ГлавнаяОбщество«Халкьдин игит» ччвурназ лайикь ву

«Халкьдин игит» ччвурназ лайикь ву

1 1 1 1 1 1 1 1 1 1 Рейтинг 5.00 (1 Голос)

111
Октябрин 8-пи йигъан хябяхъган кьандиси Каспийск шагьрин «Анжи-Арена» стадиондиин UFC-йин чемпион Гьябиб Нурмягьямедов кьабул гъапIну. Думу кьабул гъапIдарин арайиъ РД-йин Правительствойин членар, Урусатдин спортдин кчIихбарин Федерацияйин сарпи президент, РД-йин спортдин ва жара, министерствйирин ва идарйирин кIулиъ айидар, багахьлуйир, дустар ва дугъхъанди юкIв убгурайидар айи.

Бязи улупбариинди, Гьябибовдихъди вуйи гюрюшдиз 15 агъзуриинакьан касар гъафнийи. Мюгьтал хьуз ляхинра адар, фицики Гьябиб Нурмягьямедовдин ва Конор Макгрегорин кчIихбарин кьяляхъ, Гьябибди гъалибвал гъадабгъувалиин шад духьнайи касари Мягьячгъалайин вари аьхю кючйир ацIнайи.

Гьябиб Нурмягьямедовди гъагъи ва читин шартIариъ UFC-йин пучIу гъагъ айи спортсменарин арайиъ чемпионвалин заан ччвур гъюбхну. Улихьди спортдин талитариз зат дилигру касарра кмиди Гьябибди фици Конор ккагънуш, лигури гъахьну. Дугъу Урусат спортдин кьудратлу вилаят вуйивал, хъа Дагъустан спорт артмиш вуйи регионарикан саб вуйивал вари дюн’яйиз улупну.

Вари Урусат Дагъустандин балин дирбаш’валиин гьяйран духьна.
Гьябиб Нурмягьямедовдин гъалибвалик дугъан тренер, чан адаш Аьбдулманап Нурмягьямедовдинра аьхю пай ка.

Республикайин ва уьлкейин агъзрариинди баяриз Гьябиб гьякьлу игит гъахьну. Аьхиримжи йигъари варидарин мелзниин алиб гьадгъан ччвур ву. Мицир бай вердиш гъапIу абйир-бабариз чухсагъул дарпиди гъитуз шулдар.

UFC-йин чемпион Гьябиб Нурмягьямедов «Дагъустандин халкьдин игит» кIуру ччвурназ ва асас пешкеш «Гъизилин люкь» тувбаз улупна. Дидин гьякьнаан ич журналистдиз «Жигьилариз ватанпервервалин тербия тувбан генерал-полковник Мягьямед Танкаевдин Фонднан» вакил Гьясангьюсейн Аьбдулжелиловди хабар тувну. Спортсмендиз думу заан пешкеш, ватандин спортдин артмиш’валик аьхю пай кивбаз ва UFC-йин чемпионвалин чIул гъазанмиш апIбаз лигну, тувбанди ву.

Октябрин 10-12-пи йигъари Ульяновск шагьриъ «Урусат – спортдин уьлке» форум кIули гъябгъюра. Думу форумдиъ Гьябиб Нурмягьямедовра иштирак шула.

Октябрин 10-пи йигъан Урусатдин Президент Владимир Путин Ульяновскдиъ Гьябиб ва Аьбдулманап Нурмягьямедоварихъди гюрюшмиш гъахьну. Гюрюшдиъ В.Путинди балин гъалибвалихъди Аьбдулманап тебрик гъапIну, ужур бай тербияламиш апIбаз чухсагъул гъапну. Машгьур тренерди къайд гъапIганси, байвахнаъ Гьябиб надинж бицIир вуйи, хъа кьяляхъна дигиш гъахьнийи.

«Узуз уву хулаъ (Дагъустандиъ) фици кьабул гъапIнуш гъябкъюнзуз. Гьелбетда, му пулихъди аьлакьалу спорт ву, хъа вушра спорт ву. Мушваъра къайда дюбхну ккунду кIурударихъди рази дархьиди гъузуз шулдарзухьан. Спортдинна, эдеблувалинна къайдйир уьрхювал лазим ву. Уву ихь командайихъан, ихь уьлкейихъан ваъ, яв увхъан талитназ удучIвунва. Хъа уву Урусатдин ватандаш вува, ва ухьу наан ашра, ихь ватандашарихьна фици янашмиш шулаш вижнасузди лигуз хай шулдар. Учу увхъанди юкIв убгури гъахьунча. Яв адашдикан увуз ижми жаза тутрувувал ккун апIидиза, фицики яв улихь дивнайи асас месэла – гъалиб хьувал, уву тамам гъапIунва, лайикьлуди ва варидариз гьубкIу жаваб тувруси», – гъапну В.Путинди. (Дупну ккундуки, Макрегориин гъалиб хьпан кьяляхъ, Гьябиб тамашичйир айи зализ чаз люкьнар ва чиркин гафар апIурайидарихъди кчIихуз гъушну, ва Аьбдулманапди журналистариз, чан бали му дюз дару ляхин гъапIхъан, дугъаз жаза тувруваликан хабар дебккнийи).

Нурмягьямедовди Президентдиз чухсагъул мялум гъапIну ва рингдиъ кчIихбар ккудукIиган гъабхьи дюшюшназси, талитнаъ гъадабгъу гъалибвализра лайикьлу кьимат тувбак умуд киврайиваликан гъапну.

Комментарии:

f1 in1 ok1 t1 v1 y1

Top