ГлавнаяОбществоПак пишейин сагьибар мубарак

Пак пишейин сагьибар мубарак

1 1 1 1 1 1 1 1 1 1 Рейтинг 5.00 (1 Голос)

1042425

Дюн'яйиъ айи пишйирикан варитIан игьтияж айиб, важиблуб, инсаниятдин бина ккивуз кюмек туврайиб мялимвал ву. Машгьур философ Иммануил Кантди мялимарин ва политикарин пишйир саб цIарнаъ дерккра: «Дюн'яйиъ кьюб читин шейъ а – тербия тувувал ва идара апIувал». Дерин касдихъди рази вуди, аьлавади пуз ккундузуз – мялимвалин пише хъана заан ву, гьаз гъапиш идара апIру касарира мялимарихь тербия гъадабгъуру.

Ихь гьарсарин уьмриъ сарпи мялимдин эгьемият кьимат тувуз даршлубкьан аьхюб ву. Дугъу инсандин (гьаци вуйиган, вари инсаниятдинра) уьмрин шибритI ккивра, бицIириз ужубна харжиб жара апIуз улупура, фагьумлу уьмриъ сабпи гамар алдагъруган, кюмек тувра. БицIидар – пак ва марцци улматар ву, дурар мулахдихьди саб апIуз шулу – мялимди фициб ляхин дурарихъди гъубхиш, дурарин артмиш шулайи фагьмиъ фицдар фикрар ивиш – гьадди дурарин гележегдиз вуйи рякъра тяйин апIуру.

КьатI'иди кIуруш, ухьуз тербия туву мялим – ихь гьякьикьат ву. Гьаддиз бицIидарин ужур мялимдихьна вуйи марцци ккунивалин гьиссар вари уьмриз гъузру. Гьаддиз, жямяаьт ужу хьпан бадали, бицIидар халис, жвуван ляхниин юкIв али мялимдиина ихтибар дапIну ккунду.

Гьяйифки, аьхиримжи 20-30 йисарин арайиъ ихь уьлкейиъ му уткан, намуслу, гизаф кьувват сарф апIру ва кьадарсуз читин пишейин адра ис абхъну, мялимдихьна вуйи янашмиш'валра дигиш гъабхьну.

Ихь уьмриъ гъи ижмиди учIвнайи тIарашчивал, инсафсузвал, руш'ватчивал, аьхюр-бицIир аьгъдрувал, аьсрариинди ихь ата-бабйирин уьмрин асул вуйи ягь-намус кьит хьувал – жямяаьтлугъдин, ихь гьарсарин терефнаан мялимарихьна вуйи рафтар дигиш хьувалин натижа ву. Уинстон Черчиллди гъапиганси, мектебдиъ дарсар киврайи мялимариз айибсиб гьюкум уьлкейин кIулиъ дийигънайидаризра адар. Гьелбетда, мушваъ инсандин фикир апIувализ, дюн'яйихьна лигувализ тясир апIуз мялимдиз айи мумкинваларикан дупна. Гъи мялимдихьан улихьган дугъаз айи сюгьрин му кьувват, рюгьнан гужли гьюкум аьхиримжи вахтна образованиейиъ гъахурайи ва мялимдин суй, дугъан уьмрин дережа ис апIуз гъитрайи, жюрбежюр реформйириинди ихь уьлкейин кIули айидари чпи тадабгъну.

Германияйин канцлер Отто фон Бисмаркди му аьгьвалатнан гьякьнаан лап дерин мяна айи гафар гъитна: «Гьюкуматдин мялимдихьна вуйи янашмиш'вал – му гьюкуматдин политика ву, ва диди уьлкейин кьувватлуваликан, ясана дидин зяифваликан шагьидвал апIура. Дявйириъ гъалибвал гъазанмиш апIурайи-дар генералар дар – дявдиъ гъалибвал гъазанмиш апIурайидар мектебдин мялимар ва диндин гъуллугъчйир ву».

Нагагь гъи (Аллагьу Тяаьлайи ярхла апIри) гъи дяви ккебгъиш, ихь уьлкейиъ айи ватанперверарин кьадар, ккудушу аьсрарихь тевиган, цIиб даршул кIури, умудлу хьуз ккундузуз….

Эгер деври мялим ужуз, аьжуз дапIнаш, эгер думу чав тербия туврударихьна жвуван яшайиш ужу апIру чешмейихьнаси лигураш, думу девирра беябуруб шулу, ва думу мялимди тербия туву бицIидарра уьлкейиз ва халкьдиз файдасуз касар шулу.

Гьюрматлу мялимар! Ичв гьар йигъандин марцци зегьметназ чухсагъул кIури, учву кIваантIан му аку йигъахъди тебрик апIураза. Гъит, ичв уьмриъ варитIан асас гъайгъу анжагъ саб ибшри – фици бицIидар урхувалихьна маракьламиш апIуруш, фици дурариз заан тербия айи намуслу инсанар хьуз кюмек тувруш.
Мубарак ибшри ичв машквар!

Комментарии:

f1 in1 ok1 t1 v1 y1

Top