ГлавнаяОбществоГьациб гъуллугъ а – Ватан уьбхювал

Гьациб гъуллугъ а – Ватан уьбхювал

1 1 1 1 1 1 1 1 1 1 Рейтинг 5.00 (2 Голосов)

1 2Ихь ватанагьли, генерал-майор Рустам Мурадов Урусатдин Игитрин ччвурназ лайикь гъахьну. Дугъаз «Гъизилин Хяд» медаль, Сирияйиъ чан улихь дивнайи дявдин месэлйир хъуркьувалиинди тамам апIбаз лигну, тувуб ву. Рустам Мурадов Сирияйиъ сад йисанкьан дявдин теклифчи вуди гъахьну. 

Дагъустандиан вуйи генерализ медаль 2017-пи йисан декабрин 28-пи йигъан Урусатдин Президент Владимир Путинди тувну. Думу йигъан Кремлин Георгиевский залиъ дявдин гъуллугънаъ айи 13 касдиз Гьюкуматдин пешкешар тувбан серенжем кIули гъубшнийи.
Рустам Мурадов 1973-пи йисан мартдин 21-пи йигъан Дербент райондин Чинар гъулаъ бабкан гъахьну. 1966-пи йисан Кьибла Дагъустандиъ жилар гъутIурччвиган, дугъан хизан Табасаран райондин Ханак гъул’ан Чинар гъулаз кюч гъабхьну. Рустам Мурадовди Чинар гъулан кьялан мектебдиъ гъурхну, Казандин Суворовдин дявдин училище ккудубкIну.
Генерал-майор Рустам Мурадовди Санкт-Петербургдиъ уьмуми кьушмарин команда тувбан Заан училище, РФ-йин ВС-йин уьмуми кьушмарин академия, Генштабдин дявдин Академия заан хъуркьувалариинди ккудукIну. Думу Чечен Республикайиъ дявдин кьюбпи кампанияйин вахтна Буйнакскдиъ ерлешмиш дубхьнайи гвардейский жаради вуйи 136-пи мотострелковый бригадайин развед-ротайин командир вуди гъахьну. Думуган, Заан Центорой гъул бисбаз лигну, полковник Мурадовдиз Кьягьялвалин орден тувнийи.
Генерал-майор Владимир Шамановдин регьберваликкди Датойиъ Масхадовдин штаб бисувалин операция хъуркьувалиинди гъабхувализ лигну, Мурадов Кьягьялвалин кьюбпи ордендихъди лишанлу гъапIну.
Борзе шагьриъ мотострелковый бригадайиз гъяйиз, полковник Мурадов Чечен Республикайиъ Шалинский бригадайин кIулиъ гъахьнийи.
Рустам Уьсманович чав Кафари Кавказдиъ гъуллугъ гъабхурайи вахтна чан хиликк ккайи эскрар вари сагъ-саламатди уьрхювалиин дамагълу ву.
Яракьлу кьувватарин пландиинди офицерар саб йишвлан тмуну йишв’ина гьаъруган, Р.Мурадов Забайкальейиз гъуллугъ апIуз гъушнийи, хъа му къарар кьабул апIбан бадали, дугъаз анжагъ саб гьяфтатIан лазим гъабхьундайи.
1 22009-пи йисан арайиз гъафи ва Мурадовди регьбервал туврайи жаради вуйи гвардейский Лозовский Краснознаменный мотострелковый бригада Цугол полигондиъ дявдин ученйириъ иштирак гъабхьнийи. Думу ученйир 29-пи армияйин уьмуми кьушмин цIийиди арайиз дуфнайи дестейиз сабпи имтигьянар вуйи. 

2010-пи йисан бригада «Восток-2010» ччвур тувнайи гьяракатнанна стратегияйин ученйириъ иштирак гъабхьнийи. Бригадайи ученйириъ асас роль уйнамиш гъапIну алжагъури, шартIнан душман терг апIури, хъа мотострелковый шубуб батальон ва танкарин кьюб рота гьяракатниинди Онон нирин тмуну терефназди ктучIвну.
2011-пи йисан Борзе шагьриъ бригадайин бинайиинди Генштабдин начальник, Къураматдин кьушмарин кIулин командующийин, ригъ гьудубчIвру терефнан дявдин округдин командующийин, ВВО-йин армйирин командующйирин ва Яракьлу Кьувватарин соединенйирин вари командирарин иштираквалиинди гьяракатнанна методикайин сбор кIули гъубшнийи.
Мотострелковый бригада арайиз дуфнайи вахтна (дидин дахилнаъ 1000-тIан артухъ солдат а), дидин низам-къайдайин гьякьнаан улупбар 29-пи армияйиъ варитIан асккандар вуйи. Гъи бригада, армияйиъси, ригъ гьудубчIвру терефнан дявдин округдиъра варитIан ужубсиб ву.
2012-пи йисан декабрин вазлиъ Р.Мурадовдиз генерал-майор ччвур тувну.
2016-пи йисан генерал-майор Рустам Мурадов Донбассдиъ дявдин цIа дебкк-бан ва дяви гъабхурайин терефарин сяргьятариин къайда уьбхбан месэлйир албагру ва ахтармиш апIру СатIи вуйи центриъ Урусатдин вакил вуди гъахьну. 2016-пи йисан мартдин 5-пи йигъан хябяхъган сяаьт миржибдиз 15 дакьикьа дилибхнайиган, Ясиноватый ра-йондиъ Р.Мурадов Урусатдин терефнан вуйи жара вакиларихъди пулеметариан, РПГ-йиан ва зенитдин установкйириан вуйи йивбарикк ккахъну.
Дидин кьяляхъ сад йисазкьан генерал-майор Р.Мурадов Сирияйиз гьаъну. Сирияйиъ Дейр-эз-Зорайин Кафари терефнаъ Гьюкуматдин кьувватарин бригадайин дестейин генерал Сухелдин кьушмари женгар гъахури гъахьну. СМИ-йиъ Катарджи фамилия али кьюр гъардашдин регьберваликк ккайи дестйирин хъуркьувлариканра хайлин дупна. Амма гьякьлуди улхуруш, думу терефнаъ дявдин женгар кIули гъахурайир генерал-майор Рустам Мурадов вуйи. Дугъан регьберваликкди кьушмарин дестйири кьюб гьяфтайин арайиъ Эс-Сухнейихьан Дейр-эз-Зорайихьнакьан душмандихъди гъати женгар гъухнийи. Йигъандинна йишвандин муддатнаъ дурари 15-20 км, хъа бязи йигъари 30 км ккадаури гъахьну.
Урусатдин Сирияйиъ айи кьушмарин кIулиъ айи генерал-полковник Сергей Суровикиндин регьберваликкди генерал-майор Рустам Мурадовди ва генерал-майор Андрей Иванаевди Сирияйин Дейр-эз-Зора шагьур азад апIбан операция гьязур гъапIну. Мурадовди ва Иванаевди, командайин пунк-тариан регьбервал тувбахъди сабси, дявдин женгариъ чпин хусуси дирбаш’вал улупбиинди эскрарин кIван рюгьра за апIури гъахьну. Сирияйин вари терефариъ женгар гъахурайи дестйирин кIулиъ урусатдин генерал ади гъахьну. Хъа Сирияйин гьарсаб батальондиъ (артиллерияйин дивизиондиъ) Урусатдин армияйин теклифчивалин гъурулушари ляхин апIура. Гьаддиз Сирияйин Аьраб республикайин Яракьлу кьувватар чпи гъадагъу гъалибвалариинди Урусатдин Яракьлу кьувватариз буржлу ву.
Урусатдин Сабпи каналин мухбирихъди вуйи сюгьбатнаъ генерал-майор Рустам Мурадовди гьамци гъапну: «Сирияйиъ террориствализ аькси операция гъизгъинди кIули гъубшнийи. Душваъ боевикарин чпин кьувватнан мюгькамвалик аьхю умуд кайи, ва дурари, чпи уьрхбан бадали, дараматарин кьувватлу гъурулуш арайиз дубхнайи. Урусатдин Заваринна аьршдин кьувватари (ВКС) чпин ужударсдар терефар улупну. Му лап гъагъи шартIариъ урусатдин рюгьнан, урусатдин яракьнан мумкинвалар ужубсиб терефнаан улупуз удукьну».
Учу гьаму материал гьязур апIруган, Рустам Мурадовдикан вуйи гизаф макьалйир гъурхунча. Му кас, дугъриданра, Табасарандин, Дагъустандин, Урусатдин лайикьлу ватанпервер ву. Учу дугъахъди аьлакьа тешкил апIбан бадалира мумкинвалар гъагунча ва дугъан телефондиз тебрикнан гафарра хътаунча. Рустам Мурадовдихьан интервью гъадабгъуз кьаст айи журналистарин кьадар гизаф ву, дугъаз вахт адрувалинра гъавриъ ача. Вушра, Рустам Мурадов Дагъустандиз гъафиган, дугъахъди сюгьбат гъабхуз, думу гъяйиз ккилигурача.
Хъа гьамус ихь игитрихъди гъуллугъ апIури гъахьи касарин дугъкан вуйи ва социалин сетариъ дугъан ляхнариз кьимат туврайи фикрар ичв улихьна адагъурача.
Рустам Мурадов чав туву гафназ, Ватандиз вафалу кас, ужур лайикьлу командир вуйивал исихъ тувнайи инсанарин гафари тасдикь апIура.
Иван Дегтяников: Рустам Уьсманович, 36-пи бригадайин оркестри уву Урусатдин Игит кIуру заан ччвур тувбахъди тебрик апIура. Увуз Первердигари сагъ’вал тувривуз!... Гьарсаб ляхниъ дирбаш ву, дугъан кюмекниинди учкан ужудар пишекрар гъахьну, гьякьлу офицер ву.
Андрей Дзюба: думу йиз командир вуди гъахьнийи, 1996-1997-пи йисари Буйнакск шагьриъ разведротайиъ Рустам Мурадовдихъди гъуллугънаъ гъахьунза. Дугъаз маншаллагь.
Виктор Говорухин: 693 МСП. – Думу гьарган улихь хьайир вуйи, ужур офицер, дицисдар цIибтIан адар, мициб заан ччвурназ лайикь ву!
Олег Алексеевич: Аллагьди сагъ’вал туври чаз, лайикьлу инсан ву. ЦIиб вахтна дугъахъди сабси гъуллугънаъ гъахьунза, жарарин йирфарихъ жин духьну вахт адапIурайир дар ва Игитрин ччвурра лайикьлуди тувну.
Эдуард Рыжкин: йиз командир, гьякьлур, дюз вуйир, халис эскер, Игитрин ччвурназ лайикь ву.
Николай Акимцев: узу 2009-2010-пи йисари Р.Мурадовди регьбервал туврайи 06705 дявдин частнаъ гъуллугъ апIури гъахьунза, варитIан ужур командир вуйи.

«Табасарандин нурар» газатдин редакцияйин терефнаан ихь жюрэтлу ватанагьлийиз багарихьди «армияйин генерал» ччвур гъазанмиш апIуз жандин сагъ'вал ва хъана заан хъуркьувалар ккун апIурача.

Комментарии:

f1 in1 ok1 t1 v1 y1

Top