ГлавнаяОбществоЖямяаьтлугъдиз важиблу гъуллугъ

Жямяаьтлугъдиз важиблу гъуллугъ

1 1 1 1 1 1 1 1 1 1 Рейтинг 5.00 (1 Голос)

530 CopyМялуматарин технологйирин девриъ СМИ хабрар тувбан асас дакьат ву. Хъа жюрбежюр мялуматарин гьякьлувал, деринвал гьадму мялуматар гьязур апIурайи журналистарикан асиллу ву. Ужур журналист фунуб газатдизра, телевидениейизра чарасуз лазим ву. Дугъан улихь газат урхрудариз, телевизориз лигурайидариз гьякьлу мялуматар гьязур апIбан месэла дийибгъна. КучIларин дюшюшариинди журналистдиз чан макьала, мялумат уткан апIуз ихтияр адар. Дугъу чав туврайи мялуматдихъан къанундиинди жавабдарвал гъабхура. КучIлин хабрари агьалйириз, жямяаьтлугъдиз аьхю зарарар тувуб мумкин ву. Гьаддиз СМИ-йин ляхниъ гьякьлувал чарасуз ву. Журналистикайиз юкьубпи гьюкум ву, кIури шулу, гьаддиз СМИ-йиъ думу пишейиз вафалу, гъудуркьу инсанар дилихну ккунду. 

Январин 13-пи йигъан Урусатдиъ СМИ-йин гъуллугъчйири, полиграфияйин карханйирин пишекрари, журналистари чпин пишекарвалин машквар – Урусатдин чап апIбан Йигъ къайд апIуру. Му йигъан 1703-пи йисан Урусатдиъ Петр I указдиинди Урусатдин «Ведомости» газатдин сабпи нумра чапдиан удубчIвну.
Дидхъан мина гизаф йисар, аьсрар гъушну. Урусатдиъ ХХI аьсриъ чапдиан удучIвурайи газатарин-журналарин, электрондин жюрейиинди удучIвурайи газатар-журналарин кьадарра лап аьхюб дубхьна.
Дагъустандиъ милли чIалариинди газатар, журналар, теле-радио передачйир удучIвура. Республикайин кIулиъ айидари милли пресса Дагъустан халкьдин варитIан ккуни мялуматарин дакьат хьпаз гизаф фикир тувра.
Гъийин йигъаз республикайиъ 17 газат ва 6 журнал чапдиан удучIвура. Дурарикан гьяфтайиъ саб ражари удучIвру жямяаьтлугъдинна политикайин «Гьякьикьат» (авар чIалниинди), «Ёлдаш» (гъумугъ чI.), «Илчи» (лак чI.), «Лезги газет» (легзи чI.), «Замана» (дарги чI.), «Табасарандин нурар» (табасаран чI.), «Нур» (цIахур ва урус чIалариинди), «Дербент» (азербайжан чI.), «Ватан» (тат чI.), «Агъулин хабрар» (агъул ва урус чI.), «Галарин сес» (ногъай чI.), «Рутулин хабрар» (рутул ва урус чI.), «Нийсо-Дагъустан» (чичан ва урус чI.) газатар, «Литературайин Дагъустан» (журнал) – 6 чIалниинди, «Ппази» (бицIидарин журнал) – 8 чIалниинди, «Дагъустан дишагьли» – 7 чIалниинди чапдиан удучIвурайи журналар ву.
Вари гьаму газатари ва журналари миллетарин арайиъ айи аьлакьйир албагбан, рюгьнан ва культурайин девлетар уьрхбан ва артмиш апIбан, милли чIаларин артмиш’вализ кюмек тувбан месэлйир сикин дарди гьял апIуз мумкинвал тувра.
Гьамусяаьт Дагъустандин милли чIалариинди вуйи газатар, журналар электрондин дакьатариъра а. Дурари республикайин, уьлкейин гъирагъдиъ яшамиш шулайи ватанагьлийириз бабан чIалниинди вуйи макьалйир урхуз, дурарин анализ апIуз мумкинвал тувра.
Гъи ихь «Табасарандин нурар» газатдин машнаъ, душваъ лихурайи гъарашугъар, ихь милли передачйир гьязур апIури, ВГТРК-йиъ ва РГВК-йиъ лихурайи, пишекарвалин аьхю тажруба айи касар М.Гьюсейнов, А.Урцмиханов, С.Гюлмягьямедова, дурариз передачйир гьязур апIуз кюмек туврайидар, ихь районариъ чапдиан удучIвурайи газатариъ, телевидениейиъ лихурайи гъарашугъар, цирклин ветеранар пишекарвалин машкврахъди тебрик апIурача! Учвуз ичв ляхниъ заан хъуркьувалар ккун апIурача, ужудар хабрар туври, ихь газатар урхрударин, телевидениейиз лигрударин ва радиойихъ хъпехърударин юкIвар шад апIинай!

Комментарии:

f1 in1 ok1 t1 v1 y1

Top