ГлавнаяОбразованиеЛайикьлуди сабпи йишв гъадабгъну

Лайикьлуди сабпи йишв гъадабгъну

1 1 1 1 1 1 1 1 1 1 Рейтинг 5.00 (1 Голос)

7yКкудубшу гьяфтайи «Табасаран район» МР-иъ «Йисандин мялим – 2018» конкурсдин финалин кьюбпи этап кIули гъубшну. Дидин сабпи пай ноябрин 17-пи йигъан кIули гъубхнийи. Дупну ккундуки, «Йисандин мялим – 2018» конкурсдиъ иштирак хьуз 22 мялимди заявкйир тувнийи, хъа дурарикан дидиъ иштирак хьуз 12 кас гъядягънийи. Чпин презентация апIбан ляхнарин кьяляхъ, жюрийи конкурсдин кьюбпи пайназ хьур мялим гъядягънийи. Дурарин арайиъ райцентриъ айи «Юлдаш» ЦО-йин биологияйин дасар киврайи мялим Имарат Аьшурбегова, Къужникарин кьялан мектебдин тарихдин дарсарин мялим Зинфира Къурбанялиева, Хюрккарин кьялан мектебдин физикайин дарсарин мялим Асият Шабутаева, Хянгъярин кьялан мектебдин харижи чIаларин дарсарин мялим Загьир Мадаев ва ЧвулатI гъулан кьялан мектебдин урус чIалнан дарсарин мялим Аьлим Гюлев айи. Конкурсдин кьюбпи пайнаъ дурари чешнелу дарсар кIули духну ккундийи. Ноябрин 20-пи йигъан думу дарсар кIули гъахбан кьяляхъ, «Табасарандин йисандин мялим – 2018» конкурсдин гъалибчйирра мялум гъахьну. Гьаци, сабпи йишваз «Юлдаш» ЦО-йин биологияйин дарсарин мялим Имарат Аьшурбегова лайикь гъахьну. Кьюбпи йишв жюрийи Къужникарин кьялан мектебдин мялим Зинфира Къурбанялиевайиз ва шубубпи йишв ЧвулатI гъулан кьялан мектебдин мялим Аьлим Гюлевдиз тувну. 

«Аьдатнаъ абхънайиганси, конкурсдин кьюбпи пайнан вари иштиракчйир райондин главайин грантдиз улупидича, – гъапнийи, конкурсдин натижйир йивури, райондин образованиейин управлениейин начальник Аьлимягьямед Къазиевди. – Шаксузди, му конкурс машквартIан артухъ ву, – давам гъапIнийи дугъу. – Диди ихь образованиейин гъийин гьял рябкъюз ва ккудубшу йисхъан мина думу фици дигиш гъабхьнуш ва фуну терефнахъинди артмиш шулаш рябкъюз мумкинвал тувра. ДумутIанра савайи, думу гьарсар мялимдиз чан пишекарвалин устадвал ахтармиш апIуз айи мумкинвал ву».
– Конкурсдиъ иштирак шулайидар чпин пишейин халис устадар, ужуб тажруба, заан аьгъювалар айи мялимар вуйи, гьаддиз дурарихъди талит гъабхувал рягьят ляхин дайи, – гъапнийи ич гюрюшдиъ думу конкурсдиъ сабпи йишв гъадабгъу Имарат Аьшурбеговайи. – Хъа сабпи йишваз узу лайикь хьпиин рази вуза. Узу думу, йиз хусуси хъуркьувалси, узу лихурайи коллективдин хъуркьувалсира гьисаб апIураза. Гьаз гъапиш, мялимдин чалишмиш’валиканси, думу лихурайи коллективдиъ айи аьгьвалатнаканра, душваъ айи шартIариканра гизафуб асилли ву.
– Имарат Аьшурбегова «Юлдаш» ЦО-йиъ лихурайи ужударсдар мялимарикан сар ву, – гъапнийи узуз, образованиейин центриз гъушиган, дидин директор Элина Шихмягьямедовайи. – Думу бицIидариз аьгъювалар ва тербия тувбаъ чан вазифйирихьна яратмиш апIбан саягъниинди илтIикIура. Дугъу киврайи биология предметдиан баяр-шубари гьарган ужудар аьгъювалар улупура, олимпиадйириъ, конкурсариъ заан йишвар гъадагъура. Гьисаб апIурзаки, Имарат Аьшурбеговайи думу конкурсдиъ сабпи йишв лайикьлуди гъадабгъну.
Душваъ лихурайи жара мялимаринра гьациб фикир вуйи.
Имарат Мирзаевна Аьшурбегова Табасаран райондин центр вуйи Хючна гъулаъ 1976-пи йисан бабкан гъахьну. 1993-пи йисан дугъу Хючнаарин кьюбпи нумрайин кьялан мектеб ккудубкIуру ва Дагъустандин государствойин пединститутдин биологияйин факультетдик урхуз кучIвру. Дугъу думу институт 1998-пи йисан ккудубкIуру, ва гьадму йисан. Хючнаарин кьюпи нумрайин кьялан мектебдиъ лихуз хъюгъбиинди чан зегьметнан биографияра башламиш апIуру. Хъа 2009-пи йисан думу «Юлдаш» образованиейин центриъ ляхниъ дийигъуру. Душваъ гьамусра лихури ими.
Ляхниъ заан хъуркьувалар гъазанмиш апIбаз лигну, Имарат Аьшурбегова швнуб-сабан райондин администрацияйин главайин ва гьацира РД-йин илимдин ва образованиейин Министерствойин терефнаан Гьюрматнан грамотйириинди лишанлу дапIна.
Гьисаб апIураки, мялимдин ляхниъ заан хъуркьувалар улупувал – дугъахь урхурайи баяр-шубар предметариан вуйи олимпиадйириъ, конкурсариъ ва жара серенжемариъ иштирак хьувал ва душвариъ ужудар натижйир гъазанмиш апIувал ву. Имарат Аьшурбеговайихь урхурайидарра дугъахь киврайи предметдиан гьам райондин, гьамсана республикайин конкурсариъ ва олимпиадйириъ иштирак гъахьну ва пешкешнан йишвар гъазанмиш гъапIну. Месела, дугъан хиликк урхурайи баяр-шубари улихьнаси райондин дережайиъди кIули гъубшу «Гележегдиз гам» проектдин сяргьятариъди ахтармиш апIбан «Хулан мяишатдин шараитариъ гьюндюшкйир аьхю апIуб» ляхниан сабпи йишв гъадабгъну, республикайин дережайиъди кIули гъуху конкурсарин «Инсандин сагъ’вал ва табиаьт», «Инсандин сагъ’вализ штун ерийин тясирлувал» проектариан пешкешнан йишвар гъазанмиш гъапIну. Кьюр урхурайири улихьнаси райондин олимпиадайиъ сабпи ва шубубпи йишвар гъазанмиш гъапIну.
Бажаранлу мялимди мектебдиъра классдиъ дару жюрбежюр серенжемар гъахбаз аьхю фикир тувра. Гьаци, душваъ табиаьт, инсан яшамиш шулайи ара ахтармиш апIбаан урхурайидарин арайиъ конкурс кIули гъубшну. ДумутIанра савайи, гьар йисан жюрбежюр акцйир кIули гъахура: «Ничхрар гюрюшмиш апIинай», «УкIу патруль», «Нир марцциди уьбхидихьа», «Мектебдин аьтрафар чру апIуб» ва жарадар.
Ужур мялимди чахь урхурайи баяр-шубариз чан вахт, чаз айи аьгъювалар, чан кьувватар гьяйиф дапIну ккундар. Гьадмуган натижара шулу. Имарат Аьшурегова гьацир мялим ву.

Шиклиъ: И.М. Аьшурбегова.

Комментарии:

f1 in1 ok1 t1 v1 y1

Top