ГлавнаяРазноеВаритIан лазим вуйиб

ВаритIан лазим вуйиб

1 1 1 1 1 1 1 1 1 1 Рейтинг 5.00 (1 Голос)

454Гьар ражари, гъунши гъулʼан вуйи ачIни хпир гъяркъиган ва фикриъ думу чан хъпирихъди тевиган, Сяидрин кIваз ишузкьан иццру апIуйи. Сефият чIеъси дюзир, уткан къамат хъайир, элвен гарцIлар ва ягъли мухрар кайир вуйи; дугъан лизи машнан кIалбар йишвси мучIу ургъайихъди (Сяидриз варитIан аьхю тясир гьадди апIуйи) утканди ттархьрайи. Хъа Сяидрин хпир Аьйшайин машнаъ кьарцIар ахьнайи, гьаммишан зегьмет зигбаан думу ипни ва цIибди кьяни духьнайи, кушаригъ кIуруш хайлин лизи чIарар гъяйи.
«Фу дубгна йиз гьамгъахъди шадсуз уьмур адапIури, Сефиятдихъди хушбахтди яшайиш хъапIуз шлуган» кIурурстар фикрар аьхиримжи вахтари Сяйидрин кIулиз кми-кмиди гъюрайи, амма инсанарихьан ва жвуван аькьвлихьан цIиб кин кади, дугъу дурариз рякъ туврадайи.
Саб ражари сумчриъ чахъди ялхъвниз удучIву Сефиятдин жигьил жандин гюрчегвал лап багахьди гъябкъиган, пиянвал кайи Сяид лап гъизмиш шулу. Хулаз дуфну, «увуз лазим вуйи шей’арра гъадагъну, йиз хул’ан закуриз дургин йихь. Узу уву адаураза», кIуру. Хъасин ахниин ярхи духьну нивкIуз гъягъюру.
ГвачIнинган Сяид таниш дару жарарин хулаъ нивкI’ан уягъ шулу.
«Вагь, узу наан айкIан? Накь сумчриъ амриан гъягъяйизкьан ички гъубхънушул, дархьиш му фу ляхин ву?..» – гьаму жюрейин фикрарарикк ккайи Сяид хпирин «Сабахайир ибшри, жилир!» кIуру сес кубкьиган, гьилиркъуру. Раккнаригъ машнаъ инчI ади дугъахьинди лигури Аьйша дийигънайи.
«Шлин хал ву му? – гъалаб кади гьерхру Сяидри.
– Якьинди, накь ички артухъ гъабхьунвуз гьа, жилир, – гъяаьлхъю Аьйша, – яв сижар абайин хал аьгъю шули имдарвуз?
– Хъа узу мушвазди фици адахъну?
– Накь уву гъапундайва, лазим вуйиб гъадабгъну, гъарах кIури. Узура, уву даахнайи ахин дибиржну ва кьял`ин иливну, абайин хулаз гъафунза.
«Ай ахмакь, цIибсан ми-йиш аьхю гъалатI деебтурайва гьа. Мицир вафалу хпир увуз сарун наан дихъуру? Гьич сар Сефиятдира уву мици ккун дарапIур!» кIулиз гъафи фикри Сяид нач’валиан уьру хьуз гъиту. Хпирин улихь чан ахмакьвал гардандиъ дибисну, думу Аьйшара хъади хулаз хътакуру.

Комментарии:

f1 in1 ok1 t1 v1 y1

Top