ГлавнаяЛента новостейГлавнаяЛитератураКьилзи памадрихъди уьл ккуниб вуйиз

Кьилзи памадрихъди уьл ккуниб вуйиз

1 1 1 1 1 1 1 1 1 1

7yГакIвлариз душну гъафи Муртзайиз гаш дубхьнади шулу. Гьяйван мярхликкан ккудубчну, думу аьхъиъ дебтIну, Муртза хулазди жаргъуру. Тахчайигъ ипIруб абгуру. Дугъаз ипIуз шлуб фукIара бихъурдар. Муртза чан дуст Мясумдин хулаз жаргъуру. Мясум гьяятдиъ фтиин-вуш эллешмиш духьнайи. Мурар хулаз гъягъюру. «Мясум, йиз хулаъ фужкIара адар, тахчайигъ уьлра гъибихъундарзуз, гаш дубхьназуз, ухди суфра див», – кIуру Муртзайи, чан дустран машназ умудлуди лигури.

– Гьязурди айиб штукк ккайи кьилзи памадурна уьлтIан адар, дуст. Хпири, пеъра кипну, хинкIар гьязур апIура, гьялак махьан.

– Дийигъуз шулдар, кьилзи памадрихъди уьл ипIуб лап ккуни ляхин вузуз. Аьбкъин йип хпириз памадурна уьл.

– Хпири хинкIариз галар аркIура, гьялак махьан, – хъана текрар апIуру Мясумди, Муртзайин машназ мюгьталди лигури.

– Уву вушра суфрайиин памадурна уьл див. Яв къайдайиинди штукк ккахьнайи кьилзи памадрарихъди уьл ипIуб узуз саб неззет вузуз.

Мясумди суфрайиин кьилзи памадрар айи захна уьл Муртзайин улихь дивру. Уьл дицибкънайиб вушра, аьшкьниинди чIвубкьури, кьилзи памадриз иштагьниинди кьацIар йивури, Муртза ипIуз хъюгъру.

СацIиб вахтналан суфрайиина гъубхьу пеъ ва чIилли хинкIар айи гъабар гъюру. Гьамусяаьт гъазниан адабгъну имбу, убхьбан гужну хам хъубжну гъяцIли дубхьнайи, кьамкьар заргну аьхю захаъ дабхънайи пеълилан бугъ гъюрайи. Памадрар айи зах Муртзайи чахьан тинаси хъибкIру, хинкIар айи гъаб чан улихьинди зигуру. Пеълин арчулнуб агъ кячIябгъну, думу чан улихь дивнайи гъабраъ айи хинкIарин зиин дивру.

– Муртза, гьапIрава? Кьилзи памадрихъди уьл ипIуб варитIан неззет кайи ляхин вузуз кIурайва, гьамус пеълин агънахъан гьаз хъичIихнава? – кIуру Мясумди, рази дару лигбиинди Муртзайин маш ахтармиш апIури.

– Гаш дубхьнайиган, жараб фукIара адарш, кьилзи памадрихъди уьл ипIуб, дугъриданра, неззет кайи ляхин ву. Хъа йиз улихь гъубхьу пеъ кайи хинкIар хьайиган, кьилзи памадрихъди уьл ипIрур дарза, – такабурвалиинди тIубаригъ пеълин агъ дибисну, кIуру Муртзайи ва дидиз иштагьвалиинди кьацI йивуру.

Комментарии:

f1 in1 ok1 t1 v1 y1

Top