ГлавнаяПолитикаДагъустандин артмиш`вал – асас метлеб

Дагъустандин артмиш`вал – асас метлеб

1 1 1 1 1 1 1 1 1 1 Рейтинг 5.00 (1 Голос)

image2Август вазлин эвелариъ Дербент шагьрин Нарын-Гъалайиин «Йиз Дагъустан» кIуру конкурсдиз заявкйир уч апIбан натижйир йивбахъди аьлакьалу пресс-конференция кIули гъубшну.

Думу серенжемдиъ РД-йин Правительствойин Председатель Артём Здунов, РД-йин Главайин ва Правительствойин Администрацияйин руководитель Владимир Иванов, Москвайиан дуфнайи ва конкурсдин кьиматар дивбан серенжемар гъахру руководителин заместитель Юлия Лузанова, Гюзчивалин советдин членар вуйи Ягь’я Бучаев, Ильяс Мамаев, Зубайру Зубайруев ва гьацира жарадар иштирак гъахьну.

Гьацира му серенжемдиъ Дербент шагьрин ва Дербент райондин главйирин вазифйир тамам апIурайи Энрик Муслимов, Фуад Шихиев ва Москвайин, Сибирин, ихь республикайин СМИ-йин вакилар, блогерар иштирак гъахьну.
Уч духьнайидарин улихь удучIвну улхури, Артём Александровичди му конкурс республикайин СМИ-йин кюмекниинди жанлуди гъябгъюрайиваликан къайд гъапIну. 55% иштиракчйири чпиз конкурсдикан вуйи мялумат региондин СМИ-йин дакьатариан аьгъю гъабхьиваликан гъапну. Дупну ккундуки, конкурсдин иштиракчйирин арайиъ, республикайианси, Урусатдин 85 региондиан инсанар а. Гьацира конкурсдиъ США-йиан, Прибалтикайиан, Украинайиан агьалйирра иштирак шула. «Дагъустан артмиш апIбан бадали тешкил гъапIу му серенжемдикан вари дюн`яйиз аьян гъабхьну. Дагъустандин дих гъеебхьну. Му конкурсдиъ 5258 кас иштирак шула. Лазим вуйи документар уч гъапIу ва дустагъдиъ дархьи вари касарин документар кьабул гъапIну», – мялум гъапIну дугъу.
Владимир Ивановди чан улхбаъ республикайин Главайин ва Правительствойин Администрацияйин сайтдиз 11 000 кагъаз гъафиваликан, думу кагъзариъ ихь агьалйири, мициб конкурс тешкил апIбиин разивал улупури, чпиз чухсагъул мялум апIурайиваликан, му проектдин ляхин давам шлувалик дурари миж киврайиваликан гъапнийи.
Конкурсдиъ иштирак’вал апIурайи, жара йишвариъ яшамиш шулайи дагъустанлуйирикан 99%-ди чиб республикайиз кьяляхъ хъадакну гъюз ккайивал тасдикь гъапIну. Гизафси думу иштиракчйир Москва, Санкт-Петербург, Ханты-Мансийск шагьрариан, Московский областдиан ва Ставропольский крайдиан ву. Чан удучIвну улхбаъ Владимир Валерьевичдира конкурсдикан вуйи мялуматдихъди таниш апIбаъ республикайин СМИ-йи важиблу роль уйнамиш гъапIуваликан гъапнийи ва уч духьнайи журналистариз, блогерариз чухсагъул мялум гъапIнийи.
Юлия Лузановайи му конкурсдиъ иштирак шулайидари 6-8-пи августдиъ гъябгъру кьюбпи пайнан онлайн-тестированиейихъди вуйи ляхин жарадарин кюмек дарди кIули дубхну ккуниваликан, эгер жарарин кюмек ишлетмиш гъапIиш, чпиз конкурсдин аьхириъ ашкар шлуваликан гъапну. Дугъан гафариинди, конкурсдин вари паяр ужуди тешкил дапIна, мушваъ, таниш`валар ишлетмиш апIури, гъалиб хьуз шулдар.
Артём Александровичдин гафариинди, республикайин гьюкмин органариъ, сагъламвал уьбхбан, образованиейин, гъулан мяишатдин, промышленностдин цирклариъ ужудар пишекрар лазим ву. Конкурсдиъ гъалиб гъахьидар районарин гъулан мяишатарин МУП-ариъ, образованиейин, сагъламвал уьбхбан цирклариъ ляхнихъди тямин апIиди. Мисалназ, Дербент райондин главайин вазифйир тамам апIурайи Фуад Шихиевди конкурсдиъ иштирак гъахьидар ляхниз гъадагъуз гаф тувну.
Серенжемдин аьхириъ журналистари Артём Здуновдиз, Владимир Ивановдиз, Юлия Лузановайиз суалар тувнийи.
Йиз фикриан, мициб конкурс ихь дагълу юрднаъ чарасуз лазим ву. Жюрбежюр тешкилатар гьамусяаьт ляхин апIуз аьгъдру ва дубгъуз даккни пишекрарихъди аццна. «Учу му шагьриъ, райондиъ бабкан гъахьунча» кIури, чпи дапIну ккуни ляхникан фикир дарапIри йигъар адаури, жара йишвариан гъафидариз ляхин тувруган, хъюлар апIурайидарра цIиб адар.
Гьарсар касди гъийин йигъантIан закур ужуди чан вазифйир тамам апIури гъахьиш, республикайин аьгьвалат йигълан-йигъаз ужу хьибди.

Комментарии:

f1 in1 ok1 t1 v1 y1

Top