ГлавнаяКриминалНаркоманияйихьан ярхла шулхьа

Наркоманияйихьан ярхла шулхьа

1 1 1 1 1 1 1 1 1 1

13 2016-пи йисан апрелин 5-пи йигъан уьлкейин Президент В.В.Путинди адабгъу Указдиинди ФСКН хъябкьну ва думу гъуллугънан вазифйир МВД-йин ихтиярназ тувну. Наркополицияйин гизаф гъуллугъчйириз МВД-йиъ ляхин тувну, хъа бязидариз гьамусра ляхин дибихънадар.

Гъийин йигъаз милли хатIасуз-вализ къурхулувал айи тIягъвнарикан наркоманияйин месэлара сабпи йишваз удубчIвна. МВД-йин РД-йиъ айи наркоконтролин Управлениейин начальник М.Муминовди къайд гъапI-ганси, «бязидариз наркотикар миллионариинди гъазанж хуру бизнес, хъа тмундариз гъагъи асиллувал ва аьхю бала ву».

РД-йин наркоконтролин Управле-ниейи шубуб терефнан ляхин гъабхура: къанунсузди наркотикар алвер апIбахъди женг гъабхувал, ихтиярсузди наркотикар гъахбиин гюзчивал тешкил апIувал ва наркоманияйин профилактика.

Жигьилари наркотикар ишлетмиш апIувал – дагъустандин жямяаьтлугъдин варитIан учIру месэлйирикан саб ву. Наркоманарин арайиъ, яшайишдин аьгьвалатнакан, дин хъапIбакан, жилижви ясана дишагьли вуйиваликан асиллу дарди, Дагъустандин жямяаьтлугъдин вари гъатарин вакилар а. Наркоконтролин Управлениейиъ гъахурайи заседаниейиъ гьар ражари текрар апIурайиганси, наркоманияйи республикайиъ тахсиркарваларин кьадар артухъ хьпаз тясир апIура, эдеблувалин къайдйир чIюргъюра.

Гележегдин наслин сагъламвализ чIуру тясир апIура, СПИД уьзур тарабгъбаз кюмек тувра. Республикайиъ 75 проценттIан артухъ ВИЧ-инфекция кайидар наркотикар ишлетмиш апI-руган аьзарлу гъахьидар ву.

Дагъустандиъ наркоманияйихъди женг гъабхбан аьлава серенжемар гъахури ашра, республикайиъ наркотикар тарагъувал яваш шуладар, аьксина артухъ шула. Мялуматарин дакьатарра думу женгнакан мялуматар тувбиин машгъул ву.

Наркоманияйи гизаф жюре тахсиркарвалар арайиз хура. Наркотикар масу гъадагъру муштарйир ади, хъа алвер апIуз ихтияр адрували къанунсуз наркобизнес ва наркомафия артмиш апIуру. Наркотикар тарагъбахъди ва наркоманарин ляхнарихъди аьлакьалу вуйи жара тахсиркавраларра арайиз гъюру. Эгер йигъандин арайиъ наркотик гизаф лазим вуш, наркоманди фунуб тахсир дапIнура, нубатнан дозайихъ тувуз пул абгуру. Дугъан жямяаьтлугъдихъди вуйи аьлакьа дубгуру, гьаддиз думу тахсиркарвал апIуз гьарган гьязурди шулу. Наркотикар (героин) ишлетмиш апIбан аьхю тажруба айи касдиз гьар йигъан 500 манатдиинакьан наркотик лазим шулу. КIулиъ чаз доза абгбакантIан фикир адру касди думу пул наънан абгуру?

Жигьиларин арайиъ сагъу уьмур хъапIувалин ва тахсиркарвалар цIиб апIувалин гъайгъушнаъ учIвну, Дагъустан Республикайиъ айи МВД-йин наркотикар алвер апIувалин ахтармишар гъахру Управлениейин гъуллугъчйири Урусатдин Мягьячгъалайиъ айи УМВД-йин яшар бегьем духьну адрударин ляхнариз лигру инспекторарихъди, республикайин сагъламвал уьбхру министерствойин наркологияйин диспансерин нарколог-духтрарихъди, Мягьячгъалайин администрацияйин жямяаьтлугъ хатIа-сузвалин ва коррупцияйиз аькьсивал улупру Управлениейин гъуллугъчйирихъди сатIиди идарйирин арайиъ гъабхурайи, «Урусатдин бицIидар – 2017» ччвур тувнайи гьяракатнанна профилактикайин ляхниъ идарйирин арайиъ аьлакьйир уьрхбан отделин начальник, полицияйин майор Надежда Сейфудиновайи ужуб иштираквал улупура. Дугъу чав гъахру серенжемариъ къанунсузди наркотикар алвер апIбан, медицинайин метлебар ади наркотик кайи дармнар ва кIулин маълиз тясир апIру жара дармнар ишлетмиш апIбан зарарнакан, жигьилари ва йисар бегьем духьну адру бицIидари наркотикар ишлетмиш апIурайиваликан, дурар ашкар апIбакан ктибтура.

Статистикайи улупурайиганси, наркомания, аьхюдарин арайиъси, набалугъарин арайиъра яркьуди тарабгъна. Му саб ихь бала дар, вари дюн’я наркоманияйихъди женгнаъ а.

Гьаддиз набалугъди дидин тIяаьм гъадабгъайиз, дугъаз наркотикар кьабул дапIну даккниваликан мялумат ади ккунду.

Пишекрарин ахтармишари улупурайиганси, эгер жигьил касди чан 21 йис тамам хьайиз къадагъа дапIнайи наркотик ишлетмиш дарапIиш, дидихъан тина дугъу думу ишлетмиш апIур кIуру, гизаф хатIа адар.

Мектебариъ гъахру серенжемарин метлеб – республикайин гьарсар агьали чан уьмур маракьлуди, хайир кади хъапIну ккунивалин гъаврикк ккаувал ву. Спортдиин машгъул духьну, дугъри дустарихъан цIийи аьгъювалар гъадагъбиин машгъул хьувал лазим ву. Эгер юкIв хъайи ляхнихъ хъади гъахьиш, лазим дару дармнар, наркотикар адаршра, юкIв шадди уьмур хъапIуз шулу.

Комментарии:

f1 in1 ok1 t1 v1 y1

Top