ГлавнаяКультураРФ-йин Конституцияйин Йигъ

РФ-йин Конституцияйин Йигъ

1 1 1 1 1 1 1 1 1 1

111111993-пи йисан декабрин 12-пи йигъан вари халкьарин сесер тувбиинди Урусатдин Федерацияйин Конституция кьабул гъапIнийи. Думу ихь уьлкейин тарихдиъ сабпи ражари вуди инсандин кьиматлувал, дугъан ихтиярар ва азадвалар кьабул, Урусатдин демократияйин къайдайин бина тяйин гъапIу цIийи Асас къанун ву.

Ккудушу йисар фукьан читиндар гъахьнушра, вахтну цIийи Конституцияйин мумкинвалар ачмиш гъапIну, ихь уьлкейиъ вари жюрейин хусусиятарин артмиш’вализ мумкинвал тувну, бюджетдин дакьатар мянфяаьтлуди ишлетмиш, экономикайин аьлакьйир яркьу, яшайишдин институтар мюгькам апIуз, агьалйирин гъуллугъар гьуркIбан ляхнариз рякъяр ачухъ гъапIну. Саб гафниинди, инсандин игьтияжариз, дурар артмиш апIбан гъуллугъариз бахш дапIнайи вари цирклар Конституцияйиъ тартиб дапIна.

 

Ухьу Конституцияйикан улхруган, гьелбетда, гележегдикан фикир апIурахьа. Конституцияйи ляхин апIбан бадали, ухьу дидин улихь ихь вазифйир тамам дапIну ккунду. Гьаци вушра, инсандин ихтиярар ва азадвалар уьрхбан месэлйир гьарган сабси кIулиз адагъуз шулдар. Яшайишдинна экономикайин артмиш’валин месэлйирра яваш-явашди гьял апIура.

Ихь республикайин хушбахтвализ ва саламат уьмур хъапIбаз гучI туврайи экстремизм ва терроризм яваш гъахьну. Деврин думу тIягънари, жямяаьтлугъдин сабвализ, республикайин артмиш’вализ чIуру тясир апIури, жигьилар чпиз айи мумкинвалар тамам апIбахьан ва уьмриъ ужудар натижйирихъ хъуркьбахьан ярхла апIури гъахьнийи.

Дагъустандиъ вахтназ вуди РД-йин Главайин вазифйир тамам апIурайи Владимир Васильев кIулиъ ади республика артмиш апIбан проектар уьмриз кечирмиш апIура. Ялгъуз гьюкуматдин органарин кьувватариинди думу метлебар тамам апIуз шлудар дар. Дурар кIулиз адагъбан бадали, вари жямяаьтлугъдин терефнаан яркьу кюмек, агьалйирин вари жюрейин гъатариъ гафнан сабвал лазим ву. Агьалйирин сабвал ва азадвал Конституцияйи мюгькам апIура.

Му машк'вар Йигъахъди аьлакьалу вуди ихь гьюрматлу агъсакъал, хайлин йисари республикайин политикайин заан гъуллугъариъ гъилиху Мягьямед ТIагьирович Юнусовди чан фикрар ачухъ гъапIну.

– Конституция – ихь гьюкуматдин Асас къанун ву. Урусатдин Конституция гьяракатнаъ ади, магьа 24 йис тамам шула. Владимир Путиндиз аьхю чухсагъул пуз ккундузуз. Дугъу гьаму Конституцияйиъ улупнайи шартIар кIулиз адагъура, ихь уьлкейи, чаина харижи уьлкйириан айи илзигувалариз дилигди, хайлин хъуркьувалар гъазанмиш дапIна. Заводар, фабрикйир ачмиш апIура, гъулан мяишатра жанлу апIуз хъюгъна. Гьадму касдин кюмекниинди гъи кьувватлу ва мюгькамвалинна сабвалин уьлке дубхьнайи Урусатдин ад вари дюн'я вуйибси тарабгъна. Ихь уьлкейиинди дамагъ апIуз шулу, – гъапну Мягьямед Юнусовди.

Ноябрин аьхирариъ вахтназ вуди РД-йин Главайин вазифйир тамам апIурайи В.Васильевдихъди гъабхьи ва республикайиъ агьалйирин ихтиярар ва азадвалар уьрхбаан гъабхурайи ляхнин месэлйириз бахш дапIнайи гюрюшдиъ. РД-йиъ инсандин ихтиярар уьр-хбаан вари ихтиярар айи вакил Уммупазиль Уьмаровайи чан удучIвну улхбаъ къайд гъапIганси, инсан, дугъан ихтиярар ва азадвал, хизан, зегьмет, хатIасузвал гьюкуматдин ва жямяаьтлугъдин варитIан заан кьиматлувал гьисаб шула. Дурар уьрхюрайи биналу къанун – Конституция ву.

Гьарсар инсанди, учв фициб гъуллугънаъ ашра, чаз айи ихтиярар гьаммишан фикриъ уьрхюри, имбудариканра гьадму ихтиярарин тIалабар тамам апIувал ккун апIури, жюрбежюр къарарар кьабул апIруган, чан ляхин Конституцияйин къанунариинди кIулиз адабгъувал важиблу ву.

Комментарии:

f1 in1 ok1 t1 v1 y1

Top