ГлавнаяПолитикаСакьатвалин кьимат

Сакьатвалин кьимат

1 1 1 1 1 1 1 1 1 1 Рейтинг 5.00 (1 Голос)

wx1080
Дагъустандин Халкьдин Собраниейин депутат ва региондин главади гъилиху Рамазан Аьбдулатиповдин гъардаш Ражаб Аьбдулатипов, тахсиркарвалин тешкилатдиъ иштирак хьувалин тахсир кипну, къанун уьбхру органарин гъуллугъчйири гъидисну. Силисчйирин улупбариинди, тахсиркарвалин дестейин вакилари, руш’ват гъадабгъури, агьал-йириз инвалидвалин гьякьнаан документ туври гъахьну.

Мялуматарин дакьатариъ Ражаб Аьбдулатипов дидиснайивалин гьякьнаан улихьнара мялуматар туври гъахьнийи. Кьюб ваз улихьна Урусатдиан жара уьлкейиз самолетдиъди тIирхуз Москвайин аэропортдиз дуфнайир гъидисуваликан мялумат тувнийи. Думуган Ражаб Аьбдулатиповдик гъагъи тахсир кипрайи, гьаддиз думу гьяракатниинди Урусатдин Силисчивалин комитетдин кIу-лин идарайиз силис гъабхуз гъахнийи.

Думуган, кьюб-шубуб сяаьт улдубчIвубси, гъардаш дидиснайивалин гьякьнаан мялумат дюз даруб вуйиваликан Рамазан Аьбдулатиповди гъапнийи. Дугъан гафариинди, гьадму вахтна депутатди чан отпускдин вахт Алтайин дагълариъ адапIурайи.

Ражаб Аьбдулатипов РД-йин Халкьдин Собраниейин образованиейин, илимдин, культурайин жигьиларин ляхнарин, спортдин ва туризмдин комитетдин председатель ву. 2006-пи йисхъан мина 2016-пи йисазкьан думу Урусатдин УФМС-дин Дагъустан Республикайиъ айи идарайин начальникди лихури гъахьну.

Гьаму уголовный делойин дахилнаъди улихьнаси республикайин медицинайинна социалин экспертиза гъахру идарайин кIулиъ айи Мягьямед Мягьячев ва дугъан хиликк ккайидар гъидиснийи. Силисчивалин комитетдин вакиларин мялуматариинди, Мягьямед Мягьячев Дагъустандиъ медико-социалин экспертизайин Главный Бюройин кIулиъ дийигъуз Ражаб Аьбдулатиповди кюмек гъапIнийи. Гъуллугънан кьимат 70 миллион манат руш’ват гъабхьну.

Июлин 3-пи йигъан республикайин прокуратурайи мялум гъапIганси, М.Мягьячевдик 52 миллион манат руш’ват бисбан гьякьнаан тахсир кипрайи. Июлин 24-пи йигъан инвалидвал тувруган руш’ватар гъадагъурайи Мягьячевдин гъардаш гъидиснийи. Думу республикайин медицинайинна социалин экспертиза гъабхру идарайин аьтрафарин саб бюройин кIулиъ лихурайи. Прокуратурайин улупбариинди, кIулин бюройин гъуллугъчйири руш’ват бисури сакьатвалин гьякьнаан гизаф справкйир туври гъахьну. 2017-пи йисан республикайин 300 агьали дюз дарди сакьат касарси гьисаб апIбан натижайиъ Урусатдин Пенсйирин фонднаан 24 миллион манаткьан икI гъапIну, – мялумат тувра прокуратурайиан.

Комментарии:

f1 in1 ok1 t1 v1 y1

Top