ГлавнаяОбществоУлубкьу ЦIийи йис мубарак ибшри!

Улубкьу ЦIийи йис мубарак ибшри!

1 1 1 1 1 1 1 1 1 1 Рейтинг 5.00 (2 Голосов)

3Гьюрматлу элугълийир!

Улубкьу ЦIийи йисан учвухьна марцци кIваан гъюрайи варитIан мани, дугъри, гьюрматнахьди ацIнайи гафариинди илтIикIуз ккундузуз.
Гъит, улубкьу ЦIийи 2018-пи йис ихь гьарурин уьмриъ варитIан ужуб ва ягъурлуб ибшри. Ихь гьарсарин жандин сагъ'вал, кIван саламатвал, рюгьнан жанлувал артухъ ишри. Ихь мялимариз – апIурайи лап важиблу ляхниз лайикьлу кьимат, духтрариз – чпи сагъ гъапIу аьзарлуйирин терефнан баркаллувалин гафар, гьякимариз ва депутатариз – жуван халкьдин артухъси гъаразнаъ хьувал, миллетдихъ юкIв убгувал, ихь культурайин цирклиъ лихурайидариз – чпин яратмиш'валариин юкIв али, дурариз лайикьлу кьимат тувру артухъ тамашачйир, гъулан мяишатдин ишчйириз – ужудар мягьсулар ва заан бегьерар, спортсменариз – варитIан заан хъуркьувалар ккун апIураза.
Табасаран халкьдин вакилариз, цIийи йисан чпи дюн'яйин фунуб пIипIнаъ ашра, хасиятнан умунвал, ниятарин ва фикрарин марццивал, ихь милли лишнар вуйи мердвал, хялар гирамивалиинди кьабул апIувал, жвуван халкьдин ирснахьна, чIалнахьна, ужудар аьдатарихьна вуйи вафалувал гьамусдихъантинара уьбхюз кьисматну мумкинвалар туври. КьатI'иди кIуруш, гъит, гьарсар табасаранлу 2018-пи йисан бахтнан сагьиб ишри!


Ичв улубкьу ЦIийи йис мубарак!

 

 

3 1Мегьти Аьдилов, «Табасарандин нурар» газатдин жавабдар секретарь
Гьюрматлу ватанагьлийир!
Учву лап кIваан улубкьу 2018-пи йисахъди тебрик апIураза! Гъит, ЦIийи йис ихь халкьдиз хъуркьувалар айиб, швнуд-сад деврарин кьиматлу аьдатар хъана гужал апIруб, яшайиш жигьатнаан табасаран халкьдин уьмур авадан, артмиш хьуз гъитруб, гележег бахтлу, аку, шаду гьядисйирихъди абцIнайиб, ккебгъу гьарсаб ляхин, алдабгъу гьарсаб лик ягъурлуб, хушбахтлуб, берекет, девлет хъайиб, мясляаьтнуна ислягьвали, зегьметнуна устадвали, намуснуна дугъривали, игитвалина жюрэтлували, чвевалина дуствали, гьюрматнуна гюрчег’вали агъавал апIруб ибшри!
Гьарсар табасаран касдиз ЦIийи йисан мюгькам сагъ’вал, хизандиъ гьаммишан саламатвал, гьюрмат, бахт, берекет, девлет хьувал, варитIан кIваан вуйи фикрар, хиялар, умудар, мурад-метлебар кIулиз удучIвувал ккун апIураза. Улубкьу йисаъ швнуд йигъ аш, ичв уьмриъ 2018-пи йисан гьадмукьан шаду гьядисйир ишрийичв!

 

3 2Людмила Кудрявцева, «Табасарандин нурар» газатдин кIулин бухгалтер
Газат урхурайи гьюрматлу ич дустар!
Учву марцци кIваан улубкьурайи ЦIийи 2018-пи йисахъди тебрик апIураза!
Гъит, ЦIийи йис ичв хулаз девлет ва берекет хруб, пулихъди аьлакьалу вари месэлйир рягьятди гьял апIуз шлуб ибшри! Сагъ ва девлету ишричву!

 

 

 

imageГюльнара Мягьямедова, «Табасарандин нурар» газатдин политикайин отделин редактор
Газатдин юлдшар!
Ичв варидарин улубкьу ЦIийи йис мубарак ибшри!
Ичв кIваъ айи мурадар, метлебар тамам ишри! ЦIийи 2018-пи йис ужудар хабрар хруб, кIван саламатвал тувруб, ягъурлуб, бахтлуб ва хъуркьувалар айиб ибшри.

 

 

 

 

3 4Наргиз Гюлечова, «Табасарандин нурар» газатдин гъулан мяишатдин отделин хусуси мухбир

Гьюрматлу ва варитIан ккуни табасаран халкь! Учву вари лап марцци кIваан улубкьу 2018-пи йисахъди тебрик апIураза! Гъит, улубкьу 2018-пи йисан гьарсаб хизандиъ, хулаъ гьаммишан шадвал, сагъ’вал, ислягьвал, мясляаьт, берекет ибшри! Гьарсар касдин кIван хиялар бегьем ишри!

Узу «Табасарандин нурар» газатдин гъулан мяишатдин отделин мухбирди лихурайивализ дилигну, асас вуди ккун апIурайиб – ихь районариъ гъулан мяишат гужалди арт-миш хьувал вуйиз. Фицики гъулан мяишат экономикайин циркил вушра, думу гъулариъ яшамиш шулайи инсанарин ипIру уьлин кьацI ву. Гьаддиз 2018-пи йисан гьарсар касдиз жилиин лихуз, бегьер ккадабцIуз кьувват ккун апIураза. ЦIийи йис мубарак ибшри!

 

3 3Зубайдат Шябанова, «Табасарандин нурар» газатдин культурайин отделин редактор
Гьюрматлу ватанагьлийир!
Марцци кIваан учву улубкьу ЦIийи 2018-пи йисахъди тебрик апIуз ккундузуз. Гъит, ичв гьарсар касдин хулаъ саламатвали, ислягьвали, хушбахтвали ва сагъламвали агъавал апIри.
2017-пи йис тарихдиз гъубшну. Шлиз-вуш думу йис хъуркьувалар, шадвалар, хъа шлиз – дердер-хажалатар айиб гъабхьну. Инсандиз Аллагьу Тааьлайи шадвалинси дерднан дюшюшарра гьисс апIуз кьувват тувра. Гъит, ЦIийи йисан дерднан геренар гьисс апIуз сар касдизра кьисмат дарибшри.
Йиз ляхнин тажрубайиъ узуз жюрбежюр миллетарин вакиларихъди гюрюшмиш хьувал кьисмат шулазуз. Варидари ихь халкьдикан анжагъ ужуб терефнахъанди улхури шулу. Ихь миллетдин культура, багъри чIал, тарих, ата-бабйирин сяняаьткарвалар, кюгьне аьдатар, аьхюр-бицIириз айи гьюрмат, багъри юрдар ккунивал гьитIибкIну гъибтуз шлуб дар. Эгер хизандин, мирасарин, гъуландарин ва райондин жямяаьтдин ара-йиъ сабвал гъабхьиш, ухьуз варидари гьюрмат апIуру.
Жара халкьарин ухьухьна айи гьюрматну ихь халкьдин сабвалин мюгькамваликан кIура. Гафнан сабвалин кьувват хизандилан ккебгърайиб ву. Ичв хизанариъ сабвал, девлет, берекет зяиф дарибшри, ва гележегдиъ веледар марцци рякъюъ тIаъну тербияламиш апIуз учвуз сагъу ва ярхи уьмур кьисмат ибшри.


3 5Эльмира Багъдаева, «Табасарандин нурар» газатдин электрондин отделин кIакIначи пишекар
Гьюрматлу ватанагьлийир!
Учву улубкьу ЦIийи йисахъди кIваантIан тебрик апIураза!
Гъит, улубкьу 2018-пи йису ихь халкьдиз мясляаьт, хъуркьувалар, сагъ-саламатвал, бахт ва ужуб терефназди вуйи цIийивалар хури. Ухьу апIуз ккайиб кIулиз адабгъуз ухьуз Аллагьди кьувватра, сагъ’валра туври. Гъит, улубкьурайи йис ухьу ккебгъуз ккайиб – ккебгъуз, ккудубкIуз ккайиб – ккудубкIуз мумкинвал тувру йис ибшри. Ва улубкьу йисан ухьу вари хъана бахтлу, рягьимлу, сар-сарихьна заан гьюрматлувалиинди илтIикIру касар ишри, хъа дюн’яйи ухьуз цIийи уьмриз цIийи раккнар арццри.
Гьарсар табасаранлуйиз ЦIийи йис ккудубшу йистIан ужуб, акуб, кIваъ айи мурадар кIулиз удучIвруб, сагъ’вал айиб, вафалу дустарихъди абцIнайиб ибшри кIури, ккун апIураза.

 

3 6Кристина Демидова, «Табасарандин нурар» газатдин бицIинур редактор
Гьюрматлу табасаран халкьдин жямяаьт!
Ичв улубкьу ЦIийи йис мубарак ибшри!
Ичв гьарсар касдин хизандиъ девлет, берекет, ислягьвал, сагъ’вал ва мюгьюббат артухъ ибшри!
ЦIийи йисан фу шулуш ухьуз аьгъдархьуз, хъа ухьу, гьарган ужубдик умуд киври, гележегдиз ккилигурхьа.
ЦIийи йисан ичв кIваъ айи хиялар тамам хьувал ккун апIураза.

 

 

 

 

3 7Аьбдулмажид Рашидов, «Табасарандин нурар» газатдин Табасаран райондиъ айи хусуси мухбир

Аьзиз ватанагьлийир, газатдин подписка апIурайидар! Газат – му саб дидин редакцияйиъ лихурайидарин ваъ, хъа дидин подписка апIурайидарин, дидиз бикIрударин, думу урхрударин, дидихъди аьлакьа уьбхюрайидарин сатIиди вуйи ляхнин натижа ву. ЦIийи йисан газатдин дустарин кьадар хъана гизаф шул кIури, умудлу хьуз ккундузуз.
Учву гьарсар улубкьу ЦIийи йисахъди тебрик апIураза! Гъит, думу йис гьарсар касдин ужудар фикрар ва ниятар уьмриъ гьякьикьатдиз илтIикIру, улхьан йисан дарапIу ляхнар вари удукьру, ягъурлу ва бахтлу йис ибшри!

 

3 8Шюшеханум Керимова, «Табасарандин нурар» газатдин Дербент шагьриъ айи хусуси мухбир 

Гьюрматлу ватанагьлийир!
Учву вари ихь уьмриъ убчIву ЦIийи йисахъди тебрик апIури, учвуз ва ичв хизанариз кIван шадвал, хъуркьувалар, жандин сагъ’вал ва гьацира ихь дюн`яйиъ айи вари ужувлар ккун апIураза.

 

 

 

3 9Феруза Рамалданова, «Табасарандин нурар» газатдин Хив райондиъ айи хусуси мухбир
Йиз аьзиз табасаран халкь! Узуз багъри Хив райондин агьалйир! Марцци кIваан учвуз улубкьу ЦIийи 2018-пи йис мубарак апIураза! Гьарсаб хизандиъ мясляаьт, гьюрмат, берекет артухъ ибшри. Фицики хизандин мюгькамвал уьлкейин ислягьвалин диб ву. Гъит, ихь наслар бахтавар ва ислягь уьмрин эйсйир ишри! Улубкьу ЦIийи йис мубарак ибшри! Гъит, му йисан ухьуз анжагъ шаду хабрар ерхьри!

Комментарии:

f1 in1 ok1 t1 v1 y1

Top