ГлавнаяОбществоЦIийи йис ягъурлуб ибшри

ЦIийи йис ягъурлуб ибшри

1 1 1 1 1 1 1 1 1 1 Рейтинг 4.75 (2 Голосов)

232

Дагъустандин рякъяриъ гьяракат апIурайи автотранспортдин кьадар йислан-йисаз артухъ ва гьаддихъди сабси рякъяриъ бедбахтвалин дюшюшарин кьадар за шула.

Ихь республикайиъ, месела, 2018-пи йисан, госавтоинспекцияйин улупбариинди, 1500 ДТП гъахьну. Думу дюшюшариъ 329 кас гъийихну, хъа 2400 касдиз зийнар гъахьну. Ккудубшу йисан, 2017-пи йисандин улупбарихь лигну, ихь республикайин рякъяриъ хатIалу дюшюшарин кьадар 5,7%-дин цIибди гъахьну. Хъа улхьан йисан дурар 20%-дин артухъди гъахьнийи. 2018-пи йисан хатIалу дюшюшариъ гъийихдарин (18,4%), зийнар гъахьидаринра (6,8%) кьадар, улхьан йисахь лигну, цIибди ву. Вушра, гьелелиг аьгьвалат читинуб вуди гъубзра. Ужувлан дигиш’валар давам хьувал республикайиъ асас вуди машин хъапIрударин низам за апIбаъ рябкъюра ва думу терефнаан тялукь ляхин гъабхура.

Хъа Табасаран райондин рякъяриъ автотранспортди гьяракат апIбан гьял 2018-пи йисан фициб гъабхьнуш гьерхган, Урусатдин Табасаран райондин ОМВД-йин ГИБДД-йин начальник, милицияйин майор Рамис Умалатовди гьамци гъапну:

– Ккудубшу йисан Табасаран райондин аьтрафарин рякъяриъ 7 ДТП гъахьну, дурарин натижайиъ 17 касдиз зийнар гъахьну, гъийихдар адар. Хъа улхьан йисан тялукь вахтна 6 ДТП гъахьнийи ва дурарин натижайиъ кьюр кас гъийихнийи ва 8 касдиз зийнар гъахьнийи. 2018-пи йисан гъахьи кьюб ДТП-йиъ кьюр бицIириз зийнар гъахьну.

Рябкъюрайиси, 2018-пи йисан райондиъ ДТП-йириъ гъийиху касар гъахьундар. Думу ужувлан дигиш’вал ву. Амма зийнар гъахьидарин кьадар 9 касдиинди за гъабхьну. ДумутIанра савайи, хатIалу дюшюшариъ бицIидарра ахьну. Улхьан йисан дицисдар дюшюшар адайи.

– Ич ГИБДД-йин отделениейин хусуси составди 2018-пи йисан райондин рякъяриъ хатIалу ва рякъюъди гъягъбан къанунар чIур апIбан дюшюшар хьуз гъидритбаан саб кьадар ляхин гъубхну, – гъапнийи Рамис Умалатовди. – Анжагъ 11 вазлиъ рякъяриъди гъягъбан къанунар чIур апIбан 1135 дюшюш ашкар гъапIнийи (2017-пи йисан – 378), гьадму гьисабнаан пучIу транспорт хъапIрудари – 875, гъагъ зигру транспортдин водителари – 45, автобусарин водителари – 132, шилди гъярайидари – 2 дюшюшнаъ рякъюъди гъягъбан къайдйир чIур гъапIнийи.

ВаритIан артухъди алахьурайи къанун чIур апIбан дюшюшар – хатIасузвалин чIулар алдарди машинар ишлетмиш апIувал, шюшйир тялукь тIалабариъ улупнайибтIан артухъди мучIу апIувал, пассажирар гъахбан тIалабар чIур апIувал, водителин шагьадатнама хьтарди машин ишлетмиш апIувал, ОСАГО-йин тIалабар тамам дарапIувал ва гьацдар жарадар ву. Улупнайи вахтна думу дюшюшариан 1160100 манатдин кьадарнаъди 1098 къарар адагъну, 20 материал суддиз хътаъну. Ккудубшу йисандин 11 вазлин натижйириинди судди 10 кас вахтназ вуди транспортдин дакьатар ишлетмиш апIбан ихтиярнахъ мягьрум гъапIну, хъа шубур касдин журум гъапIну.

– Райондин ОМВД-йин ГИБДД-йин отделениейи рякъяриъ шулайи хатIалу дюшюшарин улихьишв бисбан ляхниз аьхю фикир тувра. Гьадму метлебниинди пассажирар гъахурайи автотранс-портдин водителарихъди, ОМВД-йин ПДН-дин гъуллугънахъди сатIиди уьмуми образованиейин ва мектебдин яшнакк ккуркьайиз вуйи бицIидарин идарйириъ урхурайидарихъди кми-кмиди сюгьбатар гъахури шулча, – къайд гъапIнийи Рамис Умалатовди. – ДумутIанра савайи, рякъяриъ гьяракат апIбан къайда уьбхбан метлебнан республикайиъ гъахури шлу гьяракатнанна профилактикайин саки вари серенжемариъ иштирак шули гъахьунча. Гьадму гьисабнаан «Ички дубхънайи водитель», «Розыск», «ХатIасузвалин чIул», «Гьяракат», «БицIидарин кресло», «Иномарка», «Шилди гъягъюрайир», «Тонировка» ва жарадариъ.

Рякъяриъ гьаракат апIувал тешкил ва гьяракат апIували хатIасузвал тямин апIбаъ ПДД-йиъ улупнайи тялукь лишнар дивбан, йирси духьнайидар цIийи алаъбан ляхнин метлеблуваликанра гьархну ккундар. Асас вуди образованиейин идарйирин багарихь ва жара хатIалу йи- шварихь тялукь лишнар дивну ккунду. Думу терефнаан саб кьадар ляхин гъубхунча ва думу ляхин давам апIурча. Ич вазифа – райондин рякъяриъ гьяракат апIбан ляхин хатIалувалин дюшюшар даршлуси тешкил апIувал вуйич. Хъа душваъ автотранспортдин эйсйирикан, дурарин низамнакан ва ПДД-йин тIалабар аьгъюваликан, гьацира шилди гъягъюрайи ватандашарикан гизафуб асиллу ву. ЦIийи йис рякъюз удучIврудариз ягъурлуб ибшри!

Комментарии:

f1 in1 ok1 t1 v1 y1

Top