ГлавнаяОбществоЦIийи китаб Арфлин рякъ

ЦIийи китаб Арфлин рякъ

1 1 1 1 1 1 1 1 1 1 Рейтинг 4.75 (2 Голосов)

Улихьна йигъари Дагъустандин писателарин Союздиъ ихь ватанагьли, шаир, писатель, РФ-йин культурайин лайикьлу гъуллугъчи, РФ-йин писателарин Союздин член Шагьвелед Шагьмардановдин урус чIалниинди чапдиан удубчIвнайи «Арфлин рякъ» кIуру цIийи китабдин презентация гъабхьну.

Думу серенжемдиъ республикайин хайлин машгьур шаирар, писателар, таржумачйир, СМИ-йин вакилар, ДГПУ-йин милли чIалар кивру мялимар, аьлимар, студентар иштирак гъахьну.

Серенжем РД-йин писателарин Союздин правлениейин председатель М.Аьгьмедовди ачмиш гъапIну. Дугъу, цIийи китаб чапдиан удучIвбахъди аьлакьалу вуди, Ш.Шагьмардановдиз тебрикнан гафар гъапнийи ва урус чIалниинди чапдиан китаб адабгъувал, милли литературайинси, кIул’инди дагъустандин литературайин хъуркьувал ву, кIури, къайд гъапIну.

Мягьямед Аьгьмедовди авторин устадвал, бажаранвал жаради къайд гъапIнийи ва дугъан эсерарин асас игитарикан ктибтнийи.
«Ш.Шагьмардановди чан гьарсаб яратмиш апIбаъ гьаму деврин гъагъи месэлйир гъитIирккура. «Арфлин рякъ» китаб сад-кьюд йигъандин ляхнин натижа дар. Му китабдиин автори хайлин йисари ляхин гъапIну. Китабдиъ айи яратмишарин арайиъ повесть, махъв, новелла, ихтилатар а. Дурарикан хайлиндар дагъустандин милли чIалариз таржума дапIна. Чан эсерарин игитариъ дугъу табасаран халкьдин марцци юкIв, марцци гьиссар аьдати, философияйин, фагьумлу чIалниинди улупура»,– гъапну Мягьямед Аьгьмедовди.
Шагьвелед Шагьмардановдин яратмишариз бахш дапIнайи доклад хьади филологияйин илмарин доктор Сабрина Шихялиева удучIвну гъулхну. Авторин яратмишарин образар лап маракьлудар, жюрбежюр рангариинди тафавутлу шулайидар эсер урхурайидариз тясир апIрудар ву.
Ш.Шагьмардановдин мяналу эсерарикан гаф кIури, удучIвну гъулхдарин арайиъ писателар, таржумачйир Г.Ильясова, Вл.Носов, М.Аьгьмедова, Гь.Гьясанов, Аь.Аьдилов, С.Кюребего-ва ва хайлин жарадар айи. Варидари авториз чан милли фольклорин, аьдатарин, халкьдин, тухумдин гьякьнаан дерин аьгъювалар айиб эсерариан мялум шулайивал субут гъапIнийи. Хайлиндари дугъан 1979-пи йисан чапдиан удубчIву сабпи китаб «Чархачи», хъасин кьандиси удубчIву «Йигъ ва йишв», «Жихрин гьар», «Чюнгюр» ва жарадарра кIваин гъапIнийи.
Ш.Шагьмардановдин цIийиди удубчIвнайи «Арфлин рякъ» китабдиз дугъан хайлин йисарин яратмишарикан варитIан ужударстар ва цIийи эсерар гъварч дапIна. Думу китаб табасарандин машгьур прозаик, шаир ва таржумачи Шагьвелед Ибрагьимовичдин бабкан духьну 65-йис тамам хьпан юбилейихъди аьлакьалу гъапIну.

Комментарии:

f1 in1 ok1 t1 v1 y1

Top