ГлавнаяОбществоМялим…Увуз икрам!

Мялим…Увуз икрам!

1 1 1 1 1 1 1 1 1 1 Рейтинг 5.00 (3 Голосов)

казбек

Урусатдин образованиейин гъурулушдиъ модернизация гъабхбан натижайиъ арайиз дуфнайи дигиш’валарин гьарсар ватандаш шагьид ву. Хъуркьувалар ахьуз, гьял апIбаз ккилигурайи месэлйирра гьелелиг хайлин гъузра. Тялукь гьякьикьатдиъ дибдиан дигиш дубхьнайи гъийин деврин уьмуми тIалабариз жаваб тувру наслар тербияламиш апIували варитIан асас йишв бисура. Му месэла гьар вахтна важиблу ву. Образованиейин циркил артмиш апIури, Хив райондиъра хайлин серенжемар кьабул дапIна.

- КьатI’иди гъапиш, «Образованиейин гьякьнаан» къанундиз асас вуди, урхурайидариз аьгъювалар тувувал образованиейин мектебдиз улихьна вуйи ужагъариан ккебгъбан ляхин кьувватнаъ ипнача. Вушра, гьелелиг учхьан улупнайи месэла тамамвалиинди гьял апIуз удукьурадар. Фицики хайлин гъулариъ бицIидарин багъар адар, - кIура ич сюгьбатнан эвелиъ Хив РОО-йин начальник Казбек Къазиевди. – Хъа райондин мектебарин гьякьикьатдикан гъапиш, гъи Хив райондин мектебариъ зегьмет зигуз ккунидариз лазим вуйи шартIар яратмиш дапIна. Урхбан йисан гъаншариъ саки вари мектебариъ расвалин ляхнар кIули гъухну. Мектебарин техникайинна материалин, китабарихъди тяминвалин месэлйир гьар вахтна гюзчиваликк кка.

Къайд апIурза, шараитар а, анжагъ баяр-шубари, урхбахьна аьшкь ади, жавабдарвал гьисс апIури ккунду. Мялимдин улихь аьхю месэлйир хьа: гъийин девриъ живанарин уьмрихьна вуйи лигбар асла жарадар ву.

Хив район гьар вахтна тажрубалу, баркаллу зегьметниинди, машгьур мялимариинди кьувватлу ву. Гъи райондин мектебариъ деврин вари тIалабариз асас наслар гьязур апIуз удукьру пишекрар лихурайивалиинди дамагъ апIуз шулу. Йиз гафар саки гьар йисан урхурайидари улупурайи хъуркьувалари субут апIура. Ккудубшу урхбан йисанра райондиъ 11 выпускник «Заан аьгъювалар улупбаз лигну» медалариз лайикь гъахьну. Дурар Хиварин, Гъвандккарин, Чювккерин, Хирччварин, ГъуштIларин, АрхътIарин ва ЦIантIарин мектебариан ву.

Дупну ккунду, райондиъ гьамусяаьтна «Зигьимлу бицIидар» метлеблу программа гьяракатнаъ ипна. Зигьимлу бицIидарин гьякьнаан тялукь база тешкил дапIна. Му жигьатнаан лазим вуйи ляхин гъабхури, Хиварин мектебдин бинайиинди Центр гьяракатнаъ а. Кьабул апIурайи уьлчмйири зигьимлу бицIидар жюрбежюр дережйирин олимпиадйириз гьязур апIуз мумкинвал тувра. 2017-2018-пи урхбан йисан кIули гъуху олимпиадйириъ 500-тIан артухъ живанари иштирак’вал дапIна. Дурарин арайиан 105 гъалибчйирна пешкешнан йишварин сагьибар мялум дапIна. Вушра, гьелелиг арайиз дуфнайи натижйириинди архаин хьуз шуладар. Хайлин терефариан му ляхин зяифди гъубзрайивал олимпиадйирин натижйири тасдикь апIура.

ЕГЭ тувбаъ йислан-йисаз ужудар натижйир ахьуз. Ккудубшу урхбан йисан райондин выпускникарикан урус чIалнан имтигьян 98%-ди, хъа математикайиан – 93%-ди тувна. Думу живанарин арайиъ аттестат гъадабгъуз дархьидар имбувал кIваълан гьархну ккундар. Фицики думу гьякьикьатди ухькан артухъди жавабдарвал тIалаб апIура.

Образованиейин цирклиъ арайиз дуфнайи хъуркьуваларикан хайлин улхуз шулу, амма ухьу варидари гъи гъузрайи камивалар терг апIбиин зегьмет дизигну ккунду.

Артмиш шулайи наслар ватанпервервалин гьиссариккди тербияламиш апIбан бадали, мектебариъ урхурайидарин арайиъ «Урусатдин ватанперверар аьхю апIурача», «Узу – Урусатдин ватандаш», «Гьюрматнан Вахта», «ХатIасузвалин мектеб» ва хайлин жара серенжемар гъахувал аьдатназ илтIибкIна. Му жигьатнаан Ляхла СОШ-дин тарихдин мялим, ТОКС-дин кIулиъ айи Керим Маллаевдин регьберваликкди райондиъ натижалу ляхин гъабхура.

Мектебариъ ухурайидарихъди кми-кмиди спортдин жюрбежюр талитар гъахура. Фицики урхурайидар сагъламвалин лишнариккди тербияламиш апIбаъ физкультурайин, рюгьлувалин, эдеблувалин терефар уьрхювал важиблу ву, - аьлава гъапIну К. Къазиевди.

Мялимдин пишекарвалин Йигъан улихьна гъабхьи гюрюшдиъ учу мектебарин «аку» ва «мучIу» терефарикан маракьлу сюгьбат гъубхунча. Вари хъуркьувалариканна читинваларикан, гьелбетда, саб макьалайиъ пуз шулдар.

Хъа мялимдин ккудудукIру месэлйир фикирназ гъадагъиган, дугъриданра, халис мялим икрам апIбаз лайикь ву.

Саб жерге чиркинваларихъди абцIнайи девриъ баяр-шубар гьякьлу жилгъайиъ тIаъбаъ мялимди аьхю роль уйнамиш апIура. Жавабдарвал аьхюб ву, амма гьюкуматдин терефнаан гьелелиг мялимдин ихтиярар ва маракьар лазим дережайиъди уьрхру къанунар адрували хайлин бажаранлу мялимар сефил апIура. Хъа гьаци-вушра халис мялимди, рюгьлувалин савкьатар зади дерккну, читинваларикк кIул ккиврадар. Мялимдин рюгьлували гьарган баяр-шубарихъан юкIв убгура. Гьюрматлу ва аьзиз мялимар! Учву пишекарвалин Йигъахъди тебрик апIурача! Гъит, учву илим ва тербия туву наслар Урусатдин, Дагъустандин, багъри ругарин дамагъ ва даягъ ишри!  

Шиклиъ: К. Къазиев.

Комментарии:

Комментарии  

+1 #1 ruslan mukailov 12.10.2018 03:08
Казбек ими, удачи Вам в вашей карьере!
Цитировать

f1 in1 ok1 t1 v1 y1

Top