ГлавнаяОбразованиеСабсана мектеб бинайиан рас гъапIну

Сабсана мектеб бинайиан рас гъапIну

1 1 1 1 1 1 1 1 1 1 Рейтинг 5.00 (1 Голос)

4Улихьна йигъари Табасаран райондин Ярса гъулаъ аьхю эгьемиятнан серенжем гъабхьну. Душваъ гъулан мектебдин бинайиан рас гъапIу дараматар ишлетмиш’вализ тувну. Думу йигъаз мялимар, урхурайидар, гъуландар гизаф ккилигурайи. Мектебдин йирси дараматар 1976-пи йисан тикмиш гъапIдар вуйи. Кьяляхъна йисари дидик спортзал капIнийи. Гьаддихъди аьлакьалу вуди мектебдин дараматдин цалар гъутIуркIнийи ва думу аварийный гьялназ гъафнийи. Дидхъан мина дарсар ккудубшу аьсрин 60-пи йисари дивнайи йирси сборно-щитовой мектебдиъ ва гъулан поселениейин администрацияйин дараматариъ гъахурайи. Аварийный гьялнаъ айи дараматар рас апIбаз ккилигури ва тялукь шартIар адру йишвариъ дарсар гъахури йисар гъягъюрайи.

Ккудубшу йисан мектебдиз райондин глава Алавудин Мирзабалаев гъушнийи ва мектебдин, гьадму гьисабнаан мектебдин дараматарин гьялнахъди таниш гъахьнийи ва дурар кьан дарапIди бинайиан рас дапIну ккуниваликан гъапнийи. Мектебдин дараматар бинайиан рас апIбан ляхнарра думу йисан ккергъру: асас дараматдик капIнайи тикилиш гьюдюхну, гъваъ цIийиб кивну. Имбуну асас ляхнар цци июль вазлиъ башламиш гъапIнийи. Мектебдин улдар, раккнар, пол, гъваикк йишв гьюдюхну. ДумутIанра савайи, цIийи мебелра гъабхну. Гьамус мектебдин рябкъювал асла дигиш гъабхьну, мялимариз лихуз, баяр-шубариз урхуз лазим вуйи вари шартIар яратмиш гъапIну. Ярсарин мектеб бинайиан рас апIбан кьяляхъ ишлетмиш’вализ тувбахъди аьлакьалу серенжемдиъ «Табасаран район» МР-ин глава Алавудин Мирзабалаев, вахтназ вуди райондин администрацияйин главайин вазифйир тамам апIурайи Иса Исаев, райадминистрацияйин главайин заместителар Аьбдулвагьаб Аьбдулов, Имираслан Ярялиев, райондин образованиейин управлениейин начальник Аьлиягьямед Къазиев, мектебдиъ рас апIбан ляхнар кIули гъуху тикилишдин «Бетон» ООО-йин кIулиъ айир Рамазан Рамазанов ва хъана жара касар иштирак гъахьнийи. Серенжемдиз мялимар, урхурайидар ва гъулан агьалйир уч духьнайи. Дурарин улихь удучIвну улхури, Алавудин Мирзабалаевди Ярсарин кьялан мектеб райондиъ ужударсдар мектебарикан саб вуйивал къайд гъапIнийи. Гьар йисан мектебдин выпускникар уьлкейин ужударсдар вузарик урхуз кучIвра. «Райондин образованиейин идарйириъ шартIар ужу алаувал ва образованиейин ери за апIувал – учу ич ляхниъ артухъди фикир туврайи терефарикан садар ву. Пулин дакьатарин читинвалариз дилигди, 2013-пи йислан мина учу райадминистрацияйин дакьатарихъ райондиъ 30-рихьна образованиейин идарйир бинайиан рас гъапIунча. ЦIийи алапIбан кьяляхъ ачмиш апIурайи Ярсарин кьялан мектебдин дараматра гьадрарикан саб ву. Мектебар бинайиан рас апIбан ляхин гележегдиъра давам апIидича. Умдлу вузаки, цIийи мектебдиъ мялимар хъана ужуди лихиди, хъа урхурайидари цIийи хъуркьувалар гъазанмиш апIиди», – гъапнийи Алавудин Мирзабалаевди.

Райондин главайи серенжемдиъ, гизаф йисари намуслу зегьмет зигбаз ва райондин артмиш’валик лайикьлу пай кивбаз лигну, саб жерге мялимариз Гьюрматнан грамотйир тувнийи. Тикилишдин ляхнариъ гъазанмиш гъапIу хъуркьувалариз лигну, подряддин тешкилат «Бетон» ООО-йин кIулиъ айир Рамазан Рамазановдиз райондин главайин ччвурнахъан вуйи сяаьт ва дугъан заместитель Олег Мирзахановдиз Гьюрматнан грамота тувнийи.
Мектебдин директор Аким Эскендеровди чпин гъулан мектеб бинайиан рас апIбаз, мялимариз ва урхурайидариз дициб пешкеш тувбаз райондин глава Алавудин Мирзабалаевдиз, тикилишчйириз, мектеб рас апIбаъ кюмек гъапIдариз варидариз мялимарин ва урхурайидарин терефнаан аьхю чухсагъул мялум гъапIнийи.
Хъасин райондин глава ва серенжемдин хялар мектебдин дараматариз, классариз гъилигнийи.
Шадвалин серенжемдин аьхириъ дидин иштиракчйириз урхурайидари гьязур гъапIу концерт улупнийи.

Шиклиъ: Серенжемдиз уч духьнайидар.

Комментарии:

f1 in1 ok1 t1 v1 y1

Top