ГлавнаяЭкономикаБикарвал кам апIури…

Бикарвал кам апIури…

1 1 1 1 1 1 1 1 1 1 Рейтинг 5.00 (2 Голосов)

ООО Возрождение с.ЯргильГъийин йигъаз Урусатдиъ, гьюкумат артмиш шула гъапишра, жямяаьтлугъдин гъулай яшайишдиз манигъ’вал апIурайи хайлин гьял дарапIу месэлйир гъузра.

Деврин учIру месэлйирикан улхбар гъахруган, гьарсар ватандаш сифте нубатнаъ бикарваликан улхуз хъюгъра. Гьякьра ву: улупнайи вахтназ ихь республикайин зегьметнан рынокдиъ гъизгъинвал арайиз дуфнайивал жиниб вуйинхъа?!. Хъа бикарарин жергйирин асас пай жигьилар вуйивали юкIварик лапра аьхю сикинсузвал кипра.

Дагъустандин артмиш’вализ манигъ’вал апIурайи гьарсаб месэла ахтармиш дапIну, вахтназ вуди республикайин Главайин вазифйир тамам апIурайи Владимир Васильевди, гьякьикьат дигиш апIбан бадали, аьхиримжи вахтари хайлин уьлчмйир кьабул апIура. Гьелелиг йишвариин учIруди гъубзрайи бикарвалин месэла гьял апIбан рякъюъ, мялум вуйиси, бицIи ва кьялан дилаварчивал артмиш апIбан месэлйириз аьхю дикъат тувра.
Узуз, гъуллугънан гъайгъушнар себеб вуди, кми-кмиди жямяаьтлугъдин жюрбежюр гъатарихъди гюрюшмиш хьувал алабхъуразуз. Къайд апIурза, гьелелиг Хив райондиъ агьалйир ляхнихъди тямин вуйивалин гьякьикьат, райондиъ зегьмет зигру яшнаъ айидарин кьадар аьхюб вуйивал, экономика дудубкьну адрувал, маважибарин кьадарнан бицIивализ лигну, пишекрари йишвариин айи ляхнарихьна маракьлувал улулупрайивал себеб вуди, гъагъиди гъубзра. Жигьилари гьарури чан хизан уьбхюз зегьмет зигура, зегьметнан жюрбежюр рякъяр агура, вушра…
Узу зиихъ гъапиганси, гьюкмин кIулиъ айидари бикарарин жергйир «чIикъри», йишвариин бицIи ва кьялан дилаварчивал артмиш апIбаз аьхю эгьемият тувра.
Гьадму гьисабнаан хусуси ляхин ачмиш дапIну, аьлава зегьметнан йишвар тешкил апIурайи дилаварчйириз гъулай шартIар яратмиш апIбан серенжемар кьабул апIура.
Хив райондин агьалйир ляхнихъди тямин апIру Центрин директор Аьбдулязиз Агъамирзаевди субут апIурайиганси, Дагъустандин Правительствойиъ кьабул гъапIу тялукь постановление уьмриз кечирмиш апIури, Хив райондин агьалйир ляхнихъди тямин апIру Центриъ 6-пи авгъустдилан мина гьюкуматдихьан кюмек жара апIбан бадали мялум дапIнайи конкурсдиъ иштирак хьуз ккуни хусуси дилаварчйирихьан кагъзар кьабул апIура.
– Агьалйир ляхнихъди тямин апIбан бадали, Урусатдиъ хайлин рякъяр агура. Гьадму гьисабнаан, гьамусяаьтна, ляхнин йишвар ачмиш дапIну, дилаварчивалиин машгъул вуйи касариз гьюкуматдин дережайиъди субсидйир жара апIура. КьатI’иди гъапиш, учв ктарди кьюркьан кас ляхнихъди тямин апIурайи фунур-вушра дилаварчийихьан, улупнайи ляхнин йишвар тешкил апIбаз гъушу харжар ккеркбан бадали, конкурсдиъ иштирак хьуз шулу. Субсидйирин 95% федералин дережайиъди, 5% республикайин дережайиъди жара апIура. Конкурсдин иштиракчйирихьан лазим вуйи кагъзар хьади райондин ЦЗН-диз ясана МФЦ-йиз илтIикIуз шулу.
Конкурсдин гъалибчйир «РД-йин Правительствойин 2018-пи йисан 11-пи майиъ 42-пи нумрайиккди кьабул гъапIу «2018-пи йисан Дагъустандиъ агьалйир ляхнихъди тямин апIбан бадали, аьлава уьлчмйир кьабул апIбан ва дилаварчйириз гъулай шартIар яратмиш апIбан гьякьнаан» постановлениейиз асас вуди, РД-йин артмиш’валинна зегьметнан Министерствойиъ 2018-пи йисан 9-пи июндиъ кьабул гъапIу Приказдин бинайиинди гъядягъиди.
Конкурсдин иштиракчйирихьан лазим вуйи кагъзар 20-пи августдизкьан кьабул апIура.
Текрар шулаза, гьюкуматдин терефнаан улупнайи пулин дакьатар кьюр каскьан ляхнихъди тямин апIуз гьязур вуйи дилаварчйириз жара апIуру. Ляхнин йишвар тешкил апIбаз гъушу харжар ккеркбаз варитIан заан 200 агъзур манат жара апIиди. Кюмек гъадабгъу дилаварчи 2 йисандин муддатнаъ кьюркьан бикар ляхнихъди тямин апIуз мажбур ву. Гьелбетда, дилаварчи чан зегьметкешариз маважиб, маважибдилан гьюкуматдин бюджетдиз тялукь гъазанжар жара апIбан гъайгъушнаъра духьну ккунду. Конкурсдиъ иштирак хьуз гьязур вуйи гьарсар ватандашдихъди гъаврикк ккаъбан ляхин гъабхуз ЦЗН-дин вакилар фунуб вахтнара гьязур ву,-аьлава гъапIну дугъу.
Дугъриданра, яшайишдин артмиш’валиъ, агьалйириз ляхнин йишвар ачмиш апIбан рякъюъ бицIи ва кьялан дилаварчивалин месэлйири гъийин девриъ важиблу йишв бисура. Гьюкуматдин терефнаан тялукь кюмекар жара апIбан натижайиъ, йиз фикриан, гъазанжар «сирниккан» ккадаузра кюмек апIиди. Гьюкуматдин тялукь программйири ихь дагълу гъуларра артмиш апIуз мумкинвал тувди дупну, умуд кивурхьа.

Шиклиъ: Ашага-Яракк ерли поселениейин аьтрафариин али хусуси мяишат.

Комментарии:

f1 in1 ok1 t1 v1 y1

Top