ГлавнаяКриминалЯракь кьабул апIура

Яракь кьабул апIура

1 1 1 1 1 1 1 1 1 1

Оружие месячник 1Вари уьлкейин хатIасуз-валин гьякьикьат фикирназ гъадабгъиган, гъийин девриъ арайиз гъюрайи асас пай тахсиркарвалар ватандашар къанунсузди ва тялукь ихтиярарин бинайиинди яракьламиш вуйивалихъди аьлакьалу шула. Дагъустан республикайин аьтрафариин 2017-пи йисандин эвелариан къанунсузди яракь ишлетмиш апIбан ва уьбхбан гьякьнаан 981 тахсиркарвал гьисабназ гъадагъна. Му месэла Хив райондиъра гюзчиваликк уьбхбан чарасузвал а. Гьякьикьатдиъ алахьурайи дюшюшари субут апIурайиганси, хайлин ватандашари, къанунарин гъавриъ ашра, чпин хусусиятдиъ къанунсузди яракь ва тIуркIру шей’ар уьрхюра. 

Улихьнаси ЦIумада райондин Агъвали гъулаъ яшар бегьем дархьи живанарин иштирак’валиинди уйнамишар гъахру компьютерарин залиъ арайиз гъафи къурхулу гьядисайикан варидариз мялум ву. Вушра, гьяйифки, гьелелиг тялукь месэлйирихьна хайлин абйир-бабар вижнасузди янашмиш шула.
Ватандашари къанунсузди уьбхюрайи яракь чпин хушниинди тувбан ляхин тешкил апIувал айтIан ляхнарин гъуллугъназ табшурмиш дапIна. Гьаддихъди аьлакьалу вуди кIваина хурача, Кафари Кавказдин федералин округдиъ, гьадму гьисабнаан Хив райондин аьтрафариинра, айтIан ляхнарин гъуллугъчйири агьалйирихъди дурари къанунсузди уьрхюрайи яракь, тIуркIру сяняаьтар чпин хушниинди тувбаан метлеблу ляхин гъабхура. Жвуван хушниинди яракь тувруган, гьарсаб яракьдихъан тяйин дапIнайи кьадарнаъди гьякъира тувра.
Урусатдин Уголовный Ко-дексдин 222-пи маддайиъ къанунсузди яракь, тIуркIру сяняаьтар масу гъадагъбаз, алвер апIбаз, уьрхбаз, саб йишвлан жара йишв’ина гъахувализ жавабдарвал улупна. Улупнайи гьяракатарикан фунуб вушра арайиз хуз гьязур вуйи тахсиркрари къанунарин бинайиинди жавабдарвал гъабхиди. Жавабдарвал, тахсир гъапIу ватандашдин яшар 16 йис тамам гъабхьиган, улубкьуру. Тялукь тахсиркрариз 4 йисаз азадвалихъ мягьрум апIбан жаза улупна.
Дупну ккундуки, люле-йиъ резбейин кьарц айи цIайлапан, запал хъайи граната, ватандаш’валин ишлетмиш’валиан адабгънайи цIал-цIам люле али хюрчабанвалин цIайлапан, жвуван хилариинди гъапIу яракь, газдин, учIру ва рукьан яракь, цIайлапан яракьдин патронар, тIуркIру сяняаьтар, тIуркIру шей’ар жвуван хушниинди тувдар, Урусатдин УК-йин 222-пи маддайиз асас вуди, уголовный жавабдарвалихьан азад апIура. Улупнайи сиягьнаъ ватандаш’валин цIал-цIам люле али тюфенг, дидин асас паяр ва дидихъ хъивру патронар къанунсузди ишлетмиш апIбаз, дупну ккунду, Урусатдин КоАП-дин 20.8-пи маддайин 6-пи пайназ асас вуди, административ жавабдарвал улупна. Тялукь касар бицIи журум апIбиинди ккудучIвура. Анжагъ думу яракь хушниинди тувуб лазим ву. Дидланра савайи, тялукь ихтияр ади масу гъадабгъу яракьдин регистрация апIру вахт улдубчIвнаш, дидин эйсийи административ жавабдарвал гъабхуру. Вахтниинди дарапIу ляхниз Урусатдин КоАП-дин 20.11-пи маддайин бинайиинди журум улупна.
Къанунсузди яракь гьязур апIувал, цIайлапан яракь рас апIувал, тIуркIру сяняаьтар гьязур апIувал гъагъи жюрейин тахсиркарваларси гьисаб апIура. Тялукь «устадариз», къанундин бинайиинди жавабдарвал гъабхбан ижми уьлчмйир улупна. Амма, пуз ккундузуз, Урусатдин УК-йин жара маддайиз асас вуди, улупнайи тахсиркарвалин рякъюъ айи ватандашари чпин хушниинди къанун уьбхру гъуллугъчйирихьна чпин «сяняаьтар» тувиш, дурар уголовный жавабдарваликкан азад апIру мумкинвал а. ЦIайлапан яракь икI апIбан ва жарарихьан гужниинди тадабгъбан тахсиркарвал арайиз гъабхи касдиз къанундиинди 7 йис’инакьан азадвалихъ мягьрум апIбан жаза улупна.
Къайд апIурза, дестейин дахилнаъди улупнайи тахсиркарвалар арайиз гъахидариз хъанара ижми жаза улупна.
Гьюрматлу ватанагьлийир! Ихь насларин ислягь гележег ухькан гьарсарикан асиллу шула. Уьмрин гьякьикьатдиъ алахьурайи, учву шагьид шулайи тахсиркарваларихьна вижнасузди янашмиш махьанай. Къанунсузди уьбхюрайи яракь ва аьлава сяняаьтар айтIан меселйириз лигру ва къанунар уьрхбан гъаразнаъ айи гъуллугъчйирихьна лазим саягъниинди дуфну тувай. Думуган учвуз къанундиъ улупнайи гьякъира тувди, учвхьан архаинди, саб гучI’валра ктарди, уьмрин рякъ давам апIузра хьибди.

Комментарии:

f1 in1 ok1 t1 v1 y1

Top