ГлавнаяЭкономикаРякъяр, рякъяр…

Рякъяр, рякъяр…

1 1 1 1 1 1 1 1 1 1 Рейтинг 4.67 (3 Голосов)

20

Рякъярин мюгькамвали, шаксуз, агьалйирин гъулай яшайиш ккабалгбаъ важиблу роль уйнамиш апIура. Аьхиримжи йисари Хив райондиъ рякъярин гьякьикьат ужу алапIбан, арайиз гъюрайи читин месэлйир гьял апIбан жигьатнаан хайлин натижалу серенжемар духна. Йишвариин арайиз дуфнайи гьякьикьатдинра ухьу вари шагьидар вухьа.

Хив райондин 38-пи нумрайин ДЭП-дин генеральный директор Герман Багъичевди къайд апIурайиганси, райондин рякъяриз гъуллугъ апIурайи вакилари уьмуми гьисабариинди 135 км манзилнаъ райондин аьтрафариин ерлешмиш духьнайи рякъярин аьгьвалат гюзчиваликк уьбхюра. Гьадму гьисабнаан 97 км – ерли, хъа 38 км – республикайин эгьемият айи рякъяр ву.

– Рякъ-хулин хатIасузвал уьбхбакан хайлин дюшюшариъ жямяаьтлугъ хатIасузвалра асиллу вуйивал фикирназ гъадабгъну, ич гъуллугъчйир рякъяр ужуб къайдайикк уьхбан месэлйирихьна жавабдарвалиинди янашмиш шула. Райондин рякъяр деврин тIалабариз тялукь гьялназ хпан метлебниинди райондиъ аьхиримжи вахтари хайлин тикилишчивалин ляхнар тамам апIбан мумкинвал гъабхьну.

Дупну ккундуки, ктабхъурайи йисан Хив райондиз республикайиан, айи мумкинвалар фикирназ гъадагъну, рякъ-хулин расвалин, республикайин эгьемият айи «Мамраш-Ташкапур-Аракандин гъяд» рякъюн Лика-Хирижв гъуларин сяргьятариин али рякъ’ин асфальт улубзбан харжариз дакьатар жара гъапIну.

2018-пи йисан тамам гъапIу ляхнарикан гъапиш, асас фикир айи рякъяр къайдайикк уьрхбаз тувна. Гьаци, рякъ-хулин хатIасузвал уьбхбан метлебниинди хатIа айи йицIуб йишвахь жюрбежюр мялуматар кайи щитар дивунча. Рякъюн ихтиятвал уьбхбан бадали, инсанар яягъди рякълан улдучIвуз тикмиш дапIнайи йишвариз, гъядариз ширар йивбаз дикъатлу фикир тувунча.

Сач ГъуштIил гъулаъ рякъ’ин 3 км манзилнаъ асфальт улубзнийи. Думуган гъулан асас кюче бязи йишварихь ккуруди вуйиб гьисабназ гъадабгъну, рякъ’ин асфальт улубзбан проектариз асас вуди, думу яркьу апIбан ляхнарра кIули гъухнийи. Душваъ 140 метртIан артухъ манзилнаъ рякъюкк 6 метр ягълишин ади цалар ккаънийи. Гьаму йисан учуз думу рякъюн гъирагъдихъ хатIасузвалин блокар дивру мумкинвалра гъабхьну.

Хирижв – Лика гъулариъ рякъ’ин асфальт алшра, думу дюбгъну, хатIалу гьялнаъ ади хайлин йисар вуйи. Думу республикайин эгьемият айи рякъ ву. 2018-пи йисан аьхирариъ му рякъ’ин цIийиди асфальт улубзру мумкинвал гъабхьну. Рякъяриин асфальт улубзбан проектарин тIалабариинди, душваъ Лика гъулан рякъюн саб манзилнаъ цал ккапIуб, гъуларин айитI рякъ штухьан уьбхбан уьлчмйир кьабул апIувал лазим ву. Улупнайи серенжемар багарихьди давам апIиди, – аьлава гъапIну ич сюгьбатнаъ Герман Багъичевди.

– Герман Мирзабегович, кьюрдун фаслиъ рякъярин хатIасузвал уьбхбакан фу пуз шулу?

– Кьюрдну рякъяри, гьелбетда, чпихьна артухъ фикир тIалаб апIуру. Гьелелиг гъулариъ кьюрд лап умунди кечирмиш дубхьна. Хъа яман аязар айи кьюрд улубкьбахьна учу лазим саягъниинди гьязур духьнача.

Комментарии:

f1 in1 ok1 t1 v1 y1

Top