ГлавнаяОбществоИхь гъуллугънаъ айи циркил

Ихь гъуллугънаъ айи циркил

1 1 1 1 1 1 1 1 1 1 Рейтинг 5.00 (1 Голос)

666644455

Гьар йисан дюн’яйин уьлкйириъ, гьадму гьисабнаан Урусатдиъ, 9-пи октябриъ вари дюн’яйин почтайин Йигъ къайд апIури шулу. Думу йигъ машкварси 1969-пи йисан Японияйин меркез Токиойиъ кIули гъубшу ВПС-дин Конгрессди тяйин гъапIну, ва дидин кьяляхъ сад йислан вари дюн’яйин уьлкйириъ къайд апIуз хъюгъну.

Урусатра вари дюн’яйин халкьарин думу тешкилатдин кюгьне членарикан саб ву. Гъи Урусатдин федералин почтайин аьлакьайиз 42 агъзур объект дахил шула, дурарикан 40 агъзуртIан артухъ почтайин аьлакьайин отделенйир ву, 1860 – почтайин аьлакьайин узелар, 100-дихьна почтамтар. Дурари ихь уьлкейин 99 процент йишвариин чпин гъуллугъар гьуркIра. Вари дюн’яйин почтайин Йигъ къайд апIбан метлеб – агьалйирин ва кампанйирин гьар йигъандин уьмриъ, уьлкейин артмиш’валиъ дидин роль, аманат пропаганда апIувал ву.

4664646Вари дюн’яйин почтайин Йигъ машкврин улихьна узу Дербентдин почтамтдин Табасаран райондин Хючна гъулаъ айи почтайин аьлакьайин отделениейин начальник Эскер Жамиевдихъди гюрюшмиш гъахьунза. Дугъу гъапиганси. Табасаран райондиъ агьалйирин почтайин аьлакьайин гъуллугъар гьуркIри, 15 отделение гьяракатнаъ а. Душвариъ, уьмуми гьисабниинди, 82 гъуллугъчи лихура. Райондин почтайин аьлакьайин отделенйири агьалйириз йисандин гьаму вахтназ саки 20 миллион манатдин кьадарнаъди гъуллугъар тувну. Почтайин аьлакьайин отделенйирин гъазанжар 5,5 миллион манатдин кьадарнаъди гьисаб шула.

Ухьуз аьгъюганси, почтайин вазифйир – мурар асас вуди аьдати кагъзар, кьиматлу, заказной кагъзар, посылкйир, бандеролар хътаувал ва кьабул апIувал, чап апIбан изданйир хувал, жюрбежюр переводар хътаувал ва кьабул апIувал, агьалйириз рукьурайи жюрбежюр пособйир ва выплатйир тувувал ва гьаци жарадар ву.

- Учуз, ихь уьлкейин жюрбежюр регионаризтIан савайи, жикъи вахтнан арайиъ жара уьлкйиризра пулин переводар хътауз мумкинвал ачуз. ДумутIанра савайи, учу агьалйири гъубгу газдин, электроэнергияйин, паспортар адагърударин, дурар дигиш апIрударин ва гьаци жара пуларра кьабул апIурча. Гьацира аьлакьайин вари отделенйириъ интернет аьлакьа айич. Сабсандикан дарпиди гъитуз шулдар – гьар йисан кьюбан газатар-журналариз подписка апIбан компанияра кIули гъабхури шулча. Ич аьлакьайин отделениейи вари гъуллугъар гьуркIбаан улупнайи табшуругъар варж проценттIан артухъдира кади тамам апIури шулич. Ццийин урчIвуб вазлиз улупнайи табшуругъарра артухъдира кади тамам дапIнача. Гьаму йисан ич почтайин аьлакьайин отделениейиъ Газпромбанкдин ва почтабанкдин терминаларра дивнайич. Душвариан агьалйирихьан нагъ пул гъадабгъуз шулу, - гъапнийи Эскер Жамиевди.

Дупну ккундуки, Дербентдин почтамтдин Табасаран райондин Хючна гъулаъ айи почтайин аьлакьайин отделение Кьибла Дагъустандиъ улихь хьайи отделенйирикан саб ву. Хъа душваъ лихурайи пишекрар чпин пише ужуди аьгъюдар, ужуб тажруба айидар ву. Гьадрарикан вуди улупуз шулу, месела, операторар Сураят Исмаилова, Мадина Мазалаева, Амир Нурбаев ва жарадар. Мадина Мазалаевайи, 2013-пи йисан «Почтайин аьлакьайин отделениейин варитIан ужурсир оператор» ччвур бадали вуйи республикайин конкурсдиъ иштирак духьну, сабпи йишв гъадабгънийи. Сураят Исмяиловара 2012-пи йисандин «Почтайин аьлакьайин отделениейин варитIан ужурсир оператор» ччвур бадали вуйи республикайин конкурсдин иштиракчи ву. Дугъу душваъ кьюбпи йишв гъадабгънийи. Гьелбетда, чпин вазифйир намуслуди, хъайи-хъайиси тамам апIурайи гъуулугъчйир райондин почтайин аьлакьайин отделениейиъ гизаф а.

- Мялум вуйиси, сабпи сентябриан мина гъюру 2019-пи йисаз газатар-журналариз подпискайин компания ккебгъна, - давам гъапIнийи ич сюгьбатнаъ Эскер Мустафаевичди. – Аьдат вуйиси, райондиъ думу ноябрь-декабрь вазариъ жанлу шулу. Подписка апIбаъ, почтайин гъуллугъчйириси, чпи агьалйирира активвал улупну ккунду. Иллагьки багъри чIалниинди вуйи чап апIбариз, йиз фикриан, аьхю фикир тувну ккунду. Подписка апIувал лап аьхиризкьан гъибтну ккундар.

Комментарии:

f1 in1 ok1 t1 v1 y1

Top