ГлавнаяЛитератураШаирихъди гюрюш

Шаирихъди гюрюш

1 1 1 1 1 1 1 1 1 1 Рейтинг 5.00 (1 Голос)

43e

Ноябрин 6-пи йигъан Дагъустандин Огни шагьриъ айи Республикайин гьюкуматдин музейин филиалиъ шаир, «Табасарандин нурар» газатдин хусуси мухбир Шюшеханум Керимовайин яратмишариз бахш дапIнайи серенжем кIули гъубшну.

Му мяракайиз поэзияйиин юкIв али касар уч духьнайи. Дурарин арайиъ му шагьрин 7-пи нумрайин мектебдин директор Идаят Гьисинов, табасаран чIалнан мяълийирин устад Фахрудин Гюлечев, художник Сулейман Фаталиев, шагьрин 3-пи нумрайин мектебдиъ табасаран чIалнан дарсар киврайи мялим Маркизат Мурадова, дугъан классариъ урхурайи баяр-шубар, Дагъ.Огнийин культурайин Хулан директорин заместитель Индира Мукаилова ва гьацира Дербент шагьрин поэзияйин «Гьевес» кIуру клубдин иштиракчйир – шаирар Эльмира Аьшурбегова, Гъизейбат Гьяжиибрагьимова, Рягьимат ТIагьирова, Зейнаб Дербендли ва Разида Рамазанова иштирак гъахьну.

Серенжем ачмиш апIури, музейин филиалин пишекар Чимназ Мегьтиевайи уч духьнайидар шаирин уьмрихъди ва яратмиш апIбарихъди таниш гъапIну.

Шюшеханум Керимовайи чан цIийи шиърар гъурхну ва бицIидариз дибикIнайи китабдикан ктибтну. Гьацира аьхиримжи йисари Эдуард Асадовдин, Андрей Дементьевдин, Евгений Евтушенкойин, Иван Буниндин, Сергей Есениндин, Анна Ахматовайин, Марина Цветаевайин ва гьацира Дагъустандин жюрбежюр шаирарин шиърар табасаран чIалназ таржума гъапIувал тасдикь гъапIну.

Маркизат Мурадовайи чан удучIвну улхбаъ шаирихъди таниш гъахьи вахтнахъан мина дугъахъди аьлакьйир уьрхюрайиваликан, Шюшеханум Керимовайин шиърариъ инсанвалин, дуствалин къанунар уьрхбакан кIурайиваликан гъапну ва «Инсанвал» кIуру шиир гъурхну. Му мялимдин тешкиллувалиинди серенжемдиз гъафи баяр-шубарира чпиз кьабул гъахьи шиърар гъурхну.

Гьацира му йигъан Ш.Керимовайин азербайжан чIалназ таржума гъапIу шиир мяълийирин устад ва шаир Зейнаб Дербендлийи гъурхну ва уч духьнайидариз багъиш вуди чан гафариз дибикIнайи мяъли гъапIну. Идаят Гьисиновди, шаир чан гъул`ан вуйиси, багахьлура вуйиваликан гъапну ва дугъан яратмишарихъди ужуди таниш вуйиб тасдикь гъапIну.

Эльмира Аьшурбеговайира серенжемдиз уч духьнайидар шаирин яратмишарихъди таниш гъапIну ва мицдар серенжемари шаирарик гьевес капIруваликан гъапну. «Шюшеханум Керимовайи, табасаран чIалнииндиси, урус чIалнииндира бикIура. Гизаф йисари урус халкьдигъ яшамиш гъахьи шаирин урус чIалниинди бикIувалра жарадарин бикIувалихьан тафаватлу шула. Ич клубдиъ гъягъру серенжемариъ жанлуди иштирак шули, дугъу бикIуз хъюгънайидариз, кюмек лазим вуйидариз кюмекнан хил гьачIабккура ва дурар артмиш хьпак лайикьлу пай кивра», – къайд гъапIну «Гьевес» клубдин кIулиъ айири.

Гьар вахтна музейиъ гъягъру серенжемариъ иштирак шлу Сулейман Фаталиевди мицдар серенжемари дагъустан халкьар сатIи, гъийин девриъ ихь баяр-шубарин китабарихьна, шиърарихьна вуйи маракьлувал артухъ апIурайиваликан гъапну.

Гьацира шаир му йигъахъди Фахрудин Гюлечевдира тебрик гъапIну. Гъизейбат Гьяжиибрагьимовайи, Рягьимат ТIагьировайи, Разида Рамазановайи шаирин шиърар гъурхну ва мицдар серенжемари бикIрударик гьевес капIрувал тасдикь гъапIну.

Серенжемдин аьхириъ Шюшеханум Керимовайи чав табасаран чIалназ таржума гъапIу Расул Гьямзатовдин «Багъри чIал» ва Марина Цветаевайин «Йиз шиърариз, лап ухди гъидикIдариз…» кIуру шиърарра гъурхну.

Серенжем «ТIирхри луфар завуъ» кIуру шиъриинди ккудубкIну, ва шаири чан «КкудудубкIру мяъли» кIуру китаб музейиз багъиш гъапIну. Му тешкилатдин директор Наргиз Нурягьмедовайи серенжемдиъ иштирак гъахьи шаирарихъдира мицдар серенжемар тешкил апIуз учв гьязур вуйиваликан хабар тувну.

Серенжемдин аьхириъ Чимназ Залбеговнайи уч духьнайидарихъди экскурсияра кIули гъубхну.

Комментарии:

f1 in1 ok1 t1 v1 y1

Top