ГлавнаяЭкономикаРеспубликайин экономикайин улихь ккимиди вуйи натижйир

Республикайин экономикайин улихь ккимиди вуйи натижйир

1 1 1 1 1 1 1 1 1 1 Рейтинг 5.00 (1 Голос)

Декабрин 26-пи йигъан «Дагъустан» РИА-йин конференцйир гъахру майдандиин «Ачухъ гьюкум» проектдин дахилнаъди вахтназ вуди РД-йин Правительствойин председателин заместителин ва экономикайинна аьтрафарин артмиш’валин министрин вазифйир тамам апIурайи Раюдин Юсуфов журналистарихъди гюрюшмиш гъахьну. 

Конференция гьаму йисандин ккудушу 11 вазлин натижйир йивбаз бахш дапIнайиб вуйи.
Серенежем ачмиш апIури, Раюдин Юсуфовди къайд гъапIиганси, 2018-пи йисан рес-публикайиъ яшайишдин хайлин учIру месэлйир гьял апIуз планламиш дапIна. Дугъан гафариинди, му месэлйир 2018-пи йисаз гьязур дапIнайи бюджетдин кюмекниинди гьял апIуз хьибди.
Конференцияйиъ Раюдин Юсуфовди асас вуди республикайин экономикайин артмиш’валикан ва республикайин бюджетдикан гъапнийи. Дугъу мялум гъапIиганси, цци республикайин бюджет гизаф кьяняаьтлуди ишлетмиш апIура, ва гьаму йисаз улупнайи дакьатар саки вари 100% ишлетмиш дапIну ккудукIиди.
Ццийин йисан республикайин гьясиллуваликан улхури, Раюдин Айдакьадиевичди мялум гъапIиганси, республикайин гьясиллувалин индекс – 116%-тIан артухъ ву.
Мисалназ, тикилишчивалин цирклин хъуркьуваларин кьадар – 105% вая 148 миллиард манат ву, хъа гъулан мяишатдин цирклин – 104%-123 миллиард манат удубчIвна.
«Узу зиихъ къайд гъапIганси, республикайин бюджет цци гизаф кьяняаьтлуди ишлетмиш гъапIнушра, бюджетдиз гъюру дакьатарин кьадар 32,5 миллиардихьнакьан хьибди. Дакьатар гъюру пайнаан уьмриз кечирмиш дапIну адру газран сетар адагъна.
Магьа улихьна йигъари РФ-дин Президентди Дагъустандиз, гьаму йисаз кIури, хъанара артухъ дакьатар (3,2 миллиард манат) жара гъапIну. Думу пулин кьадар, бюджетдин идарйириъ лихурайидарин 40% маважиб тувбан бадали, вари муниципалитетариз дурубкьна. Фицики, цIийи йис гъяйиз, варидариз ццийин йисандин вари кьадар маважиб вахтниинди тувну ккунду», - гъапнийи Раюдин Айдакьадиевичди.
Гьацира, гъубшу конференцияйиъ Р.Юсуфовди цци республикайиъ гъапIу ляхнариканра жикъиди ктибтнийи. Дугъан гафариинди, гьаму йисан 13 цIийи мектебар арццна ва йисандин аьхириз хъанара 10-сана мектеб ачмиш апIиди.
«Гъийин йигъаз республикайин баяр-шубар шубуб сменайиъди урхурайи 27 мектеб а. Думу вари мектебариъ кьюд йисандин арайиъ шубуб сменайиъди урхувал терг апIиди. Гьаддиз ляхнар тамам апIбаз бюджетдиан 925 миллион манат жара дапIна.
Хъа 2018-пи йисан республикайиъ 63 инвестпрограммйиризра дакьатар жара апIуз планламиш дапIна. Гьадрарикан 36 объект лап цIийидар хьиди.
Мидланра гъайри, гъюру йисан Азербайжандиъ айи Храх-Уба ва Урьян-Уба кIуру дагъустандин гъуларин месэлара гьял апIиди. Думу гъулариан вуйи 138 хизандиз ихь республикайин аьтрафариин яшайишдин хулар тувди», – гъапну министри.
Серенжем аьхирихъна гъюри, Р.Юсуфовдиз уч духьнайи журналистари суаларра тувнийи.
Дугъаз туву суаларин арайиъ Хючна гъул убхъру штухъди тямин апIуз 22 миллион манат ккунди айиваликан ва Хюрикк гъулаъ айи мектебдикан вуйи суаларра айи. Министрин гафариинди, хъайисан Хючна гъулаз шид зигуз 22 миллион манаттIан ккунди адарш, бюджет тартиб апIру вахтна гьадмура капIди. Анжагъ 22 миллионтIан дарш. Амма, дугъан гафариинди, 22 миллиондихьан ляхин тамам апIуз хьибдар.
Хъа Хюрикк гъулан мектебдин гьякьнаан кIуруш, министри туву мялуматариинди, думу гъулаъ айисдар мектебар республикайиъ 280-тIан артухъ а. Гьаддиз гьамусяаьт асас вуди гъабхурайи ляхин – мектебариъ 3 смена терг апIувал ву. Хъа Хюрикк гъулаъ айи мектеб гьациб лап читин гьялнаъ аш, 2019-пи йисан думу месэла гьял апIуз мумкинвалар агиди.
Мидланра гъайри, министри къайд гъапIганси, хъа-йисан Табасаран райондиъ Геджухдиан Дарвагъна гъюру рякъ’ин асфальт улубзуз ва ЦIуртIил гъулаъ мектеб абццуз 58 миллион манат дакьатар жара дапIна.

Комментарии:

f1 in1 ok1 t1 v1 y1

Top