ГлавнаяЭкономикаСабансана бикарваликан

Сабансана бикарваликан

1 1 1 1 1 1 1 1 1 1 Рейтинг 5.00 (1 Голос)

77pyСоветарин вахтари ихь дагълу юрднаъ жигьил хизанарин яшайиш абйир-бабарин пенсйирикан асиллу дайи. Ляхин апIуз ккуни касдиз думуган ляхин бихъуйи. Хизандихъди кючмиш духьну, Ватандин жара шагьрариъ бин ккивдариз йисарилан яшамиш шлу хулар тувуйи, ихь агьалйир жюрбежюр пIипIариъ ужуди кьабул апIуйи. «Ляхин апIуз ккуни касдиз ляхин бихъуру» кIури шулушра, улихьдин вахтари лихури гъахьи заводар, фабрикйир амдрувалихъди аьлакьалу уьмрин читинвалар гъийин вахтна Дербент шагьриъра жигьил хизанариин алахьура. Яшамиш хьуз хулар адрувализ, ляхин адрувализ лигну, дурар, чпиз ккундушра-ккундаршра, абйир-бабарихъди яшамиш шула.
Гьацира заан ва кьялан пишекарвалин образование айи шагьрин жигьилар, ляхин адрувализ лигну, Урусатдин жюрбежюр шагьрариз гъягъюз мажбур шула. Эгер улхьан йисари гъазанмиш апIуз гъягърудар жилар шуйиш, аьхиримжи вахтна дишагьлийирра гъягъюз хъюгъна. Бязи вахтари, бицIидар аьхю абйир-бабарихь гъитну, адашна дада ужуб мадар апIбахъ хъергра. Мицдар хизанариъ цIиб вахтналан веледар абйир-бабарихьан ярхла шула, дурар гележегдиъ сар-сарин гъавриъ дархьузра мумкин ву. Ав, ихь дагълу юрднан бикарваликан фукьан вушра кIура, бикIура. Азад вахт давди гьапIрайи жигьилар къанунсуз рякъяриъ ахьра. Я урхури, я лихури адру ихь агьалйир телефонариин гизаф аьшкьламиш духьнайивал дярябкъдира гъубзрадар.
Дербент шагьриъ агьалйирин бикарвал цIиб хьпан бадали фицдар серенжемар гъахураш ахтармиш апIуз ккунди, узу «Машгъулвалин Центр» тешкилатдин кIулин пишекар В.АьАьдиловайихъди гюрюшмиш гъахьунза.
Валида Аьлисултановнайи гъапиганси, гъийин йигъаз му тешкилатдин гьисабнаъ 1352 бикар кас а. Эгер сачдин гьаму вахтнахъди теври гъахьиш, 2016-пи йисан январин вазлиан декабрин вазлиз му тешкилатдин гьисабнаъ 1424 кас айи.
«Йиз фикриан, ужуб терефназди вуйи дигиш`валар РД-йин «Экономика лизи алапIувал» кIуру проектдихъди гъубху ляхнин натижйир ву. БицIи дилаварчивалиин машгъул вуйи шагьрин агьалйир налогарин гъуллугънан гьисабнаъ учIвну ва учIвра. Думу ляхин гъабхруган, шагьрин администрацияйин, налогарин инспекцияйин, къанунар уьрхру органарин пишекрарихъди сабхилди ич пишекрарра лихури гъахьну», – къайд гъапIну В.Аьдиловайи. Вушра, дугъан гафариинди, Дербент шагьриъ дарсарин кьяляхъ вуйи вахтна баяр-шубарихъди ляхин гъабхурайи кружкйирин руководителар, секцйирин тренерар, искусствойин мектебарин мялимар, экономикайиъ алахьурайи читинвалариз дилигну, гъуллугъариан адаъну. Дурар бикарвалин гьисабнаъ учIвра, анжагъ дурариз шагьриъ ляхин бихъурадар. Террорин гьяракатар айи ихь юрднаъ гьамкьан баяр-шубар дарсарин кьяляхъ давди гъюляригъ гъяйивал ужуб дарувалин ухьу вари гъавриъ ахьа.
Гьамусяаьт гьисабнаъ айидариз туврайи пособие 850 манаттIан дар. Хизан айи касдиз му фу пул вухъа? Узу Валида Аьлисултановнайихъди сюгьбат гъабхурайи вахтнара, му пишекрихьна швнур-сар бикар илтIикIнийи. Гьамусяаьт шагьриъ слесарь, автомобиль ремонт апIру слесарь, токарь пишекрар герек ву. Дурар герек вуйи тешкилат Дербентдин сакIал апIру станокарин завод ву. Думу пишек-рариз тувру маважибдин кьадар 10 агъзур ву. Гьацира ОАО «Электросигнал» тешкилатдизра инженер-электронщик, слесарь-электрик, фрезеровщик лазимди а. Мушваъра туврайи маважиб 10 агъзур ву. Гъийин вахтна мицдар пишекрар гьязур апIру образованиейин тешкилатарра амдар. Айишра, гъийин жигьилар мициб маважибдихъ лихидар. Улихьдин вахтнан заводариъ лихури гъахьидариз яшамиш шлу хулар тувру къайда гъи-йин девриз кьяляхъ дарфиш, му тешкилатариъ лихрур дихъидар.
Аьхиримжи вахтна ихь республикайиъ майиф инсанар ляхнихъди тямин апIбазра фикир тувуз хъюгъна. Шагьрин жюрбежюр тешкилатариъ дурариз ляхин тувуз чарйир зигура. Вушра, гъубшу йисахьди тевиган, ццийин натижйир цIиб ужудар вушра, гьелелиг шагьриъ бикарвал кам шуладар. Налогарин гьисабнаъ адарди лихурайи дилаварчйирра алахьура, дурари гьацира чпихъ лихурайидарихъди йикьрар йитIурадар. Йиз фикриан, «Экономика лизи алапIувал» кIуру проектдихъди гъабхурайи ляхин яваш дубхьна. Йисариинди ариш-вериш апIури мадар апIурайидари, жара ляхнариъ айидариси, налогар туври ккунду.

Комментарии:

f1 in1 ok1 t1 v1 y1

Top