ГлавнаяКультураЦIийи спектаклиз ккилигай

ЦIийи спектаклиз ккилигай

1 1 1 1 1 1 1 1 1 1 Рейтинг 5.00 (1 Голос)

pyГьаму йигъари «Табасарандин нурар» газатдиз Гьюкуматдин табасаран драмтеатрин директор Аьлимурад Аьлимурадов хялижвди гъафну. Дупну ккундуки, театриз Аьлимурад дуфну гьеле шубуд йистIан дар, хъа учуз айи мялуматариинди, му бицIи вахтнан арайиъ душваъ ужуб терефназди вуйи хайлин дигиш'валар духьна. Редакцияйин журналистариз дугъу театрин дуланажагъдикан аьхю аьшкьниинди ктибтну. Дурарин арайиъ гъабхьи сюгьбат исихъ чап апIурача.

– Аьлимурад Асланбегович, уву гъафихъан мина ихь театриъ фицдар дигиш'валар гъахьну?
– Табасаран драмтеатрин директорди узу 2014-пи йисан майдин вазлиъ тяйин гъапIнийи. Узуз дидхъан мина духьнайи аьхю дигиш'валар рякъюрадарзуз, хъа дигиш'валарикан театрин коллективди кIура. Сабпи дигиш'вал – ухьуз кIулин режиссер хьувал ву. Учв урхури амиди Жамбулат Гьябибов ихь театриз кIулин режиссерди гъафну. Гьар йисан театриз жара театрарин режиссерариз теклиф апIурайча. Таза режиссерин ляхин, лигувал, дугъан хатI, дугъан тажруба актерарира гьисс апIуру ва дурарин сягьнайиин ролар уйнамиш апIуз бажаранвалра артухъ шулу. Къюбпи дигиш'валикан улхуруш, улихьна йисан республикайиъ театрарин «Дагъустандин ад за гъапIдар» кIуру фестиваль гъабхьнийи. Душваъ учу иштирак хьпан бадали, гьелбетда, пьеса лазим вуйи. Ухьуз я дициб пьесара, я театриз бикIрударра адайи. Учу ихь шаирарихьна, писателарихьна илтIикIунча. Фуж-вуш пьеса бикIуз хъюгъну, хъа саспидари тIубак тIубкьан гъивундар. Хъа пьесайиин дилихну, думу кIулиз адабгъур сар Эльмира АьшурбеговатIан гъахьундайи. Думу спектакль дивуз РД-йин Халкьдин Собраниейин депутат Марат Аслановди кюмек гъапIну, ва фестивалиъ ихь пьесайи 1-пи йишаз лайикь гъабхьну. Гъубшу йисан РД-йин Главайин грантдиз вуйи проект гьязур гъапIнийча. Душваз тувнайи 260 проектаригъян 33 гъядягъну, дурарин арайиъ ихь театрин проектра айи. Театрин проект «Гъала» кIуруб ву. Думу проектдин спектакль сягьнайиина адабгъбан бадали, 1 миллиондихьна пул лазим шула. «Гъала» лап аьхю пьеса ву. Душваъ йицIимиржибдихьна ролар уйнамиш апIурайи актерар, массовкайиз хайлин инсанар, спектакль дивбаъ ишлетмиш апIурайи, кьюб терефнаан вуйи декорацйир лазим вуйи. Му спектакль фунуб вушра сягьнайиин улупуз шлуб дар, анжагъ аьхю театрариътIан.
Аьхиримжи 5-6 вазлиъ гьаддиин ляхин апIурача. Гьаму жюрейин спектакль ихь театри сабпи ражари дивра. Коллективдин арайиъ сабвал дубхьна. Сабвал айишваъ фунуб вушра ляхин удукьуру. Ихь театр республикайиъ машгьур дубхьна. Дагъустандиъ гъягъру республикайин фунуб дережайин серенжемдиъра иштирак хьуз учуз теклифар гъюра, гьадму гьисабнаан РД-йин культурайин Министерствойи ич улихь диву вари месэлйир тамам апIурача. Мидланра гъайри, аьхиримжи йисари табасаран драмтеатри Урусатдин жюрбежюр шагьрариз спектаклар хьади гъягъювал аьдатнаъ абхъну. Ццийин йисан РД-йин Халкьдин Собраниейин депутат Марат Аслановди ихь театриз цIийи автобус багъиш гъапIну. Гьамрарра дигиш'валар даринхъа!?
– Уву яв улхбаъ швнуб-саб ражари ихь депутат Марат Аслановдин ччвур гъибисунва. Дугълан гъайри, театриз кюмек апIрудар айин?
– Ав, а, хъа дугъу апIру кюмекнан кьадарниинди сардира кюмек апIурадар. Кюмекар туврайидарикан вуди РД-йин Халкьдин Собраниейин депутатар Нариман Асваровра, Сефер Аьлиевра, Мягьямед Къурбановра, ихь районарин главйирра, ихь дилаварчи Айваз Рамазановра ва жара касарра улупуз шулу.
– Театрин коллективдиканра сацIибди кидибта ихь газат урхурайидариз.
– Коллективдин гьарсар кас жа-жаради гъадагъишра, вари ужуб тажруба айи, бажаранвал кайи пишекрар ву. Дурар, театрин гьарсар гъарашугъдин маракьар, сабвал уьрхюри, зегьмет зигуз чалишмиш шула. Республикайин милли театрарикан варитIан цIибди актерар айи театр табасаранаринуб ву. Ихь театриз жигьил пишекар актерар кьабул апIуз гьязур вуча. ЦIиб улихьнаси РД-йин культурайин Министерствойиъ гъабхьи коллегияйиъ театрарин кIулиъ айидарикан актерар пишекарвалин курсариз гьаувал вая пишекар актерар ляхниз кьабул апIувал ккун гъапIну. Актервал, гьаци пишекарвал гъадабгъну кIури, кIули гъабхуз шлу ляхин дар. Думу бажаранвал инсандик я кади шулу, ясана ктарди. Гьаци, художниквалин, шаирвалин, писателвалин, журналиствалин ляхнариан пишекарвал гъадабгъну кIури, эгер бажаранвал ктарш, думу тамам апIуз читинди ву.
– Ихь театрин улихь фицдар учIру месэлйир дийигъна?
– Сабпидарди театрин дарамат гъагъи гьялнаъ айивалин, жигьил пишекрар адрувалин месэлйир улупуз шулу. Хъасин ихь театр районариз, гъулариз, шагьрариз гъубшган, спектаклиз лигуз тамашчйир дяргърувалин месэла учIрударикан вуди гьисаб апIураза. Ихь халкь культурайихьан ярхла шулайивали йизси, театрин вари коллективдин кIваз тясир апIура. Узу билетар масу тувуз дархьиваликан улхурадарза. Узу, агьалйирин маракьар, гьевес за апIуз ниятар уьрхюри, хайлин вазари зегьмет гъизигу театрин коллективдин марцци кIваан улупуз гъубху спектаклихьна бязидари вижнасузвал улупурайиваликан кIураза. Ич ляхниз кьимат, гьаддиз инсанди туву мяналу критика лазим вучуз.
– Аьлимурад Асланбегович, гележегдиз театрин улихь фицдар планар диврава?
– Улубкьурайи цIийи йисан эвелариъ «Гъала» спектакль сягьнайиина адабгъурча. Драмтеатри сягьнайиин гьаммишан зарафатнан спектаклар дивруб дар. Ихь инсанар дидин гъавриъ духьну ккунду. Гьацира комедияра, бицIидариз вуйи сягьнйирра хьиди. Узуз, мумкинвал дубхьну амиди, «Табасарандин нурар» газатдиан мина мектеб ккудубкIурайи жигьиларихьиндира илтIикIуз ккундийзуз. Эгер театриъ лихуз юкIв хъайидар, гьациб бажаранвал кайидар аш, театри культурайин цирклин заан вузарик урхуз кауз кюмек апIиди.
– Чухсагъул, Аьлимурад Асланбегович, гъит яв кIваъ айи мурадар, метлебар, гележегдин планар тамам, ихь театриз хъуркьувалар ишри. ЦIийи спектализра ккилигурача.

Комментарии:

f1 in1 ok1 t1 v1 y1

Top