ГлавнаяЭкономикаМяднарин девлет ачухъ апIбанди ву

Мяднарин девлет ачухъ апIбанди ву

1 1 1 1 1 1 1 1 1 1

44ы

Аьхиримжи вахтна Дагъустандин Главайи экономикайин жюрбежюр цирклар «сирниккан» ккадаъбан ляхниин гизаф зегьмет зигура. «Сирникк» гъузри гъазанж гъадабгъурайи гьацдар циркларикан садар жилиъ айи мяднар ву. Мяднари хурайи гъазанж аьгъю апIбан хусуси метлеб айи программа тартиб дапIна. Дидин гьякьнаан 6-пи ноябриъ Дагъустандин Главайин регьберваликкди кIули гъубшу совещаниейиъ РД-йин табиаьтдин девлетарин ва экологияйин министрин вазифйир тамам апIурайи Набиюла Къарачаевди мялумат тувну.

Дугъан гафариинди, гъийин йигъаз республикайин аьтрафариин жилиан табиаьтдин жюрбежюр сурсатар адагъурайи 150 карьери ляхин апIура. Мяднариан мянфяаьт кайи сурсат адабгъбан бадали, 240 лицензия тувна. Дилаварчйири гизафси гъум, гъум кайи руг, гъатху руг, гъван адабгъури шулу. Гьар йисан Дагъустандиъ 3,5 миллион манатдилан 4,5 миллион манатдиинакьан кьимат айи зиихъ ктуху сурсатар адагъуру. Гьаддихъди сабси, му бизнесдин «сирникк» ккайи пайнаканра дарпиди гъитуз шулдар.

«Учу налогарин инспекцияйин вакиларихъди сабси, вари карьерарин кIулиъ айидар уч дапIну, дурариз арайиз дуфнайи аьгьвалатнакан ктибтунча: гьякьлуди ва ачухъди ляхин гъабхуз сарира манигъ'вал апIидар. Дилаварчйири, чпи адабгъурайи сурсат улупури, налогар тувну ккунду. Месэла улихь дивна, учу думу тамам апIбанди вуча. Республикайин налогарин инспекцияйихъди йикьрар дапIну, тендер мялум гъапIунча, Краснодарин компанияйихъди йикьрар гъийитIунча. Думу компанияйи карьерар ерцбан ляхин гъабхура. ЧIатху 26 карьериъ думу ляхнар духну ккудукIну, 10 карьерин гьякьнаан налогарин гъуллугъназ материалар хътаунча. Ляхин давам шула ва гъюру йисан ккудубкIиди. Натижайиъ, 2016-пи йисхъан хъюгъну, шубуд йисандин гьисабар хьиди. Думуган мяднариан фукьан сурсат адабгънуш, фукьан тикилишчивалин хаммал гьясил гъапIнуш, фукьан налогар тувнуш, аьгъю хьибди. Эгер дилаварчийи туву улупбарин ва асиллу дару экспертарин улупбарин арайиъ тафавутлувал гъабхьиш, дилаварчи, тутрувди гъибту налог тувуз мажбур хьиди. Учу ляхнихъ кIваантIан хъюгънача», – гъапну Н.Къарачаевди.

Дугъу гьацира багахь гележегдиз вуйи асас улупбариканра гъапнийи.

Н.Къарачаев удучIвну улхбан кьяляхъ Владимир Васильевди къайд гъапIганси, му цирклиъ низам-къайда тяйин апIували гизаф дагъустанлуйирин уьмриз ужуди тясир апIиди. Дагъустандин Главайи гьацира кирпич гьясил апIру карханйирин месэлара гъитIибккнийи: «Ухьу улихьнара гъапиганси, ухьуз кирпич гьясил апIру гизаф заводар ахьуз. Думу заводарихьна гизаф суаларра айихь. Заводариъ инсанар лихру йишвар цIиб, кирпичдин кьимат за дарапIбан гьякьнаан йикьрар гъапIнийхьа. Мягьячгъалайинна Каспийск шагьрарин арайиъ 400 гектар гъатху руг айи йишв а, душваъ заводар ерлешмиш духьна. Фикир апIинай, ихь республикайиъ фукьан тикилишчивалин кьувват а! Яшамиш шлу хуларин игьитяж айидариз фукьан хулар тувуз шулу», – гъапну В.Васильевди.

Му совещаниейиъ гьацира республикайин къанунчивалин гьюкмин ляхин кIулиз адабгъру ва муниципалин органарин кIулиъ айидарра иштирак гъахьнийи.

Комментарии:

f1 in1 ok1 t1 v1 y1

Top