ГлавнаяОбразованиеСабпи сентябриз ишлетмиш’вализ тувбанди ву

Сабпи сентябриз ишлетмиш’вализ тувбанди ву

1 1 1 1 1 1 1 1 1 1 Рейтинг 5.00 (1 Голос)

Табасаран райондин Ц1урут1ил гъулаъ диврайи ц1ийи мектебдин дараматдин рябкъюб.222Табасаран райондин администрацияйиъ цIийи урхбан йис ккебгъайиз мектебарин гьязурлугвализ аьхю фикир тувра. Гьадму месэлайихъди аьлакьалу вуди райондин глава Алавудин Мирзабалаев улихьна йигъари ЦIурутIил гъулаъ диврайи мектебдин тикилиш фици гъябгъюраш ахтармиш апIуз нубатнан ражари гъушну.

Райондин главайи думу гъулаъ диврайи мектебдин тикилиш гьарган чан гюзчиваликк гъибтна. Къайд дапIну ккундуки, ЦIурутIил гъулаъ диврайи мектеб 80 урхурайириз кIури тикмиш апIурайиб ву. Думу мектебдин тикилиш гьеле 2012-пи йисан башламиш гъапIнийи, амма пул деебтури имдруган, вари ляхнар дерккнийи. Хъа гьаму йисан вахтназ вуди РД-йин Главайин вазифйир тамам апIурайи Владимир Васильев, кюмек ккун апIури, РФ-йин Государствойин Думайиз илтIикIнийи, ва натижайиъ федералин бюджетдиан тикилишдин ляхнар аьхирихъна гъюрайи объектар ккудукIуз пул жара гъапIнийи.
Цци ихь республкайиъ цIийи урхбан йисан сабпи сентябриъ 8 цIийи мекетебди баяр-шубариз чпин раккнар арццбанди ву, гьадрарин арайиъ ЦIурутIил гъулан кьялан мектебра а.
Табасаран райондин глава Алавудин Мирзабалаевдихъди ЦIурутIил гъулаъ диврайи мектебдин объектдиина подряддин «БЕТОН» ООО компанияйин вакил Олег Мирзахановра гъафнийи. Дурар тикилишдиз, классарин ужагъариз гъилигну, рабочйирихъди гаф-чIал гъапIну ва имбу ляхнар сабпи сентябриз ккудукIуз гьяракат дапIну ккуниваликан гъапну.
Олег Мирзахановди къайд гъапIиганси, мектебдин тикилишдин вари ляхнар гьяракатниинди гъахура. Душв’ин гьамусяаьт швнуб-саб десте лихура ва гьарсаб дестейи чаз улупнайи ляхнар тамам апIура. Саб дестейи, месела, гъваъ кивра, тмуну дестейи электропроводка зигура, имбудари унчIвар, раккнар гъивра, мектебдин аьтрафар балгбан ляхнар гъахура. Гьацира душваъ мектебдин айтIан цалар катIбан, кьул ккабхьбан жара ляхнарра гъахура ва котельный дивра.
Алавудин Мирзабалаевди аьхириъ гъапнуки, урхбан корпусдин тикилишдин вари ляхнар цIийи урхбан йис ккебгъайиз ккудукIну ккунду. «Ихь асас месэла – баяр-шубар цIийи урхбан йисан цIийи партйирихъ деувал, дурари цIийи мектебдиъ урхувал вуйихь. Гьаддиз объект сабпи сентябриз ишлетмиш’вализ тувну ккунду», – гъапну райондин главайи.
Шаксузди, ЦIурутIил гъулан мектебдин мялимарин коллективди, урхурайидари ва гъулан вари агьалйири мектебдин тикилиш ккудубкIуз аьхю кюмек апIбаз вахтназ вуди Дагъустан Республикайин Главайин вазифйир тамам апIурайи Владимир Васильевдиз аьхю чухсагъул мялум апIура.

Шиклиъ: Табасаран райондин ЦIурутIил гъулаъ диврайи цIийи мектебдин дараматдин рябкъювал.

Комментарии:

f1 in1 ok1 t1 v1 y1

Top