ГлавнаяПолитикаВ.Васильев: «Аьдати дагъустанлуйирин уьмур ужу апIуз узхьан удукьруб вари апIидиза»

В.Васильев: «Аьдати дагъустанлуйирин уьмур ужу апIуз узхьан удукьруб вари апIидиза»

1 1 1 1 1 1 1 1 1 1 Рейтинг 1.00 (1 Голос)

12Сентябрин 9-пи йигъан Дагъустандин парламентдин депутатари Урусатдин Президентди РД-йин Главайин гъуллугъниина улупнайи шубур кандидатдикан сар ктагънийи.

Сесер тувувал жиниди кIули гъубшнийи. Сесер тувайиз улихьна Халкьдин Собраниейин депутатар кандидатарин – Владимир Васильевдин, Камил Давдиевдин, Мягьмуд Мягьмудовдин докладарихъ хъпехъну.

Сарпирди гъубшу йисан октябрин вазлихъан мина региондин кIулиъ айирин вазифйир тамам апIурайи Владимир Васильев удучIвну гъулхнийи.

Чан улхбаъ В.Васильевди республикайиъ айи аьгьвалатнакан, Дагъустандиъ коррупция терг апIбан бадали кьабул апIурайи уьлчмйирикан ктибтнийи. Дугъу гъапиганси, республикайин Главайин вазифйир тамам апIувал, хатIасузвал ва ватандашарин ихтиярар тямин апIувал – рес-публикайин артмиш’валин важиблу шартIар вуди гъузра. В.Васильевди Урусатдин Генеральный прокуратурайиз, ФСБ-йиз, Урусатдин ва республикайин къанун уьбхру ва кьувватнан органариз гьюкмин заан гъуллугъар коррупцияйихьан марцц апIбан ва хатIасузвал тямин апIбан гьякьнаан къайдалу ляхин гъабхбаз чухсагъул мялум гъапIну. Дугъу кадрйирихъди вуйи ляхникан жаради гъапнийи. «Йиз Дагъустан» конкурсдиъ иштирак гъахьидарикан 54 кас гъядягъну. Республикайин улихь-кIулихь хьайидари цIийи жюрейиинди фикир ва ляхин апIуз аьгъюдарин, региондин артмиш’валин гъаразнаъ айидарин теклифар гьисабназ гъадагъиди.

Улхуб ккудубкIбан кьяляхъ, дугъу депутатарин суалариз жавабар тувну.

В.Васильевдин кьяляхъ «Гьякьлу Урусат» партияйин региондин отделениейин председатель, РД-йин Халкьдин Собраниейин Председателин заместитель Камил Давдиев сечкйириз улихьна вуйи чан программа хьади удучIвну гъулхну. «Ихь метлеб – республикайин яшайишдинна экономикайин улупбар, аскан гьисаб, Урусатдин кьялан улупбарихъ хъуркьувал ву», – къайд гъапIну дугъу.

Шубурпирди Дагъустандин коммунистарин партияйин кIулиъ айир, региондин парламентдин вице-спикер Мягьмуд Мягьмудов удучIвну гъулхнийи. Дугъу чан улхбаъ уч духьнайидарин фикир гьюкуматдин айтIан девлетар, хусуси мумкинвалар, гьацира федералин бюжетдин дакьатар шлубкьан мянфяаьтлуди ишлетмиш дапIну ккунивалиина жалб гъапIнийи.

Кандидатарин улхбар ккудукIбан кьяляхъ, гьарсаб фракцияйин терефнаан са-сар вакил удучIвну гъулхнийи. «Саб вуйи Урусат» партияйин терефнаан РД-йин Халкьдин Собраниейин депутат Нариман Асваров удучIвну гъулхнийи. «Владимир Аьбдуаьлиевичди Республикайин Главайин вазифйир тамам апIури гъахьи 11 вазлин арайиъ жямяаьтлугъдинна политикайин, рюгьнанна эдеблувалин ва жара цирклариъ ужудар дигиш’валар духьна. Дугъан сечкйириз улихьна вуйи программайиъ айи Дагъустан гележегдиъ артмиш апIбан рякъяр умуд кивуз шлудар ву, гьаддиз фракцияйин депутатари, РД-йин Главайин гъуллугъниина тя-йин апIбан бадали, Владимир Аьбдуаьлиевич Васильевдин кандидатурайин тереф уьбхюз къарар адабгъну, ва Халкьдин Собраниейин вари депутатарикан ич фракцияйин теклифнан тереф уьбхювал ккун апIурача», – гъапнийи Н.Асваровди.

Республикайин уьмрин гьарсаб цирклиъ гьял дарапIди гъузнайи месэлйир гизаф а. Н.Асваров республикайин Главайин фикир ккун апIурайи образованиейин, сагъламвал уьбхбан, яшайишдинна коммуналин цирклин ва кадрйирин политикайин месэлйириин дийигънийи.

Депутатарин сесер гьисаб апIбан бадали, гьисабнан комиссия арайиз гъабхнийи. Депутатарин 86 сеснакан 77 сес Владимир Васильевдихъанди тувну, думу гъалиб гъахьнийи.

Урусатдин Президентдин СКФО-йиъ вари ихтиярар айи вакил Александр Матовниковди В.Васильев гъуллугъниина ктагъбахъди тебрик гъапIну ва гъийин сесер тувувалин натижайиъ дугъ’ин, уьлкейин Президентдинси, Дагъустандин агьалйиринра хъугъ’вал аливал субут апIурайиваликан гъапну. «Яв кIван мюгькам гьевесну, кьувватну, уьмрин ва пишекарвалин тажрубайи улихь дивнайи мажбурнамйир тамам апIрувалин саб шакра гъибтрадар», – къайд гъапIну А.Матовниковди.

Чан терефнаан Владимир Васильевди къайд гъапIганси, гъи Дагъустандин аьдати агьалийин уьмур ужуб терефнахъинди илтIибкIру тарихи гьядиса гъабхьну. «Ватандашдиси, ватанпервериси, офицериси республикайин ва гьарсар агьалийин маракьар гирамиди тамам апIуз ва уьрхюз гаф тувраза. Ичв умудар кIулиз адагъуз чара апIидиза. Аьдати дагъустанлуйирин уьмур ужу апIуз узхьан удукьруб вари апIидиза. Правительствойин хуларин багахь хьайи мистан цалик гьамцдар гафар дидикIна: «Аллагь инсанариз артухъ уж’вал апIрударихьна артухъси рягьимлу ву». Гьадму гафариз даягъ хьуз чара апIидиза. СатIиди гизаф ляхин апIидихьа. Гьаму вахт-нан арайиъ узуз Дагъустан гизаф багахь гъабхьунзуз. Ичв кюмекназ ва гъавриъ хьувализ ккилигураза», – гъапну В.Васильевди.

Гьаму йигъан инаугурацияра гъабхьну, тазади Дагъустандин Главади ктагъу В.Васильевди аьгьт тувну. «Дагъустандин гизаф миллетарикан ибарат вуйи халкьдин гъуллугънаъ хьуз, Урусатдин Федерацияйин Конституция, федералин къанунар, Дагъустан Республикайин Конституция, Дагъустан Республикайин къанунар тамам апIуз, инсандин ва ватандашдин ихтиярар ва азадвал уьрхюз ва гьюрмат апIуз, Дагъустандин аьтрафарин сабвал уьбхюз, уз’ина табшурмиш дапIнайи Дагъустан Республикайин Главайин вазифйир гьякьлуди ва намуслуди тамам апIуз гаф тувраза», – гъапну В.Васильевди.

Комментарии:

f1 in1 ok1 t1 v1 y1

Top