ГлавнаяОбществоВаритIан ужур мялим

ВаритIан ужур мялим

1 1 1 1 1 1 1 1 1 1 Рейтинг 5.00 (1 Голос)

222Сентябрин 20-пи йигълан мина башламиш дапIну, Санкт-Петербург шагьриъ «Урусатдин варитIан ужур мялим – 2018» конкурсдин финалин турар кIули гъягъюра. Думу конкурсдин иштиракчйирин арайиъ Дагъустандин этапдиъ гъалиб гъахьи ихь ватанагьли Альбина Аюбовара а.

Улихьна йисариси, гьамусра конкурсдиъ иштирак шулайи мялимари чпин бажаранвал, ляхнин тажруба улупуз жюрбежюр къайдйир ишлетмиш апIура. Жюрийи, икибаштIан, асас кьимат мялимдин гафназ, чIалназ туври гъахьну. Гьаддиз конкурсдин экспертари артухъси суаларра хъирчрайи.

Дагъустан Республикайиан вуйи Альбина Аюбовайихьан жюрийин вакилари дугъу чан ученикарихъди сатIиди яшлу педагогариз апIурайи рягьимлувалин кюмекнакан ктибтуб ккун гъапIнийи. Чаз, мялимдиз, сифте нач’вал кади, дурари гъахурайи рягьимлувалин ляхнар ачухъ апIуз ккунди адайи.

Конкурсдин аьхиримжи этапдин натижйир октябрин 5-пи йигъан Москва шагьриъ гьюкуматдин Кремлин дараматдиъ ачухъ апIиди. Урусатдиъ 5-пи октябрь мялимарин Йигъсира къайд апIура.

Конкурс фици кIули гъябгъюраш, мялуматар гъадагъуз ккунди, узу Альбинайиз телефондиан зенг гъапIнийза. Дугъу, чаз мажал адрувализра дилигди, узухъди сюгьбат апIуз вахт гъабгну.

«Финалин конкурсариз гьязур хьпан бадали, вахт лазим ву. Яна, сикин дарди гьязур шули ккунду. Ав, учу, гьаммишан саб фу-вуш цIийиб абгури, яратмишарин уьмрин рякъюъ ача. Хъа конкурсдиъ гьарсаб цIийи ляхин, цIийи къайда арайиз адабгъруган, кьатI’и анализ тIалаб апIура. Бегьемди гьязур хьуз вахт гьубкIрадар. Узуз финалин этапдихьна гьязур хьуз Дагъустандин образованиейин артмиш’валин инс-титутди, хъа асас вуди илимдинна методикайин ва инновацйирин ляхнин проректор Эльвира Сайпуевайи кюмек гъапIнийзуз.

Финалин этапариъ Чечен Республикайиан вуйи, обществознаниейиан дарсар кивру мялим Аьлихан Динаевдин ва Москвайиан дуфнайи информатикайин мялим Игнат Игнатовдин мастер-классар ва дурари кIули гъуху классдин сяътар варитIан гизаф кьабул гъахьунзуз. Дурар кьюридра полуфинализ удучIвну. Ихь сюгьбатнаъ, узуз мумкинвал ккабхъну амиди, Дагъустандин вари мялимар пишекарвалин йигъахъди тебрик апIуз ккундузуз. Мялимвалин пише – му гъубшу насил ва гележегдин насил сатIи апIурайи гьялкъа ву. Ухьуз, мялимариз, гележегдин насил тербияламиш апIуз, инновацияйин идейир уьмриз адагъуз, уьлкейин важиблу циркларин артмиш’валик пай кивуз мумкинвал ахьуз. Узу йиз пишейихъан дамагълувал гьисс апIураза. Ва ичв юкIвариъра думу гьиссар зяиф даришри», – гъапну Альбина Аюбовайи.

«Урусатдин варитIан ужур мялим – 2018» конкурсдин финалин аьхиримжи этапдиз хьур мялим удучIвну. Дурар Аьлихан Динаев (Грозный), Григорий Назаров (Подмосковье), Илья Казанцев (Псков) – обществознание кивру мялимар ву. Игнат Игнатов (Москва) информатикайин дарс кивру мялим ва Юрий Клюев (Брянск) химия кивру мялим ву. Дурарикан варитIан ужур мялим 5-пи октябриъ «Министрихъди сюгьбатнан» кьяляхъ мялум хьиди.

Комментарии:

f1 in1 ok1 t1 v1 y1

Top