ГлавнаяОбществоИслягьвалин гъаразнаъ

Ислягьвалин гъаразнаъ

1 1 1 1 1 1 1 1 1 1 Рейтинг 4.75 (2 Голосов)

65о

Полицияйин Йигъан гъаншариъ

Яшайишдин гъулайвалар духьнашра, гьяйифки, гъийин девриъ агьалйирин юкIварик сикинсузвал кипрайи далилар хайлин гъузра. Ав, фунуб гьюкуматдинра артмиш’валин бина сифтена-сифте хатIасузвал ву. Агьалйириз мугъаятвал, хатIасузвал тямин апIбан метлебниинди, жиниб дар, айтIан месэлйириз лигру гъуллугъчйири му жигьатнаан ляхин хайлин жанлу дапIна. Жавабдарвалиинди тамам апIурайи ляхнин натижайиъ улупнайи вахтназ йишвариин аьгьвалатра саламатди уьбхру мумкинвал дубхьна.

РФ-дин МВД-йин Хив райондин отделин штабдин АПиК-дин инспектор Тимур Кьасумовди къайд гъапIганси, 2018-пи йисан 10 вазлин муддатнаъ полицияйин гъуллугъчйири йишвариин арайиз гъюрайи тахсиркарвалар кам апIбан, гьисабназ гъадагъу тахсиркарвалар ачмиш апIбан, инсанарин хатIасузвал уьбхбан рякъ’ан райондин сяргьятариин агбанна гъаврикк ккаъбан саб жерге серенжемар духна.

- Гъябгъюрайи йисан улупнайи вахтназ Хив райондин аьтрафариин хатIасузвал уьбхбан аьгьвалат писуб дар. КьатI’иди гъапиш, агьалйириз къурхулу терроризмдин лишнар кайи, инсанар ва яракь жин апIбан саягънан тахсиркарвалар райондиъ духьнадар.Ноябрин эвелариз райондин полицияйин гъуллугъчйири кьабул гъапIу ульчмйирин натижайиъ уьмуми гьисабариинди 64 тахсиркарвал гьисабназ гъадагъна.  Дурарикан 60 тахсиркарвал ашкар дапIна ва тялукь дережайин жаза тувбан метлебниинди суддиз хъадаъна. Гъубшу йисан тялукь вахтнан улупбарихь тевиш, Хив райондиъ 4 тахсиркарвал кам духьна.

Гьисабназ гъадагъну, ачмиш гъапIу тахсиркарваликан гъапиш, райондиъ къанунсузди яракьламиш духьнайи десте тешкил апIбан дюшюш мялум дапIна. Къанундин бинайиинди жаза туврувалин гъавриъ ашра, гьелелиг ихь арайиъра, жарарин мутмуйиин хаин духьну, икI апIбан натижайиъ рягьят гъазанжар уч апIбан терефкрарра гъузра. Гьаци, тялукь вахтна икIапIбан 3 тахсиркарвал ашкар дапIна. Дурарилан савайи, РФ-дин УК-дин 222-пи маддайиз асас вуди, 13 тахсиркарвал гьисабназ гъадагъна.

Саки гьар йисан уьлкейиъ, наркотикарин асиллувалиъ ахъну, варжариинди жигьилар кечмиш шулайиваликан махлукьатлу хабрарин сикин дарди сикин дарди мялуматар тувра. Къанун уьбхру гъуллугъари му «уьзриз» аьксиди лазим вуйи серенжемар гъахура, вушра гьелелиг дид’ин гъалиб хьуз дубхьнадар. Улупнайи вахтна Хив райондиъра наркотик кайи сурсат тартиб апIбиин машгъул вуйи 5 дюшюш ашкар гъапIну.

Вари республикайиъси, Хив райондиъра экономикайин рякъ’ан тахсиркарвалар ашкар апIбан ляхин жанлуди гъабхура. Гьаци, Хив РОВД-йин вакилари  тялукь 21 тахсиркарвал ашкар гъапIну.

Ав, йишвариин къанун ва къайда уьбхювал ич асас вазифа ву.  Му жигьатнаан саб жерге тахсиркарваларихъди женг гъабхури, къанунар уьрхбаъ, хатIасузвал яратмиш апIбаъ вари жямяаьтлугъдик сикинсузвал кипрайи экстремизмдиз ва терроризмдиз аькси ляхин гъабхбаз асас фикир туврача. Му месэлайин гьякьнаан арайиз гъюрайи камивалариз гъийин девриъ гьарсари эгьемият тувуб важиблу ву,-гъапну Т. Кьасумовди.

Ав, далилари субут апIурайиси, айтIан месэлйириз лигру гъуллугънан вакилари йишвариин лазим вуйи серенжемар гъахура. Амма, дарпиди гъитуз шулдар, тахсиркарвалариз мумкинвал тутрувбан бадали, агьалйирихъди, асас вуди артмиш шулайи насларин гъатарихъди, жавабдар гъуллугъарихъди сабси жямяаьтлугъдин сагъу гъатари сикин дарди гъаврикк ккаъбан ляхин гъабхувал чарасуз лазим ву.

Жавабдар гъуллугъчйири му жигьатнаан райондин мектебариъ урхурайидарихъди 54 ражари гюрюшар тешкил дапIна. Вушра, гьяйифки, гьякьикьатдиъ алахьурайи саб жерге дюшюшари субут апIурайиси, улупнайи рякъ’ан гьелелиг архаин хьуз шулдар. Т.Кьасумовдин гафариан мялум шулайиси, жюрбежюр гъалатIар деетбан натижайиъ гьамусяаьтна полицияйин гъуллугъарин гьисабнаъ 7 кас а (4 кас цци тазади гьисабназ гъадагънайидар ву). Дурарихъди гьарсаб вахтна лазим вуйи ляхин гъабхура.

ОУУП-дин гъуллугъчйири улупнайи вахтна йишвариин 25 тахсиркарвал ашкар дапIна. Саб жерге административ тахсиркарвалар ашкар дапIну, 579 протокол дюзмиш дапIна. Ккудубшу йисан му улупбарихь тевиш, Хив райондиъ сач 10 вазлин муддатнаъ тялукь 316 протокол дюзмиш гъапIнийи.

Рякъяриъ варитIан гизаф тахсиркарвалар арайиз гъюра гъапишра, ухьу ягъалмиш шулдар. Хив райондин рякъяриъ саламатвал уьбхбан месэлйир гьар вахтна гюзчиваликк кка. Му месэлйир ГАИ-йинна ППСП-йин гъуллугъари уьмуми кьувватариинди гъахура.

Шаксуз, РОВД-йин гъуллугъчйири жямяаьтлугъ ислягьвал ва хатIасузвал мюгькам, тахсиркарвалар кам апIбан гьякьнаан сикин дарди жюрбежюр ляхин гъабхура. Полицияйин гъуллугъчийин Йигъан гъаншариъ, жямяаьтлугъ саламатвал уьбхбан гъаразнаъ айи гъуллугъчйирихьна илтIикIури, дурариз му читин ва баркаллу рякъюъ мюгькам сагъ’вал ва уьлкейиъ саламатвал ккун апIурхьа. Гъит дурариз пишекарвалин рякъюъ анжагъ фагьумлу ва къанундин рякъюъ айи гьякьлу инсанар яракар ишри!

Комментарии:

f1 in1 ok1 t1 v1 y1

Top