ГлавнаяОбществоХючнаъ урус шашкйириан РД-йин чемпионат гъабхьну

Хючнаъ урус шашкйириан РД-йин чемпионат гъабхьну

1 1 1 1 1 1 1 1 1 1 Рейтинг 5.00 (1 Голос)

88

Октябрин вазлин 5-8-пи йигъари Табасаран райондин центр вуйи Хючна гъулаъ урус шашкйириан кIули’инди спортсменарин ва командйирин арайиъ сабпи йишв бадали республикайин 18-пи чемпионат кIули гъубшну.

Улихьна йисари думу чемпионат райондин культурайин Хулаъ кIули гъабхури гъахьнуш, цци Рибчрайин багахь ерлешмиш дубхьнайи «Шах» санаторийдиъ кIули гъубхну. Турнириъ 10 команда иштирак гъахьну, гьадму гьисабнаан Мягьячгъала шагьриан кьюб команда, са-саб команда Дербент, Буйнакск, Хасавюрт, Къизилюрт шагьрариан ва Къарабудагъкент, Леваши, Казбековский ва Табасаран районариан. Чемпионатдин хусуси гьисабнаъ 21 спортсмен иштирак гъахьну.

Командйирин арайиъ сабпи йишв гизаф ражари республикайин чемпионар гъахьи Исмяил Исмяилов ва Гьяшим Хаирбегов дахил шулайи Табасаран райондин командайи, кьюбпи йишв – Гьяжимурад Аьлиев ва Мустафа Мягьямедов дахил шулайи Къарабудагъкент райондин командайи ва шубубпи йишв республикайин жюрбежюр йисарин чемпионар гъахьи Тимур Къурбанов ва Къазимягьямед Гьясретов дахил шулайи Дербент шагьрин командайи гъадагъну.

Хусуси гьисабнаъ, варитIан ужудар натижийир гъазанмиш дапIну, сабпи йишв Табасаран райондин спортсмен, ккудубшу йисандин Кафари Кавказдин округдин чемпион Исмяил Исмяиловди, кьюбпи йишв ужуб коэффициентдиинди Дербентдиан вуйи Тимур Къурбановди ва шубубпи йишв Хасавюртдиан вуйи Салман Юнусовди гъадагъну.

Чемпионатдиъ гъалиб гъахьидариз Табасаран райондин администрацияйин кубокар, грамотйир ва кьиматлу пешкешар тувну.

Думу серенжем Дагъустан Республикайин шашкйирин Федерацияйи ва Табасаран райондин админстрацияйи сатIиди тешкил гъапIнийи ва кIули гъубхнийи. Талитарин иштиракчйири къайд гъапIиганси, чемпионат заан дережайиъди кIули гъубшну.

 

Комментарии:

f1 in1 ok1 t1 v1 y1

Top