ГлавнаяОбразованиеВаритIан ужур мялим

ВаритIан ужур мялим

1 1 1 1 1 1 1 1 1 1 Рейтинг 4.50 (1 Голос)

8yМягьячгъала шагьрин 8-пи нумрайин лицейдин ккергъбан классарин мялим Альбина Аюбова «2018-пи йисандин варитIан ужур мялим» конкурсдин муниципалин дережайиъ гъалиб гъахьну.

Конкурс 4 йигъандин арайиъ меркездин 13-пи нумрайин гимназияйиъ кIули гъубхнийи.
Мягьячгъала шагьрин варитIан ужурсир мялим ччвур гъадабгъбан талитариъ 33 мялим иштирак гъахьну, дурарикан 8 финализ удучIвну. Мялимари конкурсдиъ мастер-классар, абйир-бабарихъди вуйи собранйир гъухну, ачухъ дарсар кивну, мялимарин теклифар тувбиинди чпин пишекарвалин устадвалин дережа улупну.
ВаритIан ужурсир мялим тасдикь апIру жюрийин дахилнаъ образованиейинна илимдин лайикьлу деятелар, педагогвалин илмарин докторар ва кандидатар, улихьна йисари гьаму конкурсдиъ гъалиб гъахьи касар айи.
Альбина Аюбовайи конкурсдиз адагъу проектариз жюрийин вари вакилари варитIан заан баллар дивну. Дурарикан саб «Агьли касар саб вахтнара диришри» кIуруб вуйи. Думу сад йисандин ляхин дар. Му проектдиъ иштирак шулайи урхурайидар швнуд-сад йисариинди кьабидар уьрхюрайи интернатдиз кюмекназ гъягъюра.
«Альбина Агьмедбеговна ккергъбан классаринси кIул'-инди вари ич мектебдин варитIан ужудар мялимарикан сар ву. Думу учухь лихури, 6-пи йис шула. Альбина Аюбова заан аьгъюваларин пишекарвалин дережа айи, нумуналу тербия хъайи, гъарашугъарин, абйир-бабарин, ученикарин терефнаан аьхю гьюрмат айи, гьарсаб ляхнихьна вафалуди янашмиш шлу, гьарсаб серенжемдик чан пай кивру мялим ву. Дугъан хайлин ученикари республикайин, уьлкейин конкурсариъ, олимпиадйириъ заан йишвар гъадагъура. Учу дугъаз гележегдиъ республикайин дережайин конкурсдиъра хъуркьувалар ккун апIурача», – гъапну мектебдин завуч Вера Жамалудиновайи.
Дупну ккундуки, Альбина Аюбова табасаран дишагьли ву. Дугъан абйир-бабар Табасаран райондин Бургьанкент гъул'ан шагьриз кюч гъахьнийи.
«Педагогикайихьна вуйи ккунивал йиз мялимарихьан гъафунзуз. Ич тухмиъра гизаф мялимар а. БицIидарихъди ляхин апIубтIан артухъ кIваз хуш вуйи ляхин гьичра даршул. Дурар ихь гележег ву. Ухьу киву дарснакан, туву тербияйикан дурарин гележег асиллу шула», – къайд апIура Альбина Аюбовайи.
Дугъан гафариинди, фунуб ляхниъси конкурсдиъра сабвали кьувват тувру. Дугъу чаз гьаммишан кюмекназ гъюрайи 8-пи лицейдин директор З. Аьлиевайиз, завучар В. Жамалудиновайиз ва М. Гьяжимурадовайиз, мялимар Х. Гьяпизовайиз, З. Гьяжиевайиз, С. Жамалудиновайиз ва Х. Гьяжимурадовайиз чухсагъул мялум гъапIну.
Ихь ватанагьли, бажаранлу мялим Альбина Аюбовайиз конкурсдин республикайин дережайиъра заан хъуркьувалар ккун апIурхьа.

Комментарии:

f1 in1 ok1 t1 v1 y1

Top