ГлавнаяЭкономикаРякъяр кьюрдун вахтнахьна гьязур дапIна

Рякъяр кьюрдун вахтнахьна гьязур дапIна

1 1 1 1 1 1 1 1 1 1 Рейтинг 5.00 (2 Голосов)

33CopyКIури шулу, Урусатдиз кьюб бедбахтвал а – рякъяр ва ахмакь инсанар! ИкибаштIан, думу бедбахтвалар Дагъустан республикайизра хас ву. Аьхиримжи вахтна республикайин рякъяриин йигълан-йигъаз артухъ шулайи машинарин кьадарну, дурар хъаъну гъягъбан саягъну инсанар мюгьтал апIура. Фицики саспиган гьаци аьжайибди, рякъюн гьяракатнан гьич сабкьан къайда дюрюбхди машинар хъаърайи касарра рякъюру.Мицисдар «игитари» кьюрднура машинар хъаъбан къайдйир чIур апIуру. 

Мялум вуйиганси, кьюрдун вахтна асфальт улубзнайи рякъюъди машин хъапIуз гъагъиди алабхъуру. Асас вуди аяз айи вахтари, рякъяриин миркк биснайивал себеб вуди, хайлин хатIалу дюшюшарра арайиз гъюри шулу.


Гъябгъюрайи йисан республикайин рякъярин мяишат кьюрдун вазарихьна фици гьязур дубхьнаш, фицдар серенжемар гъахуз планламиш дапIнаш гьерхри, улихьнаси узу РД-йин рякъярин агентствойиз илтIикIнийза. Му идарйин пресс-гъуллугънаан туврайи мялуматариинди, кьюрдун вахт улубкьубси, республикайин рякъярин агентствойин идара апIуваликк ккайи машинар гъягъру рякъяриз лигру вари тешкилатар йишв-йигъди лихру къайдайиз илтIикIна.
Тувнайи мялуматариз асас вуди, 2017-2018-пи йисарин кьюрдун вазариъ РД-йин аьтрафариин али машинар гъягъру рякъяр кьюрдун вахтназ гьязур апIбан серенжемарин план рякъярин агентствойи тасдикьра дапIна. Тартиб дапIнайи пландин серенжемарин дахилнаъди машинар гъягъру рякъяриъ айи ичIар терг апIувал, рякъяриин миркк дибиснайи вахтназ вуди бакар хьайиз материал гъибтувал, кьюрдун вахтна рякъяриин либхру техника рас апIбан ляхнар ккудукIувал ва гьацдар жара хайлин ляхнар тамам апIувал улупна. Гъийин йигъаз республикайин муниципалитетарин арайиъ айи рякъярин кьюрдухьна гьязурлугвалин ляхнар аьхирихъна дуфна.
«Дагавтодорин» пресс-гъуллугънаан туву мялуматариинди, ноябрин аьхириз вуйи улупбар гьамцдар ву: рякъяриин миркк ебцIбан бадали алабхьру, йисаз вуди гьязур дапIнайи кьилан кьадар – 2128,0 тонна, гъумран кьадар – 1 9680,0 кубический метр ву, ва кьюрдуз вуйи дизтопливора лазим вуйи кьадарнаъди гьязур дапIна. Къайд дапIну ккундуки, гьацира аварйир гъахьи вахтназ лазим гъабхьиш кIури, аьлава вуди 350 тонна кьил гьязур дапIна.
Рякъяриин либхру техникайин гьякьнаан улхуруш, гъийин йигъаз республикайин кьюрдун вазариъ вари муниципалитетариъ айи ва кьюрдун вазарин арайиъ рякъяриин либхру техникайин кьадар сабишв`инди 270 аьдад шула. Гьадму гьисабнаан 53 – КДМ (жюрбежюр ляхнар тамам апIру машинар), 49 – автогрейдерар, 26 – погрузчикар, 98 – бульдозерар ва 45 – экскаваторар ву. Дурар вари кIан'ан кIулиз кьюрдухьна гьязур дапIна.
Мидланра гъайри, къайд дапIну ккундуки, асас вуди дагълу районариъ хатIалу дюшюшар хьуз мумкинвал айи рякъярин участокариъ рякъюн гъирагъарихъди, кьюрдун аяз айи ва рякъяриин миркк дибиснайи вахтназ лазим гъабхьиш кIури, гъумна кьил гъибикьнайи тепйир гъитна.

Комментарии:

f1 in1 ok1 t1 v1 y1

Top