ГлавнаяИнтервьюКиберфутболиан чемпион

Киберфутболиан чемпион

1 1 1 1 1 1 1 1 1 1 Рейтинг 5.00 (3 Голосов)

IMG 20180111 WA00222017-пи йисан декабрин аьхиримжи йигъари Москва шагьриъ киберфутболиан гранд-финалин талитар кIули гъушну. Думу талитариъ вари Урусатдин регионарин варитIан кIубан киберспортсменар иштирак гъахьну. Талитариъ 16 йис яш дубхьнайи, Мягьячгъала шагьриъ яшамиш шулайи ихь ватанагьли Хандадаш Балабеговра иштирак гъахьнийи, ва дугъу гьадму чемпионатдиъ гъалибвал гъадабгъну.

Мялум дапIну ккундуки, интерактивный футболиан вуйи му чемпионат тешкил гъапIдар Урусатдин футболин союз ва Урусатдин компьютерный спортдин Федерация вуйи.

Гьаму гьядисайихъди аьлакьалу вуди, январин 10-пи йигъан Хандадаш Балабеговдиз гаф-чIал апIуз ич редакцияйиз гъюбан теклиф дивнийча.

Сюгьбатнаъ Хандадашди мялум гъапIганси, чемпионатдиъ иштирак хьуз гъядягъювалин талитар думу учв хулаъ дусну имиди, онлайн жюрейиинди кIули гъушну. Кьюбпи туриан думу дишлади чемпионатдиъ иштирак хьуз гъядягъну.

Мидланра гъайри, Хандадаш аьдати футболиинра машгьул духьнайир ву, хъа асас вуди дугъу чан фикир киберфутболиина жалб дапIна. Киберфутболинна аьдати футболин арайиъ айи фаркьвал, Х.Балабеговдин гафа- риинди, гьаддиъ аки, аьдати футбол 90 дакьикьайиъ уйнамиш апIураш, киберфутбол апIуз улупнайи вахт анжагъ 12 дакьикьатIан дар.

«Гъийин йигъаз киберспортдиан хайлин чемпионатар духна, хъа киберфутболиан Урусатдин чемпионат гъабхури сабпи раж ву. Чемпионатдиъ гъалиб гъахьидариз тувуз кIури, 1 миллион дакьатар жара дапIнайи. Чемпионатдиъ сабпи йишван сагьиб гъахьириз 500 агъзур манат, кьюбпи йишв гъадабгъуриз – 300 агъзур манат, хъа шубубпи йишваз – 200 агъзур манат улупнайи. Му киберфутболиан чемпионатдиъ узу гъалиб гъахьунза», – гъапнийи ихь жигьили.

Багарихьди Хандадашдин «Анжи» футболин клубдихъдира йикьрар йитIуз пландик ка. Фицики сачдихъан мина «Анжи» клубдира гьаму циркил артмиш апIуз хъюгъна.

Гюрюшдиъ редакцияйин вакилари чемпиондиз туву суаларин арайиъ дугъу фуну командайихъанди футбол апIураш, гележегдиз дугъан фицдар планар аш, суалар айи.

Суалариз жаваб вуди Х.Балабеговди туву мялуматариинди, дугъу «Манчестер-Юнайтед» командайихъанди киберфутбол уйнамиш апIура, гьаму йисан апрелин вазлиъ киберфутболиан кIули гъябгъру вари дюн’яйин чемпионатдиъра иштирак хьуз планламиш дапIна.

Ихь жигьил чемпиондин абйир-бабар Хив райондин ЧIвалкк гъул’ан Дербент райондин Рубас гъулаз кюч гъахьидар ву.

Ич редакцияйин терефнаан Хандадаш Балабегов гъазанмиш дапIнайи гъалибвалихъди тебрик ва гележегдиъ дугъаз хъанара заан хъуркьувалар ккун апIурача.

Комментарии:

f1 in1 ok1 t1 v1 y1

Top