ГлавнаяОбществоЙиз сарпи мялим

Йиз сарпи мялим

1 1 1 1 1 1 1 1 1 1 Рейтинг 5.00 (1 Голос)

Жвул`арин мектебдиз Мягьямад Мягьямадовдин ччвур тувну 4 йис ву. Думу серенжемдиъ узура иштирак гъахьнийза. Думу йиз сарпи мялимра вуйиз. Йизси, му бажаранлу кас йиз Мирза, Мурад, Фарман ва Гьяжи кIуру юкьур гъардшаринра мялимди гъахьну. Гьаддиз Мягьямад мялим ич хизандиъ багьалу инсанси гьисаб апIури гъахьну.

Пуз ккундузузки, абйир-бабарин, урхурайидарин терефнаан аьхю гьюрмат ади гъахьи му мялимдин ччвур мектебдиз тувру йигъанра вари гъуландар, улихьна йисари урхури гъахьи ва гъийин вахтна мектебдиъ урхурайи баяр-шубар, хялар уч духьнайи. Му гьядисайи узу гизаф рази гъапIну, гьаз гъапиш йиз мялимдин ччвур мектебдин тарихдиъ убчIвну.

Узуз деебтнайи вахтна йиз уьмриъ гъахьи вари хъуркьувалар узу йиз мялимдин ччвурнахъди сатIи апIураза. Думу кас узу йиз кьюрпи адашсира гьисаб апIуйза. Узуна дугъан риш Селимат ич яш миржид йис дубхьнайиган подклассдиз гъягъюз хъюгънийча. Гьацира узу мектебдиъ йиз гъардаш Мирзайин, хъа Селимат чан гъардаш Сабирин гъайгъушнаъра шуйча. Мягьямад мялимди киву дарсар ва дугъу ич классдихъди гъубху ляхин гъиси кIваин илмийиз. Дугъу успагьиди чюнгюр йивуйи, учу хъпехъури шуйча. Гьацира мялимди учухьди ялхъвнар, мяълийир апIуз гъитуйи. Гьарсаб дарс учуз машкварси шуйчуз.

Дугъан гьар кивру дарсра махъвназ ухшаруб шуйи. 6-7-пи классариъ дугъу учуз алгебрана геометрия киври гъахьнийи. Теоремйирин сабан бабан, хъасин урус чIалниинди гъавриъ тIауйи ва учу вари гъавриъ хьайизкьан, текрар апIури шуйи. Мягьямад имийи директорин вазифйир кIули гъахури гъахьи вахтра ужуди фикирнаъ имийиз. Саб ражари ич классдиъ Хив гъул`ан вуйи Насруллагь мялимдин дарснаъ фтиин-вуш аьлхъюри гъахьнийча. Мялимди узу раккнариз багахь вуйи мурччваъ дерккнийи, хъа Селимат классдиан утIурккнийи. Гьаму арайиъ шли-вуш чIатан терефнаан классдизди ярхи тIул гьачIабккнийи. Хъял гъафи мялимди узура классдиан чIатинди адау ва директориз му ляхникан ктибту. Хъайигъан директори вари мялимарна 5- 7-пи классариъ урхурайидар уч дапIну, ужудар насигьятар туву. Мягьямад Мягьямадович инсанвалин къанунариинди яшамиш шулайир вуйи. Дугъу кIуруб гиран даршлуси, сес за дарапIди кIури шуйи.

Саб ражари му мялимдин дарснаъ Селимат Зулькьайдаевайи аьхю сесниинди «Ай, аман!» кIуру. Мялимди: «Му сес гъапIур фуж вуйи?», - кIури гьерхган, сарира жаваб тувундайи. ЦIиб вахтналан, му Селиматдин сес вуйиб аьгъю хьибган: «Ари, гьамус чIатариъ ккуниб йип!» - дупну, думу риш классдиан адауру. Ав, ич мялимди баяр-шубариз ужуб тербия тувуйи. Дугъаз ихь Табасарандин агьалйири, гъуландари ва мектебдиъ урхурайидари гьюрмат апIуйи.

1956-пи йисан узуна йиз мялимдин риш Селимат Дербент шагьрин педучилищейик урхуз кучIвиган, ич гъуландари, Мягьямаддина Гьяжимирзайи гъулаъ адру аьдатар ккергъра, кIури гъахьну. Йиз адашди: «Йиз шуран ихтияр узу Мягьямаддихьна тувназа, дугъаз ужубна харжиб жара апIуз аьгъя», - гъапнийи.

Педучилищейиъ урхуз хъюгъю сифте йигъарилан мина учуз гизаф читинвалар алахьнийчуз ва гъулаз «Учуз урхуз ккундарчуз» кIуру хабар хътапIнийза. Му хабар кубкIу Мягьямад мялим дишлади шагьриз гъафнийи ва учухъди илимдикан, аьгъювалар герек шлу гележегдикан сюгьбатар дапIну, гъаврикк ккаъну, гъулаз гъушнийи. Нач дубхьну, учу урхбаз асас фикир тувуз хъюгъча. 1960-пи йисан педучилище ккудубкIну, узуна йиз дуст Селимат ич багъри Жвулли гъулаъ мялимарди лихуз хъюгъюнча. Директорди лихурайи Мягьямад мялимди учуз аьгъдруб улупури, ужудар мялимар хьпан бадали, фици зегьмет дизигну ккундуш гъавриъ тIаъри, гьар вахтна кюмекнан хил гьачIабккури гъахьнийи.

Йиз уьмриъ лайикьлу йишв гъибису, йиз ккуни мялимди киву вари дарсар йиз уьмрин, пишекарвалин рякъяриъ герек гъахьунзуз. Гьамусяаьт гъулан мектеб йиз мялимдин ччвурнахъ хъайивалиин узу гизаф рази вуза. 

Комментарии:

f1 in1 ok1 t1 v1 y1

Top