ГлавнаяКриминалСаламатвал ухькан гьарсарикан асиллу ву

Саламатвал ухькан гьарсарикан асиллу ву

1 1 1 1 1 1 1 1 1 1 Рейтинг 5.00 (1 Голос)

specnazФунуб гьюкуматдинра артмиш’валин бина, шаксуз, хатIасузвал ву. Жямяаьтлугъдин мугъаятвал, хатIасузвал тямин апIбан метлеб ади, айтIан месэлйириз лигру гъуллугъчйири чпин ляхин жанлуди гъабхура.
Хив райондин айтIан ляхнариз лигру гъуллугънан йишвариин вари ихтиярар айи ва яшар бегьем дархьи живанарин месэлйириз лигру отделин начальник, полицияйин майор Гьяжигъурбан Юсуфовдихъди гъабхьи гюрюшдиъ дугъу Хив райондин аьтрафариин къайда ва къанун уьбхбан, хатIасузвал тямин апIбан жигьатнаан чпи гъабхурайи ляхникан кьатI’иди кIура: «Хив райондин хатIасузвал ва саламатвал уьбхбан аьгьвалат улупнайи вахтназ писуб дар. Райондин ОМВД-йин гъуллугъчйири агьалйирин хатIасузвал мюгькам, тахсиркарвалар кам апIбан гьякьнаан сикин дарди жюрбежюр серенжемар гъахура.

Саб жерге тахсиркарваларихъди женг гъабхури, къанунар уьрхбаъ, хатIасузвал яратмиш апIбаъ вари жямяаьтлугъдик сикинсузвал кипрайи экстремизмдиз ва терроризмдиз аькси ляхин гъабхбаз гьарсар касди асас фикир тувувал важиблу ву. Фицики хатIасузвал гьарсаб хъуркьувалин эвел ву».
Хив ОМВД-йин йишвариин хатIасузвал ва къайда яратмиш апIбан рякъюъ тяйин дапIнайи жавабдар касари зегьмет зигура, вушра, дарпиди гъитуз шулдар, вари уьлкейин, республикайин аьгьвалат фикирназ гъадабгъиган, улупнайи серенжемар жанлу апIуб лазим ву.
Арайиз гъафи тахсиркарвал вахтниинди гьисабназ гъадабгъну, думу ашкар апIбаъ энгелвал дарапIди кьатI’и уьлчмйир кьабул апIувалиъ асас жавабдарвал участокдин полицияйин гъуллугъчийи гъабхура. Дугъан гьаракатарикан улупнайи касдин гъуллугънаъ ва ихтиярнаъ айи гъуларин жямяаьтлугъдин хатIасузвалра асиллу шула.
– Улупнайи вахтназ Хив райондин аьтрафариин агьалйирин гъуллугънаъ ади полицияйин 8 участокдин гъуллугъчийи ва яшар бегьем дархьи живанарин месэлйириз лигру 2 инспектори ляхин апIура. Дурари йишвариин къанунар уьрхбан, тахсиркарвалариз мумкинвал тутрувбан жигьатнаан саб жерге уьлчмйир кьабул апIура.
Йисан эвелариан улупнайи муддатназ вуйи улупбариз асас вуди, участокариин айтIан меселйириз лигру гъуллугъчйири агьалйирин 102 жюрбежюр аьрзйир гьял дапIна. Сач тялукь вахтназ дурарин кьадар 122 вуйи. Гьисабназ гъадагъу тахсиркарваларикан 16 ашкар дапIна.
Ашкар гъапIу тахсиркарваларилан савайи, жюрбежюр тахсиркарвалар гъапIу 226 касдилан административ протоколар дидикIна. Гьадму гьисабнаан агьалйирин ихтиярар чIур гъапIу ва абйир-бабари чпин яшар бегьем дархьи живанарин улихь аба-бабвалин вазифйир тамам дарапIрайи 9, къанунсузди акв ва табиаьтдин газ ишлетмиш апIурайи 13, наркотик кайи сурсатар ишлетмиш апIурайи 4, рякъюн хатIасузвал чIур апIурайи 110, дилаварчивалин рякъюъ гъалатIар деетурайи 22, Урусатдин сяргьятариин ерлешмиш хьувалин къайдйир чIур апIурайи 3, яракь уьбхбан къайдйир чIур апIурайи 7 касдин гьякьнаан уьлчмйир кьабул дапIна.
ГъидикIу административ протоколарин сиягьдиан 72 тялукь гъуллугъариз хъадаънача, 15 кас административ жавабдарвалихьна духна, – аьлава гъапIну Гь.Юсуфовди.
Ав, чпиз улупнайи йишвариин гъуллугъ апIурайи вакилариз чпин гъуллугънан сяргьятариин хайлин ихтиярар а. Му ляхни дурарин жавабдарвалра за апIура. Жямяаьтлугъ хатIасузвал уьбхюри, агьалйириз къурхулувал айи саб жерге ватандашарихъди кьатI’и ляхин гъабхувалра чарасуз лазим ву. Амма, къайд апIурза, хатIасузвал уьбхбаъ жямяаьтлугъ жанлувал лазим ву.
Гьяжигъурбан Юсуфовдин гафариан мялум шулайиганси, гьамусяаьт Хив райондиъ уьмуми улупбариинди, жюрбежюр тахсиркарвалар тамам апIбаз лигну, 37 кас гьисабнаъ а. Дурарин арайиъ 11 кас пиянискйир, 2 – наркоман, 12 – хизанариъ гъалмагъал ипрудар, 4  – психика жигьатнаан иццрудар ву. Дурарилан савайи, 571 кас уьмуми сиягьдиинди гюзчиваликк кка. Дурарин арайиъ терроризмдинна экстремизмдин терефкрар, улихьди дустгъариъ гъахьидар, яракь уьбхюрайидар а.
Пуз ккундузузки, къанун уьбхру гъуллугъчйири хатIасузвал ва ислягьвал яратмиш апIбиин зегьмет зигура, амма, гьяйифки, тахсиркарваларин кьадар цIиб шуладар. Гьякьикьат фикирназ гъадабгъну, му жигьатнаан гъабхурайи ляхник гьарсар фагьумлу ватандашди чан хусуси пай кивуб лазим ву. Фицики ихь ислягь гележег, текрар шулаза, ухькан гьарсарикан асиллу ву.

Комментарии:

f1 in1 ok1 t1 v1 y1

Top