ГлавнаяКультураХабар тув ихь дустариз…

Хабар тув ихь дустариз…

1 1 1 1 1 1 1 1 1 1 Рейтинг 0.50 (1 Голос)

DSC 3415

Гьаму йигъари Мягьячгъала шагьриъ Къумугъ театрин сягьнайиин Гьюкуматдин табасаран драмтеатри «Хабар тув ихь дустариз» спектакль улупну. Му спектакль хьади, Табасаран театр «Дагъустан адлу гъапIу шаирар» кIуру Республикайин театрарин кьюбпи фестиваль-конкурсдиъ иштирак гъабхьну. Спектакль табасаран драмтеатрин директорин заместитель, шаир Эльмира Аьшурбеговайи табасаран халкьдин адлу эскер, шаир – Ватандин Аьхю дявдин иштиракчи Багьаудин Митаровдикан гъибикIу пьесайин бинайиинди дивна.

Пьесайин тамашичйир артистари, сягьнайин сабпи дакьикьйирилан башламиш дапIну, Ватандин Аьхю дявдин гьядисйириз гъахура. Мушваъ вари ачухъди гьисс шулу: дявдин гъати женгар, кюмек адарди гъагъи зийнариан йихурайи эскрар, хаинкарвал, душманди юкьби терефарианра кьялаъ тIаънайи эскрарин ватанпервервал, мюгьюббатнан гьиссар, бабарин дердар…

Рябкъру гьялариан, автор Эльмира Аьшурбеговайи пьеса бикIурайиган гьии рякъяр гъагундар. Актерари швнуб-саб ражари пьесайин асас игитрин нивкI сягьнайиина адабгъури гъахьну. Хъа театрин режиссурайиъ нивкI вая гьиссар сягьнайиина адагъувалин жанр варитIан читин жанрси гьисаб шула. Му ихь театрин хъуркьувал ву. Актерари роль уйнамиш апIбан къайда, сягьнайин цIийивалар, дявдин эскрарин ва гъулан дишагьлийирин палат, сягьнайин образар – вари кьатI’иди улупнайи. Актерари сягьнайилан тарихи гьякьикьатдин документар – фронтдиан вуйи кагъзар, шаирин шиърар гъурхнийи. Режиссер Жамбулат Гьябибовдихьан лап гъагъи спектакль сягьнайиина адабгъуз, тарих чIиви апIуз, гьядисйир гьадму вахтнан мукьмарихъди албагуз гъабхьну. Спектаклиъ, фронтдин гъагъи гьяракатарилан гъайри, дагълу дишагьлийирин зегьметнан игитвал, дурар ислягь уьмрихъ, чпин веледар рякъюз ккундайивалихъ, гъалибвалихъ тамарзу духьнайивал улупура. Хъа жвуван велед бейхабарди дявдиъ гъудургу бабан ишал гъеебхьу  гьарсар тамашичийин улариина нивгъар гъюз гъитуйи. Спектаклин аьхириъ Багьаудиндик гюлле кубкIра, амма думу йикIурадар, думу гъира, игит эскерси, табасаран халкьдин юкIвариъ ами.

- Пьесайиз материал уч апIурайи вахтна, узу Багьаудин Митаровдин багъри гъулаз – Гъвандиккна гъушунза, дугъан хайлин багахьлуйирихъди сюгьбатар гъапIунза. Дюзди гъапиш, му пьеса бикIуб гизаф гъагъиди алабхъунзуз, фицики Багьаудин Митаровдин биографияйиъ арайиз адагъуз ихтияр адру далиларра айи. Му саб тереф. Тмуну терефнаан кIуруш, Багьаудин Митаров варидариз машгьур вуйи кас гъахьну. Дугъкан саб фу-вуш цIийиб ктабгъузра шулдайи. Яна, автори чав чакан ктабгъу я художествойин образ, ясана гьякьикьи инсан улупну ккундийи. Гьаддиз сягьнайиин дивайиз, пьесайиъ швнуб-саб ражари дигиш’валар тIауз мажбур гъахьунза,

– гъапнийи ич сюгьбатнаъ Эльмира Аьшурбеговайи.

DSC 3377

Ав, дугъриданра, спектакль гъагъиб ву. Табасаран драмайин театрин актерарихьан гьадму дявдин драма гьякьикьатдиъ тамашичйирихьна адабгъуз, дурариз дявдин сеснакан хабар тувуз гъабхьну. Дурариз чухсагъул! Му спектакль ихь театрин нубатнан заан хъуркьувал ву кIури, гьисаб апIураза.

«Дупну ккундуки, му спектакль Вариурусатдин «Саб вуйи Урусат» политикайин партияйин «БицIи Ватандин культура» кIуру проект уьмриз кечирмиш апIбан программайиинди дивнайиб ву, – кIура театрин директор Аьлимурад Аьлимурадовди. – Аьхиримжи йисари ихь театриз гьациб кюмек шула. Ва театрин руководствойинра, коллективдинра терефнаан ихь республикайин культурайин Министерствойиз учуз гьациб фикир туврайивализ аьхю чухсагъул пуз ккундузуз. Гьадму кюмек себеб вуди, театри диврайи спектаклариъ ужудар декорацйир ва костюмар шула, спектаклар дивуз учу жара театрариан режиссерариз, художникариз, хореографариз теклиф апIурача. Театрин труппайизра жюрбежю режиссерарихъди ляхин апIувал гизаф хайирлу ляхин ву. Хъана чухсагъул ихь культурайин Министерствойиз…».

Комментарии:

f1 in1 ok1 t1 v1 y1

Top