ГлавнаяЭкономикаДевлетнахъан налогар тувуз гьяракат апIинай

Девлетнахъан налогар тувуз гьяракат апIинай

1 1 1 1 1 1 1 1 1 1 Рейтинг 5.00 (1 Голос)

444c3

Улихьна йигъари РД-йин Федералин налогарин гъуллугънан Управлениейин кIулиъ айирин заместитель Руслан Мирзамягьямедов республикайин журналистарихъди гюрюшмиш гъахьну. Гюрюш тешкил апIбан асас себеб – гъябгъюрайи йисан 1-пи декабриз мал-девлетнахъан тувну ккуни налогарин гьякьнаан мялуматарихъди таниш апIувал вуйи.

Мялум вуйиганси, аьхиримжи вахтна РД-йин Глава Владимир Васильевди налогар уч апIбаз асас фикир тувра. Думу ляхин кIули гъабхбан асас метлеб – республикайин экономика «сирниккан» ккадабгъувал ву.

Гъийин девриъ гьарсаб хал, автомобиль, жил – вари кадастровый гьисабназ гъадагъура. ИкибаштIан, дурарихъан гьарсабдихъан налогарра тувну ккунду.

Конференцияйиъ Руслан Мирзамягьямедовди мялум гъапIганси, республикайиъ мал-девлетнахъан тувну ккуни 100% налогдикан гьелелиг тувнайиб анжагъ 20%-тIан дар.

«Гьамусяаьт учу асас вуди ляхин гъабхурайи агьалйир, чпиз айи девлетнан кьадартIан артухъ налог туврача кIури, учухьна илтIикIдар ву. Ав, улихьдин йисари гьарсаб хулхъан, жилин участокдихъан, транспортдихъан тувру налог БТИ-йин гьисабариъ айи. Яна думу вахтари вари кIажарик дибикIну уьбхюрайи. Гьаму вари электрондин жюрейиз илтIибкIна. Саспи месэлйир гьял дарапIди гъузна. Яна кагъзик хулан вая жилин йишван кьадар бикIруган, тувну ккуни налогдин кьимат бикIруган, инсан гъалатI хьуб мумкин ву. Гьаддиз учу гьамусяаьт 2013-пи йисан 31-пи январиз улупнайи налогарин кьиматар ахтармиш апIурача», - къайд гъапIну Руслан Нурмягьямедовичди.

Дугъу налог тувбан гьякьнаан льготйир айи касариканра мялуматар тувнийи. Эгер жил, хал ясана автомобиль инвалид касдин ликрихъ хъаш, дицир кас налог тувбаккан азад апIура. Анжагъ 150-риинатIан гьяйвнин кьувват айи автомобилар.

Хусуси хуларин, квартирйирин гьякьнаан ва дурарихъан фици налог туврушра, мялум гъапIнийи. Мисалназ, 336,2 квадратдин метр айи хуларин кадастровый кьимат 2882255 манатдиина удубчIвураш, дид’ин илипнайи налогдин кьимат 2454 манат ву. Хъа 70,5 квадратдин метр айи квартирйирин кадастровый кьимат 1770094 манат вуш, дидхъан йисандин арайиъ тувну ккуни налогдин кьимат 254 манат ву. Налогдин му кьиматарра йислан-йисаз за шула, сабпи йисан – 0,2, кьюбпи йисан – 0,4, хъа шубубпи йисан – 0,6 коэффициент ишлетмиш апIура. Хъа 4-пи йисхъан тина, коэффициент ишлетмиш дарапIди, амма налогдин варитIан гизаф кьадар, думу 10%-тIан артухъ дубхьну ккундар, гьисабназ гъадабгъну, налог тувну ккунду.

«Гьамусяаьт агьалйириз чпиз айи девлетнахъан фукьан налог тувну ккундуш аьгъю апIуз думукьан читинди дар. Чпи хулаъ дусну имиди, налог тувузра шулу. Гъийин йигъан гьарсар касдихьан «Госуслуги» порталиъ налогарин управлениейиъ хусуси кабинет ачмиш апIуз шулу. Хусуси кабинет гъапиган, думу гьадму идарайиъ ачмиш апIурайиб дар. Думура гьарсар касди чан телефондиъ апIурайи ляхин ву. Хусуси кабинет ачмиш апIувалихъди гъушади логин анжагъ налогарин инспекцияйиантIан туврайиб дар. Гьадму ляхин тамам апIбиинди ухьхьан гьарурихьан, дишлади ухьухъ хъайи налогарикан мялумат гъадабгъну, дурар тувуз шулу. Гьаддиз узу гъи гьарсар касдикан тIалаб апIурайиб – хусуси кабинет ачмиш апIувал ва налогар тувувал вуйиз», - аьлава гъапIнийи Руслан Мирзамягьямедовди.

Ухьуз гьарсаб вахтна ужудар рякъяр, больницйир, мектебар, бицIидарин багъар ва гьацдар жара яшайишдин тикилишар ккундухьуз. Хъа гъи гьарури чаз айи девлетнахъан, убгурайи аквнахъан, газдихъан налогар тутрувкьан гагьди, ухьуз зиихъ улупнайи яшайишдин объектар шлудар дар. Гьаддиз, гъачай, вари ухьу тувну ккуни налогар тувуз чалишмиш шулхьа.

Комментарии:

f1 in1 ok1 t1 v1 y1

Top