ГлавнаяДагестан - этоДагъустандиъ хусуси туризм артмиш шула

Дагъустандиъ хусуси туризм артмиш шула

44Улихьна йигъари «Дагъустан» РИА-йин конференцйир гъахру залиъ «Шангереев Тур» кIуру туриствалин фирмайин директор Шамил Шангереев республикайин журналистарихъди гюрюшмиш гъахьну.

Конференция ачмиш апIури, Ш. Шангереевди чан туриствалин фирма тешкил дапIну саки юкьуд йис вуйиваликан ктибтнийи. Дугъан гафариинди, думу учвра, гизаф мина-тина гъягъюри, чаз гъяркъю табиаьтдин уткан, гюрчег йишварин шиклар йивуз ккуни кас ву. Нубатнан ражари гьаци рягьятвал гъадабгъуз гъушиган, дугъу гьацдар уччву йишвариз туристар хъади гъягъбакан фикир гъапIунза кIури, гъапнийи.

«Сабпи ражари туристар хьади гъягъювал 2015-пи йисан ккебгънийча. Думуган Сулакдин дараскьал гъяриз лигуз гъушнийча. Думу вахтари ич асас туристар дагъустанлуйир вуйи. Хъа аьхиримжи кьюд йисан учухьна харижи уьлкйириан ва Урусатдин жара регионариан вуйи туристарра илтIикIура», – гъапну фирмайин директори.

Шамил Шангереевди чпи туристар хьади гъягъюрайи маршрутдикан ва душнайи йишварикан ктибтурайи гидариканра конференцияйиъ мялуматар тувнийи.

«Учу инсанар хъади, ихь республикайин тарихи культурйирин йишварихьнаси, Урусатдин регионаризра ва жара гьюкуматаризра (Грузия, Азербайжан, Турция, Абхазия) гъягъюри шулча. Республикайиъ туристариз асас вуди гъягъюз ккуни йишвар – Сулакдин дараскьал гъяр, Хючнаъ рибчра, Гуниб ва Хунзах гъулар, Шамил ва Акъуша районар ву.

Улихьна вахтари учу туристар хьади саб вазлин ара-йиъ анжагъ сабан-кьюбантIан гъягъюри шулдайча. Хъасин дилихру йигъари гъягъюри гъахьунча. Гьамус инсанариз социальный сетариан аьгъю шули, сарихьан-сарихьна ебхьури айивализ лигну, учу саки гьар йигъан туристар гъахурача.

Ич фирмайиз айидар 20 ва 18 касдиз деъру йишвар айи кьюб микроавтобусар вуйич. Яна, пуз ккундузузки, ич айи машинар гьудрукIри, учу гъирагъдиланра инсанар гъахру микроавтобусариз дих апIурача.

Мидланра гъайри, конференцияйиз дуфнайи туриствалин фирмайин директори, аьдати туриствалин турар ктарди, бицIидар гъахбан, тарихдин, экологияйин, табиаьт марцц апIбан турарра гъахури шлуваликан мялум гъапIнийи. Дицисдар турар вазлин арайиъ сабан-кьюбантIан кIули гъахури шулдар.

«Ич фирма ачмиш гъапIу йигълан гъийин йигъазкьан учу мина-тина гъягъбан 400-тIан артухъ серенжемар тешкил гъапIунча. 25 агъзур инсанар гъухунча.

Пуз ккундузузки, ич гьамкьан бицIи фирмайи гьаму кьадар инсанар гъахувал, йиз фикриан, аьхю хъуркьувал ву», – аьлава гъапIнийи «Шангереев Тур» фирмайин директори.

Комментарии:

Top