ГлавнаяОбразованиеХатIасуз Интернет

ХатIасуз Интернет

1 1 1 1 1 1 1 1 1 1

image

Аьхиримжи йисари ихь уьмриъ убчIву Интернетди инсанарин яшайиш рягьят апIура. Улихьганси дарди, гьамусяаьт гъибикIу кагъаз, лазим вуйи документ саб секунддин арайиъ хътапIуз шула. Гьацира Интернетдин гизаф йисариинди шил дарди дургнайи инсанар агуз ва дурарин аьлакьйир мюгькам апIуз кюмек тувра.

Му цIийи технологйири бицIи манзилнаъди урхуз, ляхин апIуз, фу-вушра дубгъуз, масу тувуз ва гъадабгъуз кюмек апIура. Ухьуз мялум вуйиганси, Интернетдиъ вари лазим вуйи мялуматар агуз шулу. Мушваъ гьарсаб телефондин номерра кади адресар агуз шулу. Писателарин, шаирарин, художникарин яратмишарихъди таниш шули, чпин аьгъювалар артухъ апIрудариз ва хайир ктабгъури ишлетмиш апIрудариз Интернет ужуб савкьат ву. Интернетдиъ хурагар гьязур апIуз, ккурттар дирхуз, мурсларикан жюрбежюр шей`ар урхуз, харижи чIалар аьгъю апIуз ва гьацира жараб дубгъуз шулу.

Му рягьятваларихъди сабси, Интернетди ихь гъийин девриз гизаф харжибра хура. Гизаф сайтариъ инсафсузвал, рягьимсузвал улупру видеофильмйир ва жара миллетарихьна гьюрматсузди илтIикIуз улупура. Дупну ккундуки, ужубдин, уччвубдин реклама улупури, Интернетди инсанариз гьякьикьи уьмур гьархуз гъитра, дурар Интернетдикан асиллу шула ва мицдар касари чпин вари азад вахт жюрбежюр сайтариъ гьапIра.

Улихьна йисари гюзчивал адарди гъиту сайтарин кюмекниинди фукьан - вушра ихь ватанагьлийир къанунсуз рякъяриъ ахьну. Гьаддиз аьхиримжи вахтна Урусатдин образованиейин тешкилатариъ, баяр-шубар гъаврикк ккаъбан бадали, профилактикайин ляхниз гизаф фикир тувуз хъюгъна. Дербент райондин образованиейин тешкилатариъ мициб ляхин фици кIули гъабхураш аьгъю апIуз кIури, узу му райондин образованиейин кIулин пишекар Диана Гьяжиевайихъди гюрюшмиш гъахьунза.

Диана Агъасиевнайин гафариинди, райондин образованиейин вари тешкилатариъ октябрин вазлин 30-пи йигъан Интернетдин хатIасузвализ бахш дапIнайи Саб вуйи дарс кIули гъубшну. Му серенжемдин асас метлеб – баяр-шубариз айи аьгъювалар артухъ апIувал, Интернет хатIасузди ишлетмиш апIуз улупувал, абйир-бабаринна мялимарин думу хатIасузвалихьна фикир жалб апIувал вуйи. Мектебариъ кIули гъушу дарсариъ ва классдин сяътариъ баяр-шубари хатIасузди Интернет ишлетмиш апIуз, гьякьлу ва гьякьсуз мялуматар жара апIуз гъудубгъну. Урхурайидар «вирусар», «лутивалин кагъзар», «sms-лутивал» кIуру темйирихъдира таниш гъапIну.

Д.А.Гьяжиевайи тасдикь гъапIганси, баяр-шубар жавабдарвалиинди ва хатIасузди вуйи Интернетдин къайдйирихъди таниш гъахьибси, социалин сетариъ аьлакьйир айи инсанарихьинди эдеблуди илтIикIну ккунивалин гъавриъ тIаъну. Гьарсар бализна шураз му серенжемариъ Интернетдин хатIасуз къайдйирихъди таниш апIру кIваина хпан дафтрар тувну.

Образованиейин тешкилатариъ ляхин гъабхурайиганси, гьарсаб хизандиъра чпин баяр-шубарин Интернетдин сетариъ шлихъди аьлакьйир аш, дурар фтиина маракьлу вуш ахтармиш апIури, дурар гьар вахтна гюзчиваликк гъитну ккуниб кIваинди гъибтну ккунду. Бязи хизанариъ бицIи яшнан баяр-шубар, сикинди деъру кIури, сяътариинди Интернетдиъ артмиш дарапIру тамширихъ гъитра. Гизаф вахтна компьютерихъ деъруган, дурарин уларин акв кьит шлуб, дурар чпиз лазим дару сайтариъ учIвруб, харжи терефназди дигиш шлуб гьархну ккундар.

Комментарии:

f1 in1 ok1 t1 v1 y1

Top