Главная

Видеозапись телемоста "Москва - Махачкала" с Павлом Безручко

 

__________________________________________________________________________________________

Дагъустандиъ бандитарин 8 десте терг гъапIну

Гъубшу йисан республикайиъ гъагъи аьгьвалат гизафси террориствалин ва экстремиствалин жюрейин тахсиркарваларикан асиллу гъабхьну кIури, гъубшу гьяфтайиъ гъабхьи къанун ва къайда тямин апIбаан Координационный совещаниейиъ РД-йин МВД-йин министр Аьбдурашид Мягьямедовди къайд гъапIну.

«Кьабул гъапIу уьлчйириз лигну, гьякь-гьисаб туврайи вахтнан арайиъ къанун уьбхру вари органарихъди сатIиди Каспийск, Избербаш, Къизлар шагьрарин, гьацира Къизлар, Бабаюрт, Леваши, Сергогъала, ЦIунтIа районарин аьтрафариин бандитарин дестйир терг гъапIну. Мидланна гъайри, 2014-пи йисандин арайиъ «Махачкалинская», «Хасавюртовская», «Буйнакская», «Кадарская» ва «Губденская» диверсияйинна террориствалин дестйирин аьхюну пай иштиракчйир терг гъапIну», - къайд гъапIну республикайин айтIан ляхнарин министри.

Шамиль Къазиев кIваин апIури

Ихь уьлкейиъ 2015-пи йис литературайи Йисси мялум дапIна

Табасарандин машгьур шаир Шамил Къазиевдин 70 йис тамам хьпаз тялукь юбилей дубхьну сад йис тамам шула. Му вахтнан арайиъ думу Аллагьдин рягьматдизра гъушну. 

Узу Шамил Къазиевдин эмдин бай вуди хьпаз лигну, дугъкан ва дугъан эсерарикан сакьюдар гафар пуз ккундузуз.
Шамили эсерар дикIруган, сифте чан гьарсаб шиир узуз улупури, урхури шуйи. Узу дугъаз кIури шуйза: «Мицисдар шиърар ихь табасаран литературайиъ гъахьидар дар, дурариъ яв хусуси хатI рябкъюра, дурар художествойин заан дережайин кIалбариинди дабалгна ва, шиърин мяна, тема, образар улупбан бадали, ихь чIалнан гавагьирар аьхю устадвалиинди ишлетмиш дапIна».

Приставари 2014-пи йисандин натижйир гъивну

2015-пи йисан февралин 11-пи йигъан Урусатдин РД-йиъ айи УФССП-йи 2014-пи йисан гъапIу ляхнин натижйир гъивну. 

Коллегияйиъ РД-йиъ айи ФССП-йин Управлениейин начальник Низами Гьялимов, СКФО-йин федералин инспектор В.Колесников, РД-йин Главайин Администрацияйин ва Гьюкуматдин правовой Управлениейин кIулиъ айи Азади Рягьимов, РД-йин прокурорин заместитель Заур Тарханов, РД-йин суддин департаментдин Управлениейин начальник Мухтар Уьмаров, РД-йиъ айи Роскомнадзорин Управлениейин руководитель Шамил Мягьямедов, Урусатдин Минюстдин правовой академияйин Кафари Кавказдин филиалин директор Багьаудин Мягьямедов иштирак гъахьнийи.

Хайирлу насигьятар тувну

Гьаму гьяфтайиъ «Молодежь Дагестана» газатдиъ республикайин «Узу Президентдин кюмекчи вуза» ва «Комсомолин ветеранарин Союз» жямяаьтлугъ тешкилатарин вакиларихъди гюрюш гъабхьнийи. Душваъ улихьдин комсомолин областной комитетдин секретарь Аьбдулатип Гьяжиев, комсомолин обкомдин секретарь Гьяжимурад Мягьямедов, «Узу Президентдин кюмекчи вуза» тешкилатдин кIулиъ айи Мягьямед Мягьямедов ва жара вакилар иштирак гъахьну. 

РД-йин Главайин Посланиейин гъуллугънаъ

Гьаму йигъари республикайин жямяаьтлугъдин жюрбежюр гъатари, гьадму гьисабнаан халкьдин маракьар уьрхюрайи депутатари, муниципалин образованйирин кIулиъ айидари, аьдати ватандашари РД-йин Глава Рамазан Аьбдулатиповдин Халкьдин Собраниейихьна вуйи Послание гьял апIура. Улхбариан саб уьмуми мянайихьна гъюзра шулу: «РД-йин Главайин Парламентдихьна вуйи Послание – жикъи муддатнаъ республика артмиш хьувалин хъуркьувалин натижа, гъузрайи читинвалар фикирназ гъадагъну, дурар арайиан адагъбан рякъяр агувалин кьатI’и табшуругъар тувбан гьякьлу программа ву». 

2015-пи йисандин важиблу проектар

Гъубшу гьяфтайиъ Дагъустандин государствойин аграрный университетдиъ республикайин муниципалин образованйириъ 2015-пи йисандин важиблу проектар гьял апIбан пландиз бахш дапIнайи стратегияйин сессия гъабхьну.

Думу ачмиш гъапIур РД-йин парламентдин спикер Хизри Шихсяидов вуйи. Дугъу гьаму сессия РД-йин Глава Рамазан Аьбдулатиповдин табшуругъниинди гъябгъюрайиб вуйиб къайд гъапIнийи.
Серенжем ачмиш апIури, РД-йин парламентдин спикери, гъийин йигъан ихь уьлке гъагъи гьялнаъ айиваликан гъапнийи.

Афгъанарин гьюрматназ

2Мялум вуйиганси, гьар йисан ухьухь февралиъ Афгъан дявдиъ игитвал улупу интернационалист-эскрарин гьюрмат уьбхбаз тялукь Йигъ къайд апIуру. Машквраз бахш вуйи серенжем улихьна йигъари Хив райондиъра къайд гъапIну.

«Хивский район» МО-йин депутатарин Собраниейин председатель Мухтар Байрамбеговди думу гюрюшдиъ, афгъандин женгариъ жигьилари улупу ватанпересваликан, гьунарлуваликан улхури, гьарсар иштиракчи машкврахъди чан, райондин руководствойин терефнаан тебрик гъапIну.

РД-йин Глава Р.Аьбдулатиповдин тебрик

Дагъустан Республикайин аьтрафариин ерлешмиш духьнайи дявдин частарин гъуллугъчйир, армияйин ва флотдин ветеранар, вари дагъустанлуйир Ватан уьбхрурин Йигъахъди тебрик апIураза.
Му йигъан ухьу читин, хъа гьюрматлу пише – Ватандин кьудратлувал мюгькам апIувал, государствойин милли маракьарин, ватандашарин ужуб уьмрин, ислягьвалин гъаравлиъ дийигъувал – жвуван пишеди ктабгъдариз ихь дерин гьюрмат улупурхьа.
Гъи Урусатдиъ ерийин гьякьнаан цIийи, деврин тIалабариз жаваб тувру армия дюзмиш апIура. Гьаму шараитариъ гъийин эскрарин ва офицерарин насул гъудуркьу пишекрар, государствойин азадвал мюгькамди уьбхюз шлудар, ихь ватандашарин хатIасузвал тямин апIрудар вуди тербияламиш апIувал, дявдин аьдатар уьрхювал важиблу ву.
Гъи ухькан гьарсар абйирин адназ, ватанпервервалин рюгьназ вафалу вухьа. Читин вахтари душмандихьан ихь багъри ругар гъюрхю эскрарин игитвалар гьаргандиз халкьдин фикриъ гъузди.
Дагъустанлуйири гележегдиъра, Урусатдин Федерацияйин Яракьлу Кьувватариъ лайикьлуди гъуллугъ апIури, чпин эскервалин буржи тамам апIур, Ватандиз вафалувалин чешне улупур кIури, умудлу вуза.
Мюгькам сагъвал, хушбахтвал, ихь Ватандиин ислягь завар хьувал ккун апIураза.

Дагъустан Республикайин Глава
Р.Аьбдулатипов

Р.Аьбдулатипов: «Агьалйир террориствализ аькси ляхниз жалб дапIну ккун»

1Февралин 17-пи йигъан Дагъустандин Глава Р.Аьбдулатиповдин регьберваликкди кIули гъубшу РД-йиъ къанундин къайда тямин апIбан Координационный совещаниейин нубатнан заседаниейиъ 2014-пи йисан республикайиъ ади гъабхьи тахсиркарваларин аьгьвалатнахъди аьлакьалу месэлйир гьял гъапIну, къанундин къайда ва жямяаьтлугъ хатIасузвал уьбхбан уьлчйириз гъилигну.
Рамазан Аьбдулатиповди къайд гъапIганси, къанун уьбхру органари оператив аьгьвалат къайдайиз хувалиин, ватандашар тахсиркрарихьан уьрхбиин, тахсиркарваларихъди гъабхурайи женгнан мянфяаьтлувал за апIбиин хайлин зегьмет гъизигну.
«Му гизаф важиблу хъуркьувал ву. Террориствалин хатIа гизаф айишра, ухьу ккудубшу йисан террориствалин актар адарди яшамиш гъахьунхьа. Му сифте къанун уьбхру гъурулушарин гьунар ву. Мидланна гъайри, республикайин ва ерли гьюкмари дурарихъди вуйи чпин аьлакьйир жанлу гъапIну. Сари-сар тянкьид апIбахьан ухьу сатIи вуйи ляхнихъна гъафунхьа», - къайд гъапIну Дагъустандин Главайи.

Уголовный дело гъитIибккну

Урусатдин Федерацияйин Силисчивалин комитетдин Дагъустан Республикайиъ айи силисчивалин органари убхъру штукан Дагъустандин Огни шагьрин гизаф агьалйир зегьерламиш хьувалиан, РФ-йин УК-йин 236-пи маддайин сабпи пайназ асас вуди (марцишнанна эпидемиологияйин къайдйир чIур апIувалиан гизаф агьалйир аьзарлу хьувал), уголовный дело ачмиш дапIна.
Дагъустандиъ айи СКР-йин улупбариинди, 2015-пи йисан февралин 2-10-пи йигъари Дербент ва Дагъустандин Огни шагьрарин медицинайин идарйириз 79 агьали илтIикIну. Дурари кефйир адруваликан, уьл ипIуз иштагь адруваликан, юкIв шавлу шулайиваликан, машнаъ гъатху ранг айиваликан аьрзйир апIури гъахьну. Больницайиз илтIикIдарик варидарик вирусдин «А» гепатит кайивал тасдикь гъабхьну.

Страница 520 из 533

f1 in1 ok1 t1 v1 y1

Top