ГлавнаяОбразованиеДагъ.Огни шагьриъра «Йисандин мялим – 2018» конкурсдин натижйир гъивну

Дагъ.Огни шагьриъра «Йисандин мялим – 2018» конкурсдин натижйир гъивну

1 1 1 1 1 1 1 1 1 1 Рейтинг 5.00 (1 Голос)

20 Ноябрь вазлин 28-пи йигъан Дагъустандин Огни шагьрин 5-пи нумрайин мектебдиъ муниципалин дережайиъди кIули гъубшу Вариурсатдин «Йисандин мялим – 2018» конкурсдин натижйир йивбан серенжем гъабхьну.

Къайд дапIну ккундуки, му конкурс гьар йисан вари Урусатдиъ шубуб дережайиъди (муниципалин, республикайин ва вари Урусатдин дережа) гъябгъюрайиб ву.
Дагъустандин Огни шагьриъ муниципалин дережайиъди конкурс фици кIули гъубхнуш аьгъю апIбан бадали, учу Дагъ.Огни шагьрин образованиейин Управлениейин начальникдин заместитель Хадижат Аскендеровайихьна илтIикIунча. Дугъан гафариинди, муниципалин дережайиъди гъябгъюрайи «Йисандин мялим – 2018» конкурсдиъ, шагьрин 5-пи нумрайин кьялан мектебдин мялимар ктарди, имбуну мектебариан 7 мялимди иштираквал гъапIнийи. Гьадрарин арайиъ ихь табасаранлуйирра а: Марина Мирзоева, Дагъ.Огни шагьрин 1-пи нумрайин мектебдин ва Асият Аьлимягьямедова, 2-пи нумрайин мектебдин мялимар. Дурар кьюридра урус чIалнанна литературайин дарсар кивру мялимар ву.
«Пуз ккундузузки, гъийин йигъан мялимдин улихь дибдиан жара жюрейин вазифйир дийигъна. Яна мялимдин гъийин вазифа анжагъ бицIириз аьгъювалар улупбиинди ккудукIурадар. Гъийин девриъ мектебариъ лихурайи мялимари, гьарсар бицIириз аьгъювалар тувбахъди сабси, бицIириз айи аьхю зигьим, бицIирин бажаранвал ачухъ дапIну ккунду.
Конкурсдиъ иштирак гъахьи гьарсар мялимди чпикан вуйи презентация улупну ва гьацира «ачухъ дарс» кивну. Думу ляхин конкурсдин тIалабариинди давам дапIну ккуниб вуйи. Конкурсдиъ иштираквал гъапIу вари мялимар чпин улихь дивнайи вазифйир тамам апIуз чалишмиш гъахьнийи. Натижайиъ жюрийин вакилари, вари терефарихъанди фикир дапIну, сабпи йишв – шагьрин 3-пи нумрайин мектебдин математикайин мялим Егана Къурбановайиз, кьюбпи йишв – ихь ватанагьли, 1-пи нумрайин мектебдин урус чIалнанна литературайин дарсар киврайи Марина Мирзоевайиз тувнийи. Хъа шубубпи йишван сагьибар 2-пи нумрайин мектебдин урус чIалнанна литературайин мялим Асият Аьлимягьямедова ва 4-пи нумрайин мектебдиъ ккергъбан классариз дарсар киврайи Рягьимат Шябанова гъахьну», – къайд гъапIнийи Хадижат Аьбдуселимовнайи.
Серенжемдин аьхириъ «Йисандин мялим-2018» муниципалин дережайин конкурсдиъ иштирак гъахьи вари мялимар Дагъ.Огни шагьрин образованиейин Управлениейин дипломариинди пешкешлу гъапIну. Хъа муниципалин дережайиъди гъалиб гъахьи Егана Къурбанова региондин дережайиъди гъябгъру «Йисандин мялим – 2018» конкурсдиъра иштирак хьиди.

Комментарии:

f1 in1 ok1 t1 v1 y1

Top