ГлавнаяЭкономикаТIумтIар уч апIбан кампания ккудубкIура

ТIумтIар уч апIбан кампания ккудубкIура

1 1 1 1 1 1 1 1 1 1 Рейтинг 5.00 (1 Голос)

3
Мялум вуйиганси, ихь республикайиъ, гьадму гьисабнаан Табасаран райондиъра, аьхиримжи йисари дурумлуди гъазанжар хурайи тIумутIчивалин циркил артмиш апIбаз аьхю фикир тувра. Дици вуйивалин гьякьнаан тIумутIчйирин ляхнин натижйири шагьидвал апIура.

Гьамусяаьт райондиъ цIийи бегьер уч апIбан кампания аьхирихъна гъюра. Ва, райадминистрацияйин гъулан мяишатдин отделин улупбариинди, натижйир харжидар дар. 24-пи сентябриз вуйи улупбариинди, Табасаран райондиъ 12988 тонна тIумтIар уч дапIна. Му улупбар, ккудубшу йисандин улупбартIан (15835 тонна) цIибди вушра, улхьан йисандин уьмуми натижйирихъди (5486 тонна) тевиган, кьюб ражаритIан артухъди ву. Цци тIумутIчйири гьарсаб гектариан кьялан гьисабниинди 127 центнер бегьер гъадабгъура.

Ич гюрюшдиъ райадминистрацияйин «Гъулан мяишатдин отдел» МБУ-йин директор Камил Гьяжиевди гъапиганси, райондиъ вари жюрейин хусусиятарин, гьадму гьисабнаан агрокомплексдин, гъулан мяишатдин кооперативарин ва нежбервалинна фермервалин мяишатарин 1377 гектар тIумтIин багълар а. ТIумутIчйири асас вуди «шардоне», «рислинг», «ркацители», «каберне-совиньон» ва жара жюрейин сортарин тIумтIар гьясил апIура. Камил Гьяжиевди къайд апIурайиганси, гъулан мяишатдин карханйири, гьацира агьалйирин кюмекнан хусуси мяишатари 2018-пи йисанра ужуб бегьер битмиш гъапIну.

Гьаци, «Виноградарь» ООО-йи чпиз айи бегьер тувру 39 гектар багълариан 24-пи сентябриз 37 гектариан 280 тонна тIумтIарин бегьер уч дапIнайи. Гьарсаб гектариан кьялан гьисабниинди 76 центнер бегьер гъадабгъну.

«Восток» КФХ-йиъ чпиз айи 8 гектар багълариан 40 тонна тIумтIар гьясил гъапIну. Гьарсаб гектариан кьялан гьисабниинди 50 центнер бегьер гъадабгъну.

«Агъасиев Г.» КФХ-йиъ чпиз айи бегьер тувру 3,5 гектар тIумтIин багълариан 160 тонна бегьер уч гъапIну.

«Гьясанов П.» КФХ-йиъ 20 гектар бегьер тувру багълар а. Душваъ, гьарсаб гектариан 70 центнер бегьер гъадабгъури, 140 тонна тIумтIар уч гъапIну.

«Нурбалаев М.» КФХ-йиъ 24-пи сентябриз 280 тонна тIумтIар гьясил дапIнайи. Кьялан гьисабниинди гьарсаб гектариан 156 центнер тIумтIар уч апIура. Гьелелиг думу мяишатдин 4 гектариъсана тIумтIарин бегьер уч апIуз имийи.

Аьбдулмалик Къурбанов ди регьбервал туврайи «Заря» КФХ-йиъ (думу мяишат райондиъ варитIан нумуналударикан гьисаб апIура) вари 47 гектар тIумтIарин багълар а, дурарикан бегьер туврайидар 20,5 гектар ву. Думу мяишатдиъ 24-пи сентябриз бегьер уч дапIну ккудубкIну ва уьмуми гьисабниинди, гьарсаб гектариан 205 центнер гъадабгъури, 421 тонна бегьер уч гъапIну.

«Агропродукт» ООО-йи чаз айи бегьер туврайи 26 гектарикан сентябрин 24-пи йигъаз 20 гектариан 195 тонн бегьер уч дапIнайи. Гьарсаб гектарилан вуйи бегьерлувал кьялан гьисабниин 98 центнер вуйи.

Камил Гьяжиевди къайд апIурайиси, райондин мяишатарин арайиъ варитIан аьхю бегьер Дербентдин ДЗИВ-дин филиал вуйи «Дарвагъ агроцехди» гьясил апIура. Думу мяишатдиз бегьер туврайи 751 гектар тIумтIин багълар а, дурарикан 450 гектариъ гъийин деврин технологйир ишлетмиш апIура. Душваъ 24-пи сентябриз 749 гектариан 9700 тоннатIан артухъ тIумтIар гьясил дапIнайи. Бегьерлувал кьялан гьисабниинди гектариан 130 центнер ву.

ДумутIанра савайи, агьал-йирин хусуси мяишатариъ тIумтIарин багълари 147 гектар йишв бисура. Хусуси мяишатариъ 1764 тонна тIумтIар гьясил ва. Гьарсаб гектариан кьялан гьисабниинди 120 центнер бегьер уч гъапIну.

Уьмуми гьисабниинди, 24-пи сентябриз Табасаран райондиъ 12988 тонна тIумтIар гьясил дапIна. Думу бегьернаан 11224 тонна гъулан мяишатдин тешкилатари, 1764 тонна агьалйирин кюмекнан хусуси мяишатари гьясил гъапIуб ву.

Къайд дапIну ккундуки, тIумтIарин бегьер уч апIбаъ райондин вари гъуларин поселенйириан рабочйир иштирак гъахьну.

– Табасаран райондин тIумутIчйири чпин гьясиллувалиъ варитIан ужубсиб тажруба ишлетмиш гъапIну, варитIан ужударсдар вахтари агротехникайин лазим вуйи серенжемар кIули гъахуз ва гьясил гъапIу бегьер вахтниинди уч апIуз чалишмиш гъахьну, – къайд гъапIнийи Камил Гьяжиевди.

Шиклиъ: «Дарвагъ агроцехдин» тIумтIин багъларигъ бегьер уч апIурайидар.

Комментарии:

f1 in1 ok1 t1 v1 y1

Top