ГлавнаяЭкономикаНалогар тувну архаин йихьай!

Налогар тувну архаин йихьай!

1 1 1 1 1 1 1 1 1 1 Рейтинг 5.00 (1 Голос)

547482e0 aacb 4c78 ac90 94e251dbf1a7Августдин 28-пи йигъан Федералин налогарин гъуллугънан Дагъустан Республикайиъ айи Управлениейин кIулиъ айирин заместитель Нуруллагь Хизриев республикайин газатаринна телевидениейин журналистарихъди гюрюшмиш гъахьну.

Гюрюшдин эвелиъ налогар уч апIбан гьякьнаан вуйи видеороликар улупнийи. Хъасин, сюгьбат ккебгъри, Нуруллагь Асиповичди аьхиримжи йисари республикайиъ налогар уч апIбан ляхин ужуди гъябгъюрайиваликан гъапнийи.

Дугъан гафариинди, гъийин йигъаз республикайин жюрбежюр шей'ар (ипIру-убхъру сурсатар, бензин, газ ва гь.ж.) масу туврайи йишвариъ 9600 кассайин аппаратар дивна. Гьаму йисан 1-пи июлиз алверчивалин вари йишвариъ думу аппаратар дивну ккундийи, амма гьелелиг думу ляхин давам шули ими. Кассайин аппаратар дивбан ляхин 2019-пи йисан 1-пи июлиз аьхирихъна гъиди. Мисалназ, эгер наанкIа тукандиз душну шейъ масу гъадабгъбан кьяляхъ, тукандин кассайихъ хъайири удубчIву кьиматна чек тувундарш, дидин гьякьнаан учвхьан налогарин инспекцияйиз илтIикIуз шулу.
Мидланра гъайри, республикайин налогарин Управ-лениейин кIулиъ айирин заместители заправкйирилан ва шадлугънан серенжемар гъахру заларилан уч апIурайи налогарихъди ляхин гъабхбан гьякьнаанра мялуматар тувнийи.
Дугъан гафариинди, вахтназ вуди республикайин Главайин вазифйир тамам апIурайи Владимир Васильев улихьнаси заправкйирин эйсйирихъди гюрюшмиш хьпан кьяляхъ, республикайиъ айи 719 заправк-йирикан гъийин йигъаз 600 заправкйирин станцйирихъди онлайн жюрейиинди ляхин тешкил апIбан кассйирин аппаратар дивбан гьякьнаан йикьрар йитIна. Дурари гьаму йисан сабпи гьацIаъ бюджетдиз тувнайи налогарин кьадар сачдин улупнайи вахтнахъди тевиган, 3 ражари артухъ гъахьну. Яна сачдин йисан сабпи гьацIаъ туву налогар 36 миллион вуш, цци йисандин эвелиан июндин аьхиризкьан бюджетдиз туву налогарин уьмуми кьадар 107 миллион гъабхьну. Хъа шадлугънан серенжемар гъахру залариан налогар тувбан гьякьнаан ляхин цIиб явашди гъябгъюра. Фицики гъийин йигъаз саки вари 246 шадлугънан серенжемар гъахру залариъ, зал арендайиз гъадабгъну, пул гъадабгъбан гьякьнаан шагьидвал апIурайи кас гьелелиг адар. Яна думу заларихъди чекарин гьякьнаан ляхин гъабхуз гъагъиди алабхъура.
«Ццийин йисан сабпи гьацаъ республикайиъ айи вари 246 шадлугънан серенжемар гъахру залариан бюджетдиз дуфнайи налогарин кьадар анжагъ 20 миллион манаттIан дар. Му кьадар сачдин гьаму вахтнахъди тевиган, 3 миллион манатдинтIан артухъ гъабхьундар.
Дупну ккундуки, гьамусяаьт Дагъустандиъ 300 квадратдин метртIан артухъ йишв дибиснайи шадлугънан серенжемар гъахру залари 240 агъзур манатдиз сад йисаз вуди патент гъадабгъура. Гьаддиз думу залариз налогарин гьякьнаан фукIара пуз шулдар», – гъапнийи Нуруллагь Хизриевди.
Журналистарихъди вуйи сюгьбатнаъ Н.Хизриевди жилихъан ва айи девлетнахъан налогар тувбаканра, тикилишчивалин цирклиъ туврайи налогариканра ва республикайин базрарин гьякьнаанра хайлин мялуматар тувнийи. Серенжемдин аьхириъ дугъу республикайин агьалйирикан налогар тувну архаин хьувал ккун гъапIнийи.

Комментарии:

f1 in1 ok1 t1 v1 y1

Top