ГлавнаяЭкономикаРД-йин Правительствойин заседание гъабхьну

РД-йин Правительствойин заседание гъабхьну

1 1 1 1 1 1 1 1 1 1 Рейтинг 5.00 (1 Голос)

LГьаму йигъари РД-йин Правительствойиъ вахтназ вуди Дагъустандин Главайин вазифйир тамам апIурайи Владимир Васильевдин регьберваликкди заседание кIули гъубшну. Душваъ асас вуди региондин яшайишдинна коммуналин мяишат 2017-2018-пи йисарин кьюрдун вахтнахьна гьязур дубхьнайивалихъди аьлакьалу месэлйир гьял гъапIнийи. 

Вахтназ вуди РД-йин тикилишчивалин, архитектурайин ва ЖКХ-йин министрин вазифйир тамам апIурайи Ибрагьим Къазибеговди мялумат тувганси, октябрин 15-пи йигълан башламиш дапIну, республикайин вари шагьрарин ва районарин яшайишдин мяна айи дараматар манишнахъди тямин апIура. «Каспийск, Къизлар, Мягьячгъала, Хасавюрт, Кьибла Сухокумск, Избербаш ва Дербент шагьрарин гизаф мертебйирин хуларизра манишан деебтна», – къайд гъапIнийи дугъу.
Вахтназ вуди РД-йин Гьюкуматдин яшайишдин инспекцияйин кIули айирин вазифйир тамам апIурайи Аьли Жабраиловди чан удучIвну улхбаъ, бязи муниципалитетар ктарди, вари республикайиъ кьюрдухьна вуйи гьязурвал пландиинди гъябгъюрайиваликан гъапну.
Чан нубатнаъ Владимир Васильевди, Мягьячгъала, Дербент, Дагъустандин Огни, Къизлар шагьрариъ яшайишдинна коммуналин мяишатариъ арайиз дуфнайи учIру месэлйир гьял апIбан бадали, аьлава вуди материалинна техникайин дакьатар тямин дапIну адруваликан гъапну. Мидланра гъайри, Дербент, Избербаш, Буйнагъск, Хасавюрт ва Мягьячгъала шагьрариъ ерлешмиш духьнайи яшайишдин аьхю мяна айи дараматар, Агъул, Бабаюрт, Дахадаев, Казбек, Къяйтагъ, Къизлар, Нугъай ва Тарумовский районарин больницйир расвалин ляхнариз ккилигура, къайд гъапIнийи дугъу.
Заседаниейиъ электро-энергияйин тяминвалихъди аьлакьалу ва сагъламвал уьбхбан улихь дийигъурайи месэлйирра гъитIиркIнийи.
Республикайин электро-энергетикайин темайикан улхури, Владимир Васильевди Каспийск ва Избербаш шагьрарин мянфяаьтлу тажрубайикан жаради къайд гъапIнийи. Думу шагьрариъ электроэнергияйин кьувват бицIи кьадарнаъдитIан харж дарапIрайи гизаф мертебйирин хулар тикмиш апIурайивализ лигну, электрикдин аквнахъан туврайи харжар 30% ис гъахьну.
Заседаниейиъ вахтназ вуди РД-йин сагъламвал уьбхбан министрин вазифйир тамам апIурайи Танка Ибрагьимовра удучIвну гъулхну. Дугъу къайд гъапIганси, ихь республика Урусатдиъ варитIан гизаф бицIидар бабкан шулайи хьуб региондикан саб ву. Мидланра гъайри, бабкан шулайи бицIидар кечмиш хьувалин улупбарра ис гъахьну. Гъи думу улупбари 7,1% тяйин апIура. «БицIидар хурайи бабарин хасиятнан хусусивалари му улупбар артухъси ис хьуз гъитра. Фицики дурар медицинайин чарасуз вуйи ахтармишар гъахуз вахтниинди гъюрадар вая ахтармишар гъахбаз къадагъа апIура», – гъапну Танка Ибрагьимовди.
Вахтназ вуди РД-йин Правительствойин председателин вазифйир тамам апIурайи Аьбдусамад Гьямидовди Дагъустандиз кIул’инди диспансеризация чарасуз лазим вуйиваликан, уьзур гъагъи гьялназ гъафигантIан, думу ачмиш шули амиди сагъ апIуз гьииди вуйиваликан гъапнийи.
Сагъламвалин цирклиан гъитIирккнайи месэлйирин натижа йивури, дугъу Мягьячгъала шагьриъ бицIидариз вуйи больницайин ва республикайин муниципалитетариъ бицIидарин поликлиникйирна дишагьлийирин консультацйирин идарйирин тикилишчивалин месэлйир тартиб апIуб табшурмиш гъапIну.

Комментарии:

f1 in1 ok1 t1 v1 y1

Top