ГлавнаяЛитератураСугъакк мягьял

Сугъакк мягьял

1 1 1 1 1 1 1 1 1 1

Хив райондин Сугъакк мягьял,

Аьхир фициб хьибди яв гьял?

ШулкIана яв заан сагъ’вал,

Рябкъюрайиб ву аьхирвал!

Эвел Ккувигъ, Гьяригъ,УртIил,

ИчIаъ Ляхла, Кьуликк, ВертIил,

Ургъа, Ярагъ, Фурдагъ, ЗуртIил,

Заан ву Атрик, ХурсатIил.

Ву му гъулар мягьялин ад,

Адарш дурар, райондин  дад,

Дубгра гъи ихь бицIи ватан,

Гьарсар касдиз вуйиб масан.

Лап ккадабхъура му мягьял,

Кам шула кьюб советдин гьял,

Гьякимри дарапIиш фикир,

Халкьдиз шулу аьхю макур.

Рякъ-хул хъадар му мягьялихъ,

Ляхин – кар адар даллайихъ,

Бикар ву вари жигьилар,

Адарди ляхниз карханйир.

Тяжублу дубхьна Рапак сив,

Дердну абцIну му ляхникан

Фикрарикк ккабхъна Кьаркьул сив,

Арсну дерднаъ му мягьялин.

Кьаркьул сиву кIваин хура,

Рапак сивуз диди кIура,

Гъубшу девир ву багъдад,

Ляхнарик кади ужуб дад.

Колхозар – совхозар вуйи,

Мал-къарайихьди ацIнайи,

Варидариз ляхнар айи,

Гележегдик умуд кайи.

Мюгьтажнаъ ахъна жямяаьт,

Хил’ан идипна берекет.

Гъубшу девир хури кIваин,

АпIури кIваз ткисиб сирин.

Вижна кадар гьякимариз,

Гележег фициб гъабхьишра.

Думу дере ккадабхъишра,

ЮкIв убгруб адар дурариз.

Гъаразнаъ а Аьбдул МутIалиб,

Фу аьгьвалат шул мягьялин,

Адибедлан дапIну кIалиб,

Гьял барбатI ву му мягьялин.

Гъюзимбу насларин тIалаб -

Сугъаккдиин гъабхьи гьялнан

Жаваб тувдива МутIалиб,

Халкьдин арайиъ, читинвалин.

Фуж а гъи халкьдин гъаразнаъ,

Яшайишдин аьгьвалатнаъ,

Гележег уьмрин фикирнаъ,

Дурариз туврайи сабурнаъ,

Гьарай-суза апIрувалиъ,

Му дерднан жавабдарвалиъ.

Лиг уву дуст, мапIан гъирагъ,

Кумкьана увукра кубкIур,

Наслариз гъубзур саб чирагъ,

Гъюзимбу уьмриз му рубкьур.

Сугъакк мягьял, багъри ватан,

Ккундузуз духьну авадан,

Ебхьури багъри халкьдин сес,

Бахтлувалин ади нефес.

Эй, табасаранлу гьяким,

Уву махьан гъи зат сикин,

Закур хьибди кьан ва читин,

Гъайгъушнаъ гъи дархьиш гьяким!

Багъри ватан, Сугъакк мягьял,

Гьарган ибшрияв ужуб гьял,

Хъуркьриву вуз ккуни деврихъ,

Мюгьтаж дарди зат девлетнахъ. 

Комментарии:

f1 in1 ok1 t1 v1 y1

Top