ГлавнаяПолитикаОНФ-дин региондин отделениейин конференция гъабхьну

ОНФ-дин региондин отделениейин конференция гъабхьну

1 1 1 1 1 1 1 1 1 1 Рейтинг 5.00 (2 Голосов)

ОНФНоябрин 11-пи йигъан Дагъустандин гьюкуматдин аграрный университетдиъ Вариурусатдин халкьдин фронтдин (ОНФ) региондин отделениейин конференция гъабхьну. Конференция жюрбежюр темйириан вуйи 5 секцияйиз жара гъапIнийи: «Жямяаьт ва гьюкум: ачухъ диалог», «Илимна меденият халкьдин милли сабвалинна утканвалин диб», «Яшайишдин гьякьлувал», «Гьар йигъандин уьмрин ери» ва «Гьякьлу ва мянфяаьтлу экономика».

Гъябгъюрайи конференцияйин гьарсаб секцияйиъ ОНФ-дин региондин отделениейин вакилар, министрар, жямяаьтлугъ тешкилатарин вакилар, жягьтлувалин дестйирин агьалйир иштирак гъахьнийи.

«Жямяаьт ва гьюкум: ачухъ диалог» секцияйиъ ОНФ-дин вакиларихьна асас вуди илтIикIдар гъубшу йисан 21-пи августдиъ цIа кабхьну гъубгу ЦIунта райондин Мокок гъулан агьалйир, гъи республикайиъ тикмиш апIурайи гизаф мертебйирин хуларик чпин пай киву ва чпиз кучIлар гъапIу касар вуйи. Мидланра гъайри, дурарин арайиъ экологияйихъди аьлакьалу, Мягьячгъалайиъ къайдасузди диврайи хуларин гьякьнаан вуйи месэлйир гьял апIувал ккун апIурайи агьалйирра гизаф айи.

Къайд дапIну ккундуки, алахьурайи читин месэлйир гьял апIбан бадали, ОНФ-дин региондин отделениейиз гьаммишан инсанар илтIикIура. Отделениейи хайлин месэлйир гьялра апIура.  

Серенжемдиъ Мокок гъулан кьялан мектебдин директор Мягьямед Аьбдуллаевди гьамусяаьт думу гъулан аьгьвалат фициб вуш, инсанар наан яшамиш шулаш ва чпиз алахьурайи жара читин месэлйирикан гъапнийи. Дугъан гафариинди, гьамусяаьт гъулаъ 74 хизан вая 500-тIан артухъ инсанар хуларихъ мягьрум духьна.   

«Ич гъулаз гьамциб бедбахтвал гъабхьиган, думуган РД-йин Главади лихурайи Рамазан Аьбдулатипов гъафнийи. Айи аьгьвалат гъябкъган, дугъу гъулан гьарсаб хизандиз адмийин кIулихъ 100 агъзур манат ва гъубгу хулан 1 квадратдин метрийиз 25 агъзур манатдин кюмек апIбан гаф тувнийи.

Гьаддихъан мина кюмекназ ккилигурача, амма 5 агъзур манаттIан гъайри, гьелелиг учуз гъапIу кюмек адар», - гъапнийи мектебдин директори.

Дугъу туву мялуматариинди, гьамусяаьт гъулан хайлин инсанар гъулаъ айи бицIидарин багъдиъ яшамиш хьуз мажбур шула. Хайлиндар багахь гъулариъ мирасарихь гъузна, 20-тIан артухъ хизанар гъул’ан удучIвну шагьрариз гъушну. Социалин объектарикан гъулаъ имбуб анжагъ саб мектебтIан дар.

Мидланра гъайри, гъябгъюрайи конференцияйиз чпин суалар хьади Мягьячгъала шагьрин Тимирязевдин, Акъушинскийин ва Гьямидовдин ччвурнахъ хъайи кючйириъ агьалйирра дуфнайи. Дурарин гафариинди, гьамусяаьт регионариъ уьмриз кечирмиш апIурайи «Шагьриъ гъулай шартIар тешкил апIувал» федералин проектдин программайин дахилнаъди дурар яшамиш шулайи гизаф мертебйирин хуларин гьяятар дигиш дапIну, уччву апIуз хъюгъну. Амма ляхин аьхирихъна хурадар. Мидланра гъайри, дурари чпи яшамиш шулайи хуларин улихь къанунсузди диврайи жара объектарин гьякьнаанра мялуматар тувнийи.

Гьацира конференцияйиъ кьибла Дагъустандиъ гьял дапIну ккуни месэлйирин гьякьнаан Дербент шагьрин агьали Манисат Насруллаевара удучIвну гъулхнийи. Дугъан гафариинди, Дагъустандин кьибла терефнаъ мектебариъ, бицIидарин багъариъ айи бицIидар лазим вуйи кьадар ипIрубдихъди тямин дапIнадар. Дугъу Самур ярквран месэлйириканра, яна яркур дюбхну ккуниваликанра, гъапнийи.

Секцйирин ляхин ккудубкIбан кьяляхъ, ОНФ-дин региондин отделениейин пленарный заседание гъабхьнийи. Думу заседаниейиъ РФ-йин Госдумайин депутат Умахан Умаханов, РД-йин Халкьдин Собраниейин Председателин сарпи заместитель Сайгидягьмед Аьгьмедов иштирак гъахьнийи.

Му заседаниейиъра Умахан Умаханов агьалйирин месэлйирихъ хъпехънийи. Серенжемдин аьхириъ гьарсаб секцияйин конференцияйин натижайиъ гьял апIуз адагъу месэлйир, республикайин яшайишдин гьял ужу апIбан бадали, вахтназ вуди РД-йин Главайин вазифйир  тамам апIурайи Владимир Васильевдихьна хътауз йикьрар гъапIнийи.

Комментарии:

f1 in1 ok1 t1 v1 y1

Top