Гъалибвалин рякъ

1 1 1 1 1 1 1 1 1 1 Рейтинг 4.50 (1 Голос)

8py 1

/Яв баяр, Табасаран/

Спортдин рякъюъ жюрбежюр аднан талитариъ заан хъуркьувалар улупури, ихь уьлке вари дюн’яйиз машгьур апIувалик лайикьлу пай киву ва киврайи спортсменарин арайиъ хайлин табасаран баярра а. Дурарикан вуди Камал Ханмягьямедов, гъардшар Назим ва Багьаудин Абасовар, Мартин Сефербегов, Экпер Гьяжиэкперов, Мягьямед Халибегов ва хайлин жарадар улупуз шулу.

Гъийин йиз макьалайиъ узуз учву ихь машгьур спортсмен Мартин Сефербеговдин уьмрихъди, дугъу спортдиъ гъазанмиш гъапIу хъуркьуваларихъди таниш апIуз ккундузуз.

Мартин Сефербегов Табасаран райондин ЧвулатI гъулаъ бабкан гъахьну. Спортдиин Мартин гьеле бицIидимиди машгъул гъахьнийи. Мектеб ккудубкIну, 2001-пи йисан думу Дербент шагьриъ автошколайик, хъа сад йислан ДГПУ-йин юридический факультетдик урхуз кучIвру. Пишекарвалин образование гъадабгъувалихъди сабси, думу ихь машгьур спортсмен ва тренер Назим Абасовдихьна спортдин кчIихбарин жюрйириан аьгъювалар гъадагъуз гъушнийи.

Спортдин аьхю рякъюз Мартин 2005-пи йисан гъафну. Спортдин кчIихбариан сифте Дагъустандин, хъасин Урусатдин машгьур турнирариъ гъалибвалар гъадагъбан кьяляхъ, дугъаз харижи уьлкйириан теклифар гъюз хъюгънийи. Спортдин кчIихбариан ихь ватанагьлийи Италияйиъ (2 ражари), Вьетнамдиъ, Турцияйиъ, Эстонияйиъ ва жара уьлкйириъ заан хъуркьувалар улупну.

Табасаран райондиъ 2014-пи йисан Кьалухъ Мирзайин ччвурнахъ хъайи спортдин комплекс ачмиш гъапIнийи ва Мартин Сефербегов дидин директорди тяйин апIуру. Гьадмуган Мартин, военный гъуллугънаан удучIвну, чан цIийи ляхниин машгъул гъахьну.

Гъи Мартин Сефербегов, спорткомплексдин директорвалин вазифйир тамам апIбалан гъайри, тренер ва райондин депутатарин Собраниейин председателин заместителра ву. Тренервалин ляхинра дугъу жанлуди гъабхура. Мисалназ, Хючнаъ спортдин мектебдиъ дугъан залиъ 30-40 живанди, Дербент шагьриъ – 50 ученикди, багъри ЧвулатI гъулаъ – 40-45 жигьили спортдин кчIихбарин жюрйириан аьгъювалар гъадагъура. ЦIиб улихьнаси республикайиъ кIули гъушу хиларихьди кчIихбан спортдин талитариъ дугъахь тербия гъадабгъу живанарикан сари – 1-пи, кьюри – 2-пи ва кьюри – 3-пи йишвар гъазанмиш гъапIну. Мурариланра гъайри, дугъан ученикар Шихихлас Жамаловди ва Аьсгьяд Сефербеговди спортдин кчIихбариан вари халкьарин, вари Урусатдин жюрбежюр турнирариъ хъуркьувалар улупура.

«Гьам Дагъустандиъси, Урусатдин жюрбежюр регионариъра табасаран халкьдин дирбаш баяр яшамиш шула. Дурари, багъри ватандин тереф уьбхюри, жюрбежюр талитариъ ужудар мумкинвалар улупура. Узу йиз хиликк тербияламиш апIурайи ва гьацира миди вуйи баяр-шубарин улихь сабпи нубатнаъди мектебдиъ бинайин образованиейиъ хъуркьувалар гъадагъувал дивраза. Дицир касдиз уьмри ягъурлу рякъ улупуру. Ужудар аьгъювалар ади, спортдиъра хъуркьувалар улупурайи касариз гьаммишан гьюрматра, ужуб гележегра хьибди», – кIура Мартин Сефербеговди.

Дупну ккундуки, ду-гъан спортдин рякъра думукьан рягьятуб гъабхьундар. Талитариъ дугъан сагъламвализ гъагъи зарар хьпан швнуб-саб дюшюш гъахьнийи.

«Эстонияйиъ спортдин ММА жюрейиан 2012-пи йисан кIули гъубшу вари дюн’яйин чемпионатдиъ Румынияйин спортсмендихъди вуйи кчIихбариъ гъагъи зиян гъабхьнийзуз. Натижайиъ баллариинди узу улихь хьашра, судйири гъалибвал Румынияйин спортсмендиз тувнийи. Кьюд йислан, узу сагъ хьпан кьяляхъ, думу спортсмендиз узухъди нубатнан ражари кчIихуз дих гъапIунза. Ич арайиъ вуйи талит Москвайиъ гъабхуз йикьрар гъапIнийи. Амма талит хьуз бицIи вахт амиди дидин тешкилатчйири ич планар батIул гъапIну.

Талитарин натижайиз дилигди, учу вари спортсменарихъди дуствалин мани аьлакьйир уьрхюрача. Гьаддиз, спортдиз гъюрайи живанаризси, жигьиларизра пуз ккундузуз: спортдиъ гьаммишан гъалибвалар шлуб дар. Вари дюн’яйин варитIан машгьур спортсменарра гьадму ччвурнахъна сифте магълуб шули, амма чпин улихь дивнайи кьатI’и планарихъ, метлебарихъ хъуркьуз кадабгънайи рякълан улдудучIвди гъафну. Гъи магълуб шулу, закур – гъалиб. Спортдиз гъачай, диди ичв сагъ’вал къайдайиъ гъибт-ру, гележегдин уьмрин рякъ кьувватлу апIуру. Узуз, мисалназ, спортди гизаф кюмек гъапIунзуз», – аьлава гъапIну Мартинди.

Дугъаз ва дугъу тербияламиш апIурайи баяр-шубариз гележегдиъ хъуркьувалар ва улихь диву планар тамам хьувал ккун апIидихьа.

Шиклиъ: Мартин Сефербегов (арчлахъанди шубурпир).

Комментарии:

f1 in1 ok1 t1 v1 y1

Top