ГлавнаяКультураШаирин юбилейиз бахш вуди

Шаирин юбилейиз бахш вуди

1 1 1 1 1 1 1 1 1 1 Рейтинг 4.75 (2 Голосов)

IMG 20180906 WA00061Мялум вуйиганси, гъябгъюрайи йисан 8-пи сентябриъ Дагъустандин халкьдин шаир Расул Гьямзатов бабкан духьну 95 йис тамам гъабхьну. Вари уьлкейиз Дагъустандин ад тарабгъу машгьур шаирин юбилейиз бахш вуди, республикайин вари районариъна шагьрариъ жюрбежюр серенжемар кIули гъухну.

Гьаци, сентябрин эвелариан башламиш дапIну, Хив райондин библиотекйириъна мектебариъ Дагъустандин халкьдин шаир, таржумачи Расул Гьямзатович Гьямзатов кIваина хпаз бахш дапIнайи серенжемар кIули гъушну.

Гъулариъ йишвариин кIули гъуху гюрюшарилан, ачухъ дарсарилан савайи, юбилейиз улихьна Хив ЦБС-диъ шаирин яратмишариз бахш дапIнайи вечер кIули гъубхну. Серенжемдиъ библиотек-йирин гъуллугъчйирихъди сабси Хиварин кьялан уьмуми мектебдин 1-4-пи классариъ урхурайидари ва мялимари заан иштирак’вал улупну.

Яратмиш’валин мяракайиз уч духьнайидарихьинди илтIикIури, ЦБС-дин гъуллугъчи Румина Насруллаевайи шаирин уьмрин ва яратмиш’валин рякъкан маракьлу сюгьбат гъапIну.

– Расул Гьямзатовди Дагъустандин, вари Урусатдин литературайиъ дерин шил гъибтну. Ихь ватанагьлийин ччвур уьлкейин машгьур шаирарин ччвурарин арайиъ айивали ухьук дамагъ капIра. Шаирин яратмишар дюн’яйин хайлин чIалариз таржума дапIна. Хъа дугъан публицистикайин агъзрариинди дикIбар Урусатдиъ ва харижи уьлкйириъ чап дапIна.

Расул Гьямзатов ихь арайиан душну думукьан йисар дар. Дупну ккундуки, шаири чан аьхиримжи йигъаризкьан, жямяаьтлугъ уьмриъ натижалу уьлчмйир кьабул апIури, ватандаш’валин тереф уьбхюри, баркаллу уьмрин рякъ ккадапIну. Расул Гьямзатовди Дагъустан литературайиъ ибту ирс, дугъкан вуйи фикрар аьсрариинди марцциди уьрхюз буржлу вухьа, – гъапну дугъу.

Шаирин гьюрматназ тешкил гъапIу мяракйириъ мектебариъ урхурайидари Расул Гьямзатовдин яратмиш апIбариан хайлин шиърар кIваъланди гъурхну.

Му йигъаз ЦБС-диъ шаирин яратмишарин выставкара тешкил гъапIну.

Аьлава апIураза, тялукь серенжемар гъахувализ артмиш шулайи наслар рюгьлувалин ва ватанпервервалин гьиссариккди тербияламиш апIбан жигьатнаан дерин мяна а.

Комментарии:

f1 in1 ok1 t1 v1 y1

Top