ГлавнаяКультураМашгьур шаир кIваин апIури

Машгьур шаир кIваин апIури

1 1 1 1 1 1 1 1 1 1 Рейтинг 5.00 (1 Голос)

imageГьарсаб хулаъ хусуси библиотекйир гъахьи девриан ухьу дишлади цIийи технологйирин девризди архьунхьа. Гъийин вахтна китабарихьан, газатарихьан, журналарихьан ярхла духьнайи ватанагьлийир ухьуз гизаф алахьурашра, гьелелиг поэзияйихъ юкIв хъайи инсанар гизаф ими. Дагъустандин Огни шагьрин Культурайин хулан пишекрари шагьрин агьалйир ихь дагълу культурайихьан ярхла дархьбан бадали гизаф зегьмет зигура.

Декабрин 5-пи йигъанра му культурайин Хулаъ Дагъустандин халкьдин шаир Фазу Аьлиева бабкан гъахьихъан мина 85 йис хьпаз бахш дапIнайи серенжем кIули гъубшну. Серенжемдиъ 5-пи нумрайин мектебдин багъри юрд аьгъю апIбан ляхниин машгъул вуйи музейин директор Сулейман Фатялиевди, шагьрин музейин пишекар Чимназ Мехтиевайи, урус халкьдин мяълийин «Огонёк» кIуру ансамблин кIулиъ айи Дильбер Гьяжиевайи, шагьрин мектебариъ урхурайидари ва гьацира поэзияйиин юкIв алидари иштирак'вал гъапIну.
Му серенжем ачмиш апIури, шагьрин бицIидарин библиотекайин руководитель Зоя Мягьямедовайи Фазу Гьямзатовнайин яратмиш апIбариз аьхю кьимат тувну ва учв шаирихъди фици таниш гъахьнуш, ктибтну.
Баяр-шубари ва серенжемдин иштиракчйири машгьур шаирин шиърар устадвалиинди гъурхнийи, хъа Дильбер Гьяжиевайи шаириз бахш вуди чав гъибикIу «Дагълу дишагьли» кIуру шиирра гъурхну.
Чан удучIвну улхбаъ С.Фатялиевди гьамци гъапну: «Дагъустандиз айи вартIан аьхю девлет – инсанар ву. Аьсриан аьсриз политикари, аьлимари, шаирари, писателари, спортсменари, багъбанч-йири ва гьацира жара цирклариъ зегьмет зигурайидари ихь дагълу юрд артмиш апIбаъ лайикьлу зегьмет гъизигну ва зигура. Дурарин арайиъ ухьузси варидариз таниш вуйи шаир Фазу Аьлиевара а. Республикайин литературайиъ дугъан яратмиш апIбари важиблу роль уйнамиш апIура».
Серенжем Зейнаб Гьяжиевайи устадвалиинди тамам гъапIу «Йиз Дагъустан» кIуру мяълийинди ккудубкIнийи.

Комментарии:

f1 in1 ok1 t1 v1 y1

Top