъ абхъна. Фестивалин асас метлеб - халкьарин арайиъ дуствал ижми апIуб ва культурайинна литературайин аьлакьйир гужал хьуз кюмек тувуб ву.

Ккудубшу йисандин фестиваль Расул Гьямзатовдин «Кьарнийир» мяълийиинди ккебгънийи. Фестиваль тешкил апIбан кIулиъ айир урус шаир ва таржумачи Сергей Соколкин вуйи, хъа серенжем гъабхуз дугъаз мяълийирин машгьур устад Елена Догайи кюмек апIурайи.

Угъривал – «кьаби» тахсиркарвал ву

Хусусиятдихъди аьлакьалу вуйи тахсиркарвалар, Урусатдиъси, вари дюн’яйиъ дегьзаманайихъан мина варитIан гизаф тарагънайи тахсиркарвалар ву. Хусусият уьбхбан ихтиярар уьрхювал инсан яшамиш, хьпан жямяаьтдин арайиъ артмиш хьпан ва уьмур хъапIбан гизаф важиблу пай ву. Гьаддиз думу ихтиярар инсандин ихтиярарин Уьмуми баяннамайиъ къайд дапIна. Гьарсар касдиз кIул’инди вая жарадарихъди сатIиди мутмуйин зиин эйсивал апIуз ихтияр а. Ва инсан чан мутмуйихъ мягьрум апIуз саризра ихтияр тувнадар. Гьаддиз государствойин буржи - вари жюрейин мутму уьбхювал ву. 

«Бархудрар» тухум

Гьаму макьалайилан хъюгъну, архйириан Табасарандиъ тухмар аьмалназ гъюбкан, дурарин тарихдикан, наслиан-наслиз гъиту савкьатарикан вуйи макьалйир чап апIуз хъюгърача. Табасаран, Хив районариъ, Дагъ.Огни, Дербент, Мягьячгаъла, Каспийск ва жара шагьрариъ яшамиш шулайи ихь ватанагьлийирихьан му жюрейин макьалйириз ккилигурача.

6«Бархудрар» тухум Табасаран райондин Хюрикк гъулан жямяаьтдин асас паярикан саб ву. Гъи думу тухмин вакиларин кьадар кьюдварждихьна удубчIвна. Жанлуди зегьметнан ва жямяаьтлугъдин уьмриъ иштирак шули, дурар Хюрикк гъулаъ ва уьлкейин жюрбежюр жара йишвариъ яшамиш шула. Му тухмин вакиларин арайиъ чпиинди дамагъ апIуз шлу спортсменар, мялимар, устйир, шаирар, тикилишчйир ва РФ-йин Яракьлу Кьувватариъ лайикьлуди гъуллугъ апIурайидар а.

Девлетнан мядан

Мамедгъала поселениейин ругариин уьмуми образование тувру шубуб кьялан мектеб ерлешмиш шула, дурарикан саб гимназия ву. Уьмумиди гъадабгъиш, вари мектебариъ саки сад агъзурихьна урхурайидар а. Мисалназ, 1-пи нумрайин кьялан мектебдиъ (директор Байрамкъиз Наджафова) 486 балина шуру аьгъювалар гъадагъура. Дурариз 76 мялимди аьгъювалар тувра. Мектебдиъ 2 сменайиъ ляхин апIура. Душваъ табасаран, лезги, азербайжан, дарги, къумугъ, агъул ва жара миллетарин баяр-шубари аьгъювалар гъадагъура. 

Страница 385 из 389

f1 in1 ok1 t1 v1 y1

Top